ଅର୍ଗସ ବ୍ୟୁରୋ:  ପୂରଣ ହେବ ବାସୁଦେବପୁର ବାସୀଙ୍କ ସ୍ୱପ୍ନ । ବାସୁଦେବପୁର ରେ ହେବ ଅତ୍ୟାଧୁନିକ ସ୍ମାର୍ଟ ପାର୍କ । ଏଥିପାଇଁ ଅର୍ଥ ମଞ୍ଜୁର ପରେ ବି ରାଜନୈତିକ ଇଛାଶକ୍ତି ଓ ପ୍ରଶାସନର ଅବହେଳା କାରଣରୁ ଅଧାରେ ଅଟକିଛି ପ୍ରକଳ୍ପ । ବାସୁଦେବପୁର ପୌରପାଳିକାର ହେଇଥିବା ସ୍ମାର୍ଟ ପାର୍କ ର ଦୃଶ୍ୟ । ଯାହା ଏବେ ପ୍ରଶାସନିକ ଅବହେଳା ଓ ରାଜନୈତିକ ଇଛାଶକ୍ତି ଅଭାବରୁ କାମ ହେଇନପାରି ବନ୍ଦ ହେଇ ପଡିରହିଛି । ଫଳରେ ଏହା ଏବେ ବଣ ଜଙ୍ଗଲ ରେ ଭର୍ତି ହେଇଜାଇଛି । ଓ ପଶୁ ପକ୍ଷୀଙ୍କ ଚାରା ଭୂମି ପାଲଟିଛି ।

ଯେଉଁ ସ୍ମାର୍ଟ ପାର୍କ ପାଇଁ ବାସୁଦେବପୁର ବାସି ଦୀର୍ଘ ଦିନ ଧରି ଦାବି କରି ଆସୁଥିଲେ । ସ୍ୱପ୍ନ ମଧ୍ୟ ଦେଖୁଥିଲେ । ବହୁ ଦାବି ପରେ ପୂର୍ବ ସରକାରଙ୍କ ସମୟରେ ଗତ 2022 ମସିହା ଅଗଷ୍ଟ ମାସରେ ବିଜେଡିର ବିଧାୟକ, ସାଂସଦ ଓ ମନ୍ତ୍ରୀଙ୍କ ଦ୍ୱାରା ଶିଳାନ୍ୟାସ କରାଯାଇଥିଲା । ଆଉ ଏହି କାମ ପାଇଁ ପ୍ରଥମେ ପାଖାପାଖି 85 ଲକ୍ଷ ଉର୍ଦ୍ଧ୍ୱ ଟଙ୍କା ବ୍ୟୟ ଅଟକଳ ମୂଲ୍ୟ ଧାର୍ଯ୍ୟ କରାଯାଇଥିଲା । ପରେ ପୁଣି 4ଟି ପର୍ଯ୍ୟାୟରେ 33ଲକ୍ଷରୁ ଟଙ୍କା ଖର୍ଚ୍ଚ ହେଇଥିବା ଫଳକ ଲଗାଯାଇଛି । ହେଲେ ଅଧା ପନ୍ତରିଆ ଭାବେ ପଡି ରହିଛି ଏହି ପ୍ରକଳ୍ପ । ସେମିତି ବାସୁଦେବପୁର ବାସୀଙ୍କ ସ୍ୱପ୍ନ ସ୍ୱପ୍ନରେ ରହିଯାଇଛି । ପ୍ରଥମେ ପ୍ରକଳ୍ପଟି ପୌରପାଳିକାର ବିନ୍ଧାଆଡ଼ି ଠାରେ ହେବାକୁ ସ୍ଥିର କରାଯାଇଥିଲା ।

ହେଲେ ଆବଶ୍ୟକୀୟ ଭିତ୍ତିଭୂମି ଅଭାବରୁ ପ୍ରକଳ୍ପଟିକୁ ସାନ୍ତାଣୀ ପୋଖରୀ ନିକଟରେ ହେବାକୁ ସ୍ଥିର କରାଗଲା । 12ଏକର ସରକାରୀ ଜମି ସହ ପୋଖରୀ ଥିବା ସାନ୍ତାଣୀ ପୋଖରୀ ନିକଟରେ ଧାର୍ଯ୍ୟ ପରେ କାମ ଆରମ୍ଭ ହେଲା । ପୋଖରୀ ଚାରିପଟେ ବାଉଣ୍ଡାରୀ ପାଇଁ ପିଲାର ଓ ବିମ ପଡିଲା। ମାଟି ପକାଇ ସମତୁଲ ହେଇଛି । କେବଳ ସେତିକି କାମ ପରେ ଦୀର୍ଘ ଦିନ ଧରି ପ୍ରକଳ୍ପର କାମ ବନ୍ଦ ରହିଛି । ଫଳରେ ସ୍ମାର୍ଟ ପାର୍କ ଜାଗାଟି ଏବେ ଜଙ୍ଗଲରେ ପରିଣତ ହେଇଛି । ଏହା ସହ ଦୀର୍ଘ ଦିନ ଧରି କାମ ବନ୍ଦ ରହିବା ଫଳରେ ରଡ ଗୁଡିକ କଳଙ୍କି ଲାଗି ନଷ୍ଟ ହେବାକୁ ବସିଲାଣି। ଓ ଲୁହା ରଡ ମଧ୍ୟ କେହି କାଟି ନେଲେଣି । ହେଲେ ପୌର ପ୍ରଶାସନ ଚୁପ ବସିଛି । ପ୍ରଶାସନର ଅବହେଳା ପାଇଁ ସେମିତି ଅଧା ପନ୍ତରିଆ ଭାବେ ପଡିରହିଛି ।

ଫଳରେ ଅନିଶ୍ଚିତତା ମଧ୍ୟକୁ ଠେଲି ହେଇ ଯାଉଛି ଏହି ପ୍ରକଳ୍ପ । ଅନ୍ୟପଟରେ ରାଜନୈତିକ ଛକାପଞ୍ଝା କାରଣରୁ ପ୍ରକଳ୍ପଟି ଅଧାରୁ ବନ୍ଦ ହେଇ ପଡିଥିବା ସ୍ଥାନୀୟ ଲୋକ ଅଭିଯୋଗ ଆଣିଛନ୍ତି । ଫଳରେ ସ୍ମାର୍ଟ ପାର୍କ ପାଇଁ ସ୍ୱପ୍ନ ଦେଖୁଥିବା ବାସୁଦେବପୁର ବାସୀ ତୁରନ୍ତ ପ୍ରକଳ୍ପଟିକୁ ସାରିବାକୁ ଦାବି କରୁଛନ୍ତି । ତେବେ କେବେ ବାସୁଦେବପୁର ବାସୀଙ୍କ ସ୍ୱପ୍ନ ପୁରଣ ହେବ ତାହା ଦେଖିବାକୁ ବାକି ରହିଲା ।