ପେଟାନାଳ, ଯିଏ ଦୀର୍ଘ ବର୍ଷ ଧରି ରାଜନୀତିର ପଶାପାଲିରେ ଛନ୍ଦି ହୋଇ ରହିଥିଲା । କଟକ-ବାରବାଟୀ ରାଜନୀତିରେ ମୋହରା ହୋଇ ରହିଯାଇଥିଲା ପେଟାନାଳ । ପୂର୍ବ ବିଜେଡି ସରକାରଙ୍କ ସମୟରେ ପେଟାନାଳର ପୁନରୁଦ୍ଧାର ପାଇଁ ତରବରିଆ ଭାବେ ଯୋଜନା ତିଆରି ହୋଇଥିଲା । କୋଟି କୋଟି ଟଙ୍କା ବ୍ୟୟ ବରାଦ କରାଯାଇଥିଲା । ବିଜେଡି-କଂଗ୍ରେସ ମଧ୍ୟରେ ଏହାକୁ ନେଇ ଟଣାଓଟରା ମଧ୍ୟ ଲାଗି ରହିଥିଲା ।

ଏହାରି ମଧ୍ୟରେ କିଛି ମାତ୍ରାରେ ପଙ୍କ କଢ଼ଯାଇ ସିଡିଏ ସେକ୍ଟର ୧୦ ଅଳ୍ପ ମାତ୍ରାରେ ଗାର୍ଡୱାଲ ତିଆରି କରାଗଲା । ଏହା ପରେ ତାହା ପୁଣି ଯଥା ପୂର୍ବଂ ତଥା ପରଂ ହୋଇ ରହିଯାଇଥିଲା । ପେଟାନାଳର ଦୁର୍ଗନ୍ଧ ଓ ଅପରିଷ୍କାର ପରିବେଶ ଯୋଗୁଁ ଅତିଷ୍ଟ ହୋଇ ପଡିଛନ୍ତି ସିଡିଏ ଓ ବିଡାନାସୀ ବାସିନ୍ଦା ।

ତେବେ ନୂଆ ସରକାର ଆସିବା ପରେ ପେଟାନାଳର ପୁନରୁଦ୍ଧାର ନେଇ ଆଶା ଉଜ୍ଜୀବିତ ହୋଇଛି । ନିଜେ କଟକ ସାଂସଦ ଭର୍ତ୍ତୃହରି ମହତାବ, କଟକ ଜିଲ୍ଲାପାଳ ଓ ବିଭାଗୀୟ ଅଧିକାରୀଙ୍କୁ ନେଇ ଗ୍ରାଉଣ୍ଡକୁ ଯାଇ ସ୍ଥିତିର ସମୀକ୍ଷା କରିଛନ୍ତି । ଏକ ବର୍ଷ ମଧ୍ୟରେ ଏହାର ପୁନରୁଦ୍ଧାର କାର୍ଯ୍ୟ ଶେଷ କରିବା ପାଇଁ ନିର୍ଦ୍ଦେଶ ଦେଇଛନ୍ତି କଟକ ସାଂସଦ ।

ସିଡିଏ ସେକ୍ଟର ୧୦ରୁ ଆରମ୍ଭ ହୋଇ ସେକ୍ଟର ୧ ପାଖାପାଖି ୩.୬ କିମି ପର୍ଯ୍ୟନ୍ତ ଲମ୍ବିଛି ଏହି ପେଟାନାଳ । ପଙ୍କ, ଦଳ, ସିଡିଏ ଓ ବିଡାନାସୀର ବର୍ଯ୍ୟଜଳ ଓ ଅଳିଆ ଆବର୍ଜ୍ଜନରେ ଭର୍ତ୍ତି ହୋଇ ରହିଛି । ଯାହା ଦୂର୍ଗନ୍ଧମୟ ପରିବେଶ ସୃଷ୍ଟି କରିଥିବା ବେଳେ ମଶା ଓ ମାଛିଙ୍କ ପାର୍ଦୁଭାବ ବଢୁଛି । ତେବେ ଏହି ପେଟାନାଳର ପୁନରୁଦ୍ଧାର ପାଇଁ ହାଇକୋର୍ଟ ମଧ୍ୟ ହସ୍ତକ୍ଷେପ କରିଥିବା ବେଳେ ଏହାକୁ ପ୍ରଦୂଷଣମୁକ୍ତ କରିବା ପାଇଁ ଜାତୀୟ ଗ୍ରୀନ ଟ୍ରିବୁନାଲ ମଧ୍ୟ ନିର୍ଦ୍ଦେଶ ଦେଇଛନ୍ତି ।

ଯାହାକୁ ଦୃଷ୍ଟିରେ ରଖି ନୂଆ ଯୋଜନାରେ ଏହାକୁ ପ୍ରଦୂଷଣ ମୁକ୍ତ କରିବା ପାଇଁ ଏଥିରେ ମିଶୁଥିବା ବର୍ଯ୍ୟଜଳକୁ ଅନ୍ୟ ଏକ ଡ୍ରେନରେ ଛଡାଯିବ । ପେଟାନାଳକୁ ସିଧାସଳଖ କଠାଯୋଡ଼ି ସହ ସଂଯୋଗ କରାଯିବ । ଉଭୟ ପାର୍ଶ୍ଵରେ ରାସ୍ତା ଚଉଡ଼ା ହେବା ସହ ଏହାର ସୌନ୍ଦର୍ଯ୍ୟକରଣ କରିବା ପାଇଁ ଏବେ ଯୋଜନା କରିଛନ୍ତି ନୂତନ ସରକାର ।

ଅନ୍ୟପଟେ ଏହାକୁ ସ୍ଵାଗତ କରିଛନ୍ତି ସ୍ଥାନୀୟ ବାସିନ୍ଦା । ପେଟାନାଳର ଭାଗ୍ୟ ବଦଳିବା ନେଇ ଏବେ ଖୁବ ଆଶାବାଦୀ ଅଛନ୍ତି କଟକ ବାସିନ୍ଦା ।

Argus News | argus news | Odisha Latest News, Breaking News, Trending News, Live TV