ଗଞ୍ଜେଇ ମାଫିଆଙ୍କ ହାଇଟେକ ବୁଦ୍ଧି
Key Points
ପୋଲିସକୁ ଚକମା ଦେବା ପାଇଁ ଗଞ୍ଜେଇରେ ମିଶାଇଥିଲେ ଗନ୍ଧ କର୍ପୁର
କାମ ଦେଲାନି ଗଞ୍ଜେଇ ମାଫିଆଙ୍କ ପ୍ଲାନ
ମାଡ଼ି ବସିଲା ପୋଲିସ, ୨ ଗିରଫ
ଖଣ୍ଡଗିରି ରାସ୍ତାରେ ଗୋଟିଏ ଟ୍ରକରେ ଗଞ୍ଜେଇ ଯାଉଥିବା ଖବର ପାଇଥିଲା ପୋଲିସ । AP 30 X 3499 ନମ୍ବର ବିଶିଷ୍ଟ ଟ୍ରକକୁ ପିଛା କରିଥିଲା ସ୍ପେଶାଲ କ୍ରାଇମ ୟୁନିଟ ଏବଂ ଖଣ୍ଡଗିରି ପୋଲିସ। ପୋଲିସକୁ ଦେଖି ଖାରବେଳ ପାର୍କ ନିକଟରେ ଗାଡି ଛାଡି ଫେରାର ହୋଇଯିବାକୁ ଉଦ୍ୟମ କରିଥିଲେ ଡ୍ରାଇଭର ଏବଂ ହେଲପର । ଚାରିଆଡୁ ପୋଲିସ ଘେରି ଯାଇ ଦୁଇ ଜଣଙ୍କୁ ଗିରଫ କରିଥିଲା। ଆଉ ତଲାସୀ ବେଳେ ସାମ୍ନା ଆସିଲା ସିକ୍ରେଟ ଚାମ୍ବର । ତା ଭିତରେ ୫ କୁଇଣ୍ଟାଲରୁ ଅଧିକ ଗଞ୍ଜେଇ ଜବତ କଲା ପୋଲିସ। ୫ କିଲିଆ ପ୍ୟାକେଟ କରି ଫୁଲବାଣୀରୁ ହିମାଞ୍ଚଳ ପ୍ରଦେଶ ଭାୟା ଭୁବନେଶ୍ୱର ଦେଇ ହେଉଥିଲା ଚୋରା ଚାଲାଣ ।
ଗିରଫ ଦୁଇ ଗଞ୍ଜେଇ ବେପାରୀ ହେଲେ ଫୁଲବାଣୀ ଫିରିଙ୍ଗିଆ ଅଞ୍ଚଳର ମହେଶ୍ୱର ମଲିକ ଏବଂ ପଞ୍ଜାବ ଅମ୍ରିତସର ଅଞ୍ଚଳର ମନ୍ଦୀପ ସିଂ। ମନ୍ଦୀପ ସିଂ ଟ୍ରକ ଡ୍ରାଇଭର। ସେପଟେ ଓଡିଶାରୁ ଗଂଜେଇ ଟ୍ରକକୁ ପାର କରି ଦେବାକୁ 2000 ଟଙ୍କା ନେଉଥିଲା ମହେଶ୍ୱର। ତଦନ୍ତ ବେଳେ ପୋଲିସ ଆଗରେ ସବୁ ସତ ମାନିଛନ୍ତି ଦୁଇ ଅଭିଯୁକ୍ତ । ତେବେ ଏଠି ପ୍ରଶ୍ନ - କେବେଠାରୁ ଏଭଳି ଭାବେ ଚାଲିଥିଲା ଗଞ୍ଜେଇ କାରବାର? ଫୁଲବାଣୀରୁ ଗଞ୍ଜେଇ ଆସୁଥିଲା ହେଲେ କେମିତି ଜାଣି ପାରିଲାଣି ଫୁଲବାଣୀ ପୋଲିସ ? ଏମାନଙ୍କ ପଛରେ ରହିଛି କି ବଡ଼ ସିଣ୍ଡିକେଟ ? ଏମିତି ତମାମ ପ୍ରଶ୍ନର ଉତ୍ତର ଜାଣିବାକୁ ଚାହୁଁଛି କମିଶନରେଟ ପୋଲିସ ।
ରାଜ୍ୟରେ ନିଶା କାରବାରକୁ ରୋକିବା ପାଇଁ ଅନେକ ପ୍ରୟାସ ଜାରି ରଖିଛି ଓଡ଼ିଶା ପୋଲିସ । ହେଲେ ରାଜ୍ୟ ବାହାରର ନିଶା ବେପାରୀଙ୍କ ଉପରେ କେମିତି ଦୃଢ଼ କାର୍ଯ୍ୟାନୁଷ୍ଠାନ ନିଆଯାଇପାରିବ, ସେନେଇ ପୋଲିସ ଧ୍ୟାନ ଦେଉ ବୋଲି ସାଧାରଣରେ ଦାବି ହୋଇଛି ।
