ଅର୍ଗସ ବ୍ୟୁରୋ: ଶେଷ ହୋଇଛି ରାଜ୍ୟରେ ଚତୁର୍ଥ ପର୍ଯ୍ୟାୟ ତଥା ଅନ୍ତିମ ପର୍ଯ୍ୟାୟ ନିର୍ବାଚନ । ଗଣତନ୍ତ୍ରର ଏହି ମହାପର୍ବରେ ବହୁ ସଂଖ୍ୟାରେ ଭୋଟର ସାମିଲ ହୋଇ ମତ ସାବ୍ୟସ୍ତ କରିବା ସହ ବାଛିଛନ୍ତି ନିଜ ମନ ପସନ୍ଦର ନେତା । ଭୋଟ ଦେବା ପାଇଁ ଆଜି ସକାଳ ପହରୁ ହିଁ ଲୋକଙ୍କ ଭିତରେ ଉତ୍ସାହ ବାରି ହୋଇ ପଡ଼ିଥିଲା। ଅସହ୍ୟ ଗରମ ଓ ଗୁଳୁଗୁଳି ସତ୍ତ୍ବେ ଲମ୍ବା ଲାଇନରେ ରହି ଲୋକ ଭୋଟ ଦେଇଥିଲେ । ନୂଆ ଭୋଟରଙ୍କ ଠୁ ନେଇ ବୟସ୍କ ଭୋଟର ସମସ୍ତେ ଉତ୍ସାହର ସହ କରିଥିଲେ ଭୋଟିଂ।

ସେପଟେ ତିନୋଟି ପର୍ଯ୍ୟାୟ ତୁଳନାରେ ଶେଷ ପର୍ଯ୍ୟାୟରେ ମତଦାନ ପ୍ରତିଶତର ସବୁ ରେକର୍ଡ ଭାଙ୍ଗିଛି । ପ୍ରାୟ ୭୮ ପ୍ରତିଶତ ମତଦାନ ସହ ସବୁଠୁ ଅଧିକ ଭୋଟିଂ ହୋଇଛି ଏହି ଶେଷ ପର୍ଯ୍ୟାୟ ନିର୍ବାଚନରେ । ଯାହାକୁ ନେଇ ରାଜ୍ୟବାସୀଙ୍କୁ କୃତଜ୍ଞତା ଜଣାଇବା ସହ ସମସ୍ତ ଅଧିକାରୀଙ୍କୁ ଧନ୍ୟବାଦ ଦେଇଛନ୍ତି ରାଜ୍ୟ ମୁଖ୍ୟ ନିର୍ବାଚନ ଅଧିକାରୀ ।

ଅନ୍ୟପଟେ ନିର୍ବାଚନ ଶେଷ ହେବା ସହ ଇଭିଏମ ରେ ସିଲ ହୋଇଛି ଅନେକ ହେଭିୱେଟଙ୍କ ଭାଗ୍ୟ । ଯେମିତିକି ବାଲେଶ୍ଵର ଲୋକସଭାରେ ପୂର୍ବତନ କେନ୍ଦ୍ର ମନ୍ତ୍ରୀ ତଥା ବିଜେପି ସାଂସଦ ପ୍ରତାପ ଷଡ଼ଙ୍ଗୀ ଓ କଂଗ୍ରେସର ପ୍ରାର୍ଥୀ ତଥା ପୂର୍ବତନ କେନ୍ଦ୍ର ମନ୍ତ୍ରୀ ଶ୍ରୀକାନ୍ତ ଜେନାଙ୍କ ଭାଗ୍ୟ ସିଲ ହୋଇଛି । ସେହିପରି ମୟୂରଭଞ୍ଜ ଲୋକସଭାରେ ବିଜେପି ପ୍ରାର୍ଥୀ ତଥା ବର୍ତ୍ତମାନର ବିଧାୟକ ନବଚରଣ ମାଝୀ ଏବଂ ବିଜେଡି ପ୍ରାର୍ଥୀ ତଥା ମନ୍ତ୍ରୀ ସୁଦାମ ମାର୍ଣ୍ଡିଙ୍କ ଭାଗ୍ୟ ବି ସିଲ ହୋଇଛି । ସେହିପରି କେନ୍ଦ୍ରାପଡା ଲୋକସଭାରେ ବିଜେପିର ହେଭିୱେଟ ନେତା ବୈଜୟନ୍ତ ପଣ୍ଡା ଏବଂ ବିଜେଡି ପ୍ରାର୍ଥୀ ଅଂଶୁମାନ ମହାନ୍ତି ଭାଗ୍ୟ ପରୀକ୍ଷା ଦେଇଛନ୍ତି। ଏହିପରି ଅନେକ ହେଭିୱେଟ ନିଜ ଭାଗ୍ୟ ପରୀକ୍ଷା ଦେଇ ଫଳାଫଳକୁ ଅପେକ୍ଷା କରିଛନ୍ତି ।

ପୂର୍ବ ତିନୋଟି ପର୍ଯ୍ୟାୟରେ ଯଥାକ୍ରମେ ୭୩, ୭୩, ୭୪ ପ୍ରତିଶତ ମତଦାନ ହୋଇଥିବା ବେଳେ ଶେଷ ପର୍ଯ୍ୟାୟରେ ୭୮ ପ୍ରତିଶତ ମତଦାନ ହୋଇଛି । ଯାହାକି ସର୍ବକାଳୀନ ରେକର୍ଡ।

ଅଧିକ ପଢ଼ନ୍ତୁ ନିର୍ବାଚନ ଖବର

Argus News: ଓଡ଼ିଶାର ଖବର | Breaking News, ରାଜନୀତି, କ୍ରୀଡ଼ା ଓ Live TV