ଶୁଣିନଥିଲା ୨୪ ବର୍ଷର ବିଜେଡି ସରକାର, ଶୁଣିଲା ବିଜେପି ସରକାର । ଦ୍ରୁତଗତିରେ ଚାଲିଛି ବହୁ ପ୍ରତୀକ୍ଷିତ ପୁରୀ ସିଦ୍ଧମହାବୀର ରେଳ ଓଭରବ୍ରିଜ୍ ନିର୍ମାଣ । ୬୩.୮୪ ମିଟର ଲମ୍ୱ ଓଭରବ୍ରିଜ୍ ପାଇଁ ୧୩୭ କୋଟି ୬୧ ଲକ୍ଷ ଟଙ୍କା ବ୍ୟୟବରାଦ । ରେଳ ଫାଟକ ପଡି ଯାଉଥିବାରୁ ଲୋକଙ୍କୁ ଘଣ୍ଟା ଘଣ୍ଟା କରିବାକୁ ପଡୁଥିଲା ଅପେକ୍ଷା । ଏଣିକି ଆଉ ରହିବନି ଟ୍ରାଫିକ ସମସ୍ୟା, ପୁରୀରୁ କୋଣାର୍କ ଯାତାୟତ ହେବ ସୁଗମ ।

ଦୂର ହେବାକୁ ଯାଉଛି ପୁରୀ ସହରବାସୀ ଓ ପର୍ଯ୍ୟଟକଙ୍କ ଦୁଃଖ । ଜୋରସୋରରେ ଚାଲିଛି ସିଦ୍ଧ ମହାବୀର ରେଳ ଓଭରବ୍ରିଜ୍ ନିର୍ମାଣ କାର୍ଯ୍ୟ । କେନ୍ଦ୍ର ସଡ଼କ ପରିବହନ ମନ୍ତ୍ରୀ ନୀତିନ ଗଡକରୀ ଗତବର୍ଷ ଏହାର ଶିଳାନ୍ୟାସ କରିଥିବା ବେଳେ ୧୩୭ କୋଟି ୬୧ଲକ୍ଷ ଟଙ୍କାରେ ନିର୍ମିତ ହେବ ଏହି ରେଳ ଓଭରବ୍ରିଜ୍ । ଏହାଦ୍ବାରା ପୁରୀରୁ କୋଣାର୍କ ଯାତାୟତ ନେଇ ଟ୍ରାଫିକ ସମସ୍ୟା ଆଉ ହେବ ନାହିଁ।

ପର୍ଯ୍ୟଟନ ସହର ପୁରୀକୁ ପ୍ରତିଦିନି ଶତାଧିକ ଟ୍ରେନ୍ ଯାତାୟତ କରୁଥିବା ବେଳେ ସିଦ୍ଧମହାବୀରଠାରେ ଅଧିକାଂଶ ସମୟରେ ରେଳ ଫାଟକ ପଡ଼ି ରହୁଛି । ଫଳରେ ଆମ୍ବୁଲାନ୍ସ ଠାରୁ ଆରମ୍ଭ କରି ସ୍ଥାନୀୟ ଲୋକେ, ଛାତ୍ରଛାତ୍ରୀ, ପର୍ଯ୍ୟଟକ ନାହିଁ ନଥିବା ହଇରାଣ ହେଉଛନ୍ତି । ବାରମ୍ବାର ଦାବି ପରେ ବି ବିଜେଡି ସରକାର ଏହା ଉପରେ ଦୃଷ୍ଟି ଦେଇନଥିଲେ । ଯାହାକି ବିଜେପି ସରକାର ଦୀର୍ଘଦିନର ସ୍ବପ୍ନ ସାକାର କରିବାକୁ ଯାଉଥିବା ବେଳେ ଧନ୍ୟବାଦ ଜଣାଇଛି ରେଳ ଓଭରବ୍ରିଜ୍ କ୍ରିୟାନୁଷ୍ଠାନ କମିଟି ।

ଚୂଡ଼ାନ୍ତ ନକ୍ସା ଅନୁଯାୟୀ ରେଳ ଓଭରବ୍ରିଜର ଲମ୍ୱ ୬୩.୮୪ ମିଟର ଓ ଚଉଡ଼ା ୨୪ ମିଟର ରହିବ । ଏଥିରେ ଦୁଇ ଟିକିଆ ରାସ୍ତା, ଡ୍ରେନେଜ, ସର୍ଭିସ ରୋଡ଼ ଆଦି ରହିବ। ଓଭରବ୍ରିଜ୍ ନିର୍ମାଣ ପାଇଁ ଆହୁରି ୨.୬୬ ଏକର ଜମିର ଆବଶ୍ୟକତା ରହିଥିବାବେଳେ ରାସ୍ତାର ଲମ୍ୱ ୯୦୦ ମିଟର ଓ ଦୁଇ ପାର୍ଶ୍ୱରେ ଆପ୍ରୋଚ ରୋଡ଼ ନିର୍ମାଣ ନିମନ୍ତେ ୮୦ ଫୁଟ ଚଉଡ଼ାର ଜମି ଅଧିଗ୍ରହଣ କରାଯାଇଛି ।

ଏହି ପ୍ରକଳ୍ପ ପାଇଁ ମାଟିଆପଡା, ସିଦ୍ଧମହାବୀର, କୁମୁଟିପାଟଣା ଓ ବାଲୁଖଣ୍ଡ ମୌଜାର ଲୋକ ବିସ୍ଥାପିତ ହୋଇଥିବାବେଳେ ମଧ୍ୟରୁ ଅଧିକାଂଶ କ୍ଷତିପୂରଣ ପାଇ ସାରିଛନ୍ତି। ଆଉ କିଛି ଜଣ ପାଇନଥିବା ଅଭିଯୋଗ ହୋଇଛି । ସେପଟେ ଓଭରବ୍ରିଜ୍ ନିର୍ମାଣ ସହ ସମ୍ପୃକ୍ତ ସମସ୍ତ ବିଭାଗ ସହ ଆଲୋଚନା କରାଯାଇ ଧାର୍ଯ୍ୟ ସମୟ ମଧ୍ୟରେ ଏହା ଶେଷ ହେବ କହିଛନ୍ତି ଜିଲ୍ଲାପାଳ ।

ପୁରୀରୁ କୋଣାର୍କ, ଅସ୍ତରଙ୍ଗ, କାକଟପୁର, ଜଗତସିଂହପୁରକୁ ଯାତାୟାତ ସୁଗମ ନେଇ ସିଦ୍ଧମହାବୀର ରେଳ ଓଭରବ୍ରିଜର ନିର୍ମାଣ ଦ୍ରୁତଗତିରେ ଚାଲିଥିବାବେଳେ ଖୁବଶୀଘ୍ର ପୁରୀରୁ କୋଣାର୍କ ରେଳ ଲାଇନ୍ ପ୍ରକଳ୍ପ ମଧ୍ୟ ଆରମ୍ଭ ହେବ ବୋଲି କୁହାଯାଉଛି ।