ପଶ୍ଚିମବଂଗ ମୁର୍ଶିଦାବାଦରେ ହିଂସା ଭିଆଇବା ପରେ କିଛି ସନ୍ଦିଗ୍ଧ ଝାରସୁଗୁଡା ପଳାଇ ଆସିଥିବା ସନ୍ଦେହ । ଏନେଇ ବନହରପାଲି ଥାନା ବନ୍ଧବାହାଲ ଅଞ୍ଚଳରେ ପୋଲିସର ଚଢ଼ଉ । ସନ୍ଦିଗ୍ଧଙ୍କୁ ପୋଲିସ ପଚରା ଉଚରା କରୁଛି । ଉତ୍ତରାଞ୍ଚଳ ପୋଲିସ ଆଇଜି ହିମାଂଶୁ ଲାଲ, ସକାଳୁ ଘଟଣାସ୍ଥଳରେ ପହଞ୍ଚି ସ୍ଥିତି ଅନୁଧ୍ୟାନ କରିଛନ୍ତି । ଝାରସୁଗୁଡ଼ା ଏସପି ସ୍ମିତ୍ ପରମାର ଓ ବରିଷ୍ଠ ପୋଲିସ ଅଧିକାରୀଙ୍କ ସହ ପଶ୍ଚିମବଙ୍ଗ ପୋଲିସ ମଧ୍ୟ ଘଟଣାସ୍ଥଳରେ ଉପସ୍ଥିତ ଅଛନ୍ତି ।

ତେବେ ମୁର୍ଶିଦାବାଦ୍‌ ହିଂସାକାଣ୍ଡ ଘଟଣାରେ ପୋଲିସ ଏବେ ଗିରଫ ଅଭିଯାନ ଆରମ୍ଭ କରିଛି । କେନ୍ଦ୍ରୀୟ ଫୋର୍ସ ପହଞ୍ଚିବା ପରେ ଦଙ୍ଗାକାରୀ ଛତ୍ରଭଙ୍ଗ ଦେଇଛନ୍ତି । ଏହି ଦଙ୍ଗାକାରୀଙ୍କ ପାଇଁ ନିଜ ଦେଶରେ ଏବେ ହିନ୍ଦୁ ସାଜିଛନ୍ତି ଶରଣାର୍ଥୀ । ଭୂଇଁରେ ଗଡ଼ି ମାଗୁଛନ୍ତି ନ୍ୟାୟ । ମୁର୍ଶିଦାବାଦ ହିଂସା ପ୍ରଭାବିତ ଅଞ୍ଚଳରେ ରାଜ୍ୟପାଳଙ୍କ ଆଗରେ ହାତ ଯୋଡ଼ି ପରିବାରକୁ ବଞ୍ଚାଇବାକୁ ନିବେଦନ କରିଛନ୍ତି ହିଂସା ପ୍ରଭାବିତ । ଧୁଲିଆନ ସମେତ ସର୍ବାଧିକ ହିଂସା ପ୍ରଭାବିତ ଅଞ୍ଚଳ ପରିଦର୍ଶନ କରିବା ପରେ ଉଦବେଗ ପ୍ରକାଶ କରିଛନ୍ତି ରାଜ୍ୟପାଳ ସିଭି ଆନନ୍ଦ ବୋଷ ।

ଗତ ଶୁକ୍ରବାର NHRC ଟିମ୍ ମାଲଦା ସ୍ଥିତ ଲାଲପୁର ହାଇସ୍କୁଲରେ ଆଶ୍ରୟ ନେଇଥିବା ହିନ୍ଦୁଙ୍କ ଦୁଃଖ ଶୁଣିଥିବାବେଳେ ଶନିବାର ମୁର୍ଶିଦାବାଦର ସମଶେରଗଞ୍ଜରେ ପହଞ୍ଚି ପୀଡିତ ପରିବାରକୁ ଭେଟିଛନ୍ତି ଜାତୀୟ ମହିଳା କମିଶନ ଅଧ୍ୟକ୍ଷା ଜୟା ରାହାତକର । ଖୁବଶୀଘ୍ର NHRC, NCW ରିପୋର୍ଟ ଦାଖଲ ହେବାକୁ ଯାଉଛି ।

ମୁର୍ଶିଦାବାଦ ହିଂସାକୁ ନେଇ ଟିଏମସି ସରକାରକୁ ଦାୟୀ କରିବା ସହ ରାଜ୍ୟରେ ରାଷ୍ଟ୍ରପତି ଶାସନ ଲାଗୁ କରିବାକୁ ଦାବି କରିଛି ବିଶ୍ୱ ହିନ୍ଦୁ ପରିଷଦ । କୋଲକାତା ସମେତ ଦେଶର ବିଭିନ୍ନ ସହରରେ ପରିଷଦ ପକ୍ଷରୁ ଜୋରଦାର ପ୍ରଦର୍ଶନ ହୋଇଛି । ହିଂସା ପରଠାରୁ ରାଜ୍ୟ ବିଜେପି ମଧ୍ୟ ମମତା ସରକାରଙ୍କ ବିରୋଧରେ ଗର୍ଜନ ଜାରି ରଖିଛି । ଭୋଟ ବ୍ୟାଙ୍କ ଲୋଭରେ ଟିଏମସି ସରକାର ବାଂଲାଦେଶୀ ରୋହିଙ୍ଗ୍ୟାଙ୍କୁ ବେଆଇନ ପ୍ରବେଶ ସୁଯୋଗ ଦେଇ ରାଜ୍ୟକୁ ବିପଦ ନିମନ୍ତ୍ରଣ କରିଛି । ମୁର୍ଶିଦାବାଦ ମୁସଲିମ ବହୁଳ ହେବା ପରଠାରୁ ହିନ୍ଦୁ ବିରୋଧୀ ଷଡ଼ଯନ୍ତ୍ର ଜାରି ରହିଥିବା କହିଛି ବିଜେପି ।