ଦିନରେ ଚେକିଂ, ରାତିରେ ପାଟ୍ରୋଲିଂ। ବିଭିନ୍ନ ସ୍ଥାନରେ ନାକା ବନ୍ଦୀ। ଗାଡ଼ି ଜବତ, ମାଫିଆଙ୍କୁ ଗିରଫ କରିବା ସତ୍ବେ ଭଦ୍ରକ ଜିଲ୍ଲାରେ ଗୋ ଚାଲାଣ କମିବା ବଦଳରେ ଦିନକୁ ଦିନ ବଢ଼ିବାରେ ଲାଗିଛି । ଗତ କିଛି ମାସ ଭିତରେ ପୋଲିସର କଡ଼ା ଆକ୍ସନ ଗୋ-ମାଫିଆଙ୍କ ପାଇଁ କଷ୍ଟକର ସ୍ଥିତି ସୃଷ୍ଟି କରିଛି। ରାତିରେ ଗୋ-ଚାଲାଣ କରୁଥିବା ଗାଡ଼ିଙ୍କୁ ଗୋଡ଼ାଇ ଗୋଡ଼ାଇ ଧରିବାର ଘଟଣା ବି ବାରମ୍ବାର ସାମ୍ନାକୁ ଆସୁଛି। କିନ୍ତୁ ଅଧିକାଂଶ ମାମଲାରେ ମାଫିଆ ଖସି ପଳାଉଛନ୍ତି। ଟାଉନ ଥାନା ଓ ପୁରୁଣା ବଜାର ଥାନା ଅଞ୍ଚଳରୁ ଅଧିକ ସଂଖ୍ୟାରେ ଗୋଚାଲାଣ ମାମଲା ସାମ୍ନାକୁ ଆସୁଛି। ଧାମନଗର, ଧୁଷୁରୀ, ତିହିଡ଼ି ଆଦି ଅଞ୍ଚଳ ବି ଏ ଦୃଷ୍ଟିରୁ ସମ୍ବେଦନଶୀଳ ହେଲାଣି। ଏବେ ଆହୁରି ଅଧିକ ଚଢ଼ାଉର ଆବଶ୍ୟକତା ଥିବା କହୁଛନ୍ତି ଭଦ୍ରକର ବୁଦ୍ଧିଜୀବୀ।

ପୋଲିସ ରେକର୍ଡ ଅନୁସାରେ ଗତ 6 ମାସ ଭିତରେ ଜିଲ୍ଲାର ବିଭିନ୍ନ ଥାନାରେ ଗୋଚାଲାଣ ସମ୍ପର୍କିତ 48ଟି ମାମଲା ରୁଜୁ ହୋଇଛି। 43ଟି ଗାଡ଼ି ସିଜ୍ କରିବା ସହ ବେଆଇନ ଗୋ ଚାଲାଣ କରୁଥିବା 124 ଜଣଙ୍କୁ ଗିରଫ କରାଯାଇଛି । 311ଟି ଗୋମାତାଙ୍କୁ ଉଦ୍ଧାର କରି ଗୋଶାଳାରେ ଛଡ଼ା ଯାଇଛି । ଏତିକି ସଂଖ୍ୟାରେ ଧରାପଡୁଥିବାବେଳେ ଅନେକ ଖସିଯାଉଥିବା କୁହାଯାଉଛି। ପ୍ରତିଦିନ ଶହ ଶହ ସଂଖ୍ୟାରେ ଗୋରୁ ଓ ଟନ୍ ଟନ୍ ଗୋମାଂସ ଭଦ୍ରକରୁ ଜିଲ୍ଲା ତଥା ରାଜ୍ୟ ବାହାରକୁ ଚାଲାଣ ହେଉଛି। ବେଆଇନ ଗୋ-ଚାଲାଣ ରୋକିବାକୁ ରାଜ୍ୟ ସରକାର କଡ଼ା ଆଇନ ପ୍ରଣୟନ କରିବା ଦରକାର ବୋଲି ଆଇନଜୀବୀଙ୍କ ମତ। କଡ଼ା ଆଇନ ନ ଥିବାରୁ ଗିରଫ ହେଉଥିବା ମାଫିଆ କିଛି ଦିନ ଭିତରେ ଖସିଯାଇ ପୁଣି ପୂର୍ବଭଳି ବେଆଇନ କାମରେ ଲାଗୁଛନ୍ତି।