ଆଉ ପାଣିରେ ପଡିବନି ଚାଷୀର ବର୍ଷଯାକର ପରିଶ୍ରମ । ଅଦିନିଆ ବର୍ଷା ଯୋଗୁଁ ଫସଲ କ୍ଷତି ହେଲେ ବି ଚିନ୍ତାରେ ପଡିବନି ଚାଷୀ । ଅଦିନିଆ ବର୍ଷା ଜନିତ କ୍ଷୟକ୍ଷତି ମୁକାବିଲା ପାଇଁ ବଡ ପଦକ୍ଷେପ ନେବାକୁ ଯାଉଛନ୍ତି ସରକାର । ୨୪ ବର୍ଷ ଶାସନରେ ରହିବା ପରେ ବି, ବିଗତ ସରକାର ଅଦିନିଆ ବର୍ଷାକୁ ବିପର୍ଯ୍ୟୟ ତାଲିକା ଭୁକ୍ତ କରିନଥିଲେ । ଯାହାଫଳରେ ପ୍ରାୟ ସମୟରେ ଅମଳ ବେଳେ ଅଦିନିଆ ବର୍ଷା ଯୋଗୁଁ ଫସଲ କ୍ଷତି ସହୁଥିଲେ ଚାଷୀ । ଯେଉଁଥିପାଇଁ ବନ୍ୟା, ବାତ୍ୟା, ମରୁଡି ଜନିତ ବିପର୍ଯ୍ୟୟ ଭଳି ଅଦିନିଆ ବର୍ଷାରେ ଫସଲହାନୀ ହେଲେ ଆଇନ ଅନୁସାରେ ଚାଷୀଙ୍କୁ ମିଳୁନଥିଲା ସହାୟତା ।

ଫସଲ ବୀମା, ନହେଲେ ସରକାରଙ୍କ ହାତ ଟେକା ସାହାଯ୍ୟକୁ ଚାହିଁ ରହୁଥିଲେ କ୍ଷତିଗ୍ରସ୍ତ ଚାଷୀ । କିନ୍ତୁ ଏଥର ସରକାର ବଦଳିଛି । ନିଜେ ଗ୍ରାଉଣ୍ଡକୁ ଯାଇ ଚାଷୀଙ୍କୁ ଭେଟି ଆଲୋଚନା କରିବା ସହ କ୍ଷେତ ପରିଦର୍ଶନ କରିଛନ୍ତି ଖୋଦ ମୁଖ୍ୟମନ୍ତ୍ରୀ । ଦୁଇ ଉପମୁଖ୍ୟମନ୍ତ୍ରୀ, ଅନ୍ୟ ବିଭାଗର ମନ୍ତ୍ରୀ ଓ ବିଜେପି ବିଧାୟକ ମାନେ ବି ଚାଷୀଙ୍କ ସହ ଛିଡା ହୋଇ ଦୁଃଖ ବାଣ୍ଟିଛନ୍ତି । କ୍ଷୟକ୍ଷତି ଭରଣା ପାଇଁ ତତ୍ପରତା ଦେଖାଇଛନ୍ତି ବିଜେପି ସରକାର । ଖୁବଶୀଘ୍ର ଅଦିନିଆ ବର୍ଷାକୁ ବିପର୍ଯ୍ୟୟ ତାଲିକା ଭୁକ୍ତ କରିବେ ସରକାର । ଅଦିନିଆ ବର୍ଷା ଏବଂ ଏହାଦ୍ଵାରା ହେଉଥିବା କ୍ଷୟକ୍ଷତିକୁ ପ୍ରାକୃତିକ ବିପର୍ଯ୍ୟୟ ପରିଧି ଭିତରକୁ ଆଣିବା ପାଇଁ ତର୍ଜମା କରାଯାଉଥିବା କହିଛନ୍ତି ରାଜସ୍ଵ ଓ ବିପର୍ଯ୍ୟୟ ପରିଚାଳନା ମନ୍ତ୍ରୀ । କେବଳ ଏତିକି ନୁହେଁ, ଫସଲ କ୍ଷତି ପାଇଁ ଚାଷୀଙ୍କ ପଞ୍ଜୀକରଣ ତାରିଖକୁ ମଧ୍ୟ ଦୁଇ ଦିନ ବଢାଇଛନ୍ତି ରାଜ୍ୟ ସରକାର । ୧ ତାରିଖ ରାତି ୧୨ଟା ପର୍ଯ୍ୟନ୍ତ କ୍ଷତିପୂରଣ ପାଇଁ ପଞ୍ଜୀକରଣ କରିପାରିବେ ଚାଷୀ ।

ଏହାସହ ଯେଉଁ ଚାଷୀ ମାନେ ବୀମା କରିନାହାନ୍ତି । ସେମାନଙ୍କୁ ସିଧା ସଳଖ ସହାୟତା ଯୋଗାଇ ଦେବେ ସରକାର । ଜିଲ୍ଲାପାଳ ମାନଙ୍କୁ କୁହାଯାଇଛି, କୌଣସି ଚାଷୀ ଯେମିତି କ୍ଷତିପୂରଣ ପାଇବାରୁ ବାଦ ପଡ଼ିବେନି । ଏହାଛଡା ବୀମା କରୁଥିବା ଚାଷୀଙ୍କୁ କ୍ଷତିପୂରଣ ଦେବାକୁ ବୀମା କମ୍ପାନୀ ଗୁଡ଼ିକ ସହ ସରକାର ସମ୍ପର୍କରେ ଅଛନ୍ତି । ସେହିପରି ଓଦା ହୋଇଥିବା ଧାନକୁ ଚାଷୀ ଶୁଖାଇ ବିକ୍ରି କଲା ବେଳେ ମଣ୍ଡିରେ FAQ ମାନକୁ କୋହଳ ପାଇଁ ମଧ୍ୟ ନିର୍ଦ୍ଦେଶ ଦିଆଯାଇଛି । ବନ୍ୟା, ବାତ୍ୟା ମରୁଡି, ଭୂକମ୍ପ, ସୁନାମି, ଆଦି ଯାଉଛି ପ୍ରାକୃତିକ ବିପର୍ଯ୍ୟୟ ତାଲିକାରେ। ଏବେ ଅଦିନିଆ ବର୍ଷାକୁ ଏହି ପରିଧିକୁ ଆଣିବାକୁ ଅଣ୍ଟା ଭିଡିଛନ୍ତି ରାଜ୍ୟ ସରକାର। ଚଳିତ ବର୍ଷ ଚାଷୀ ପାଇଁ ସର୍ବନାଶ ସାଜିଲା ପୁଷ ମାସ । ଅମଳ ବେଳେ ଦାଉ ସାଧିଲା ଅଦିନିଆ ବର୍ଷା । କେମିତି କ୍ଷତି ଭରଣା ହେବ ତାକୁ ନେଇ ଚିନ୍ତାରେ ଚାଷୀ । ହେଲେ ସରକାରଙ୍କ ତୁରନ୍ତ ପଦକ୍ଷେପ ପାଇଁ କ୍ଷତିପୂରଣ ମିଳିବା ଆଶାରେ ଚାଷୀ ।

Argus News: ଓଡ଼ିଶାର ଖବର | Breaking News, ରାଜନୀତି, କ୍ରୀଡ଼ା ଓ Live TV