ଅର୍ଗସ ବ୍ୟୁରୋ: ସମୃଦ୍ଧ ଓଡ଼ିଶା ଗଠନ ଉପରେ ଡବଲ୍ ଇଞ୍ଜିନ୍ ସରକାରଙ୍କ ଫୋକସ୍ । ରାଜ୍ୟ ପାଇଁ ଅପାର ସମ୍ଭାବନାର ସୁଯୋଗ ଆଣିଛି ପ୍ରବାସୀ ଭାରତୀୟ ସମ୍ମିଳନୀ । ସମୃଦ୍ଧ ଓଡ଼ିଶା ଗଠନ ପାଇଁ 2.2 ଲକ୍ଷ କୋଟିର ପୁଞ୍ଜିନିବେଶ ଲକ୍ଷ୍ୟଧାର୍ଯ୍ୟ କରିଛନ୍ତି ସରକାର । ରାଜ୍ୟର ଭିତ୍ତିଭୂମି, ପର୍ଯ୍ୟଟନ, ଶିଳ୍ପ, ଶିକ୍ଷା ଆଦି କ୍ଷେତ୍ରରେ ନିବେଶ ପାଇଁ ପ୍ରବାସୀଙ୍କୁ ଆହ୍ହାନ ଦେଇଛନ୍ତି ମୁଖ୍ୟମନ୍ତ୍ରୀ । ବିକଶିତ ଓଡ଼ିଶା ଗଠନ ପାଇଁ ଆବଶ୍ୟକ ପ୍ରବାସୀ ଭାରତୀୟଙ୍କ ସହଯୋଗ ଓ ସହଭାଗିତା। ଏଥିପାଇଁ ପ୍ରବାସୀ ଭାରତୀୟ ସମ୍ମିଳନୀ ଅବସରରେ ପ୍ରବାସୀଙ୍କ ସହ ହୋଇଛି ସ୍ବତନ୍ତ୍ର ଆଲୋଚନା। ସ୍ବସ୍ତି ପ୍ରିମିୟମ୍ ହୋଟେଲରେ ଆୟୋଜିତ ସ୍ବତନ୍ତ୍ର ସମାବେଶରେ ସାମିଲ ହୋଇଥିଲେ ମୁଖ୍ୟମନ୍ତ୍ରୀଙ୍କ ସହ ବୈଦେଶିକ ବ୍ୟାପାର ମନ୍ତ୍ରୀ, ରାଜ୍ୟ ଶିଳ୍ପମନ୍ତ୍ରୀ ଓ ମୁଖ୍ୟ ଶାସନ ସଚିବ। ମୁଖ୍ୟମନ୍ତ୍ରୀ କହିଛନ୍ତି ଓଡ଼ିଶାରେ ରହିଛି ଭିତ୍ତିଭୂମି, ଶିଳ୍ପ, ଶିକ୍ଷା, ଗମନାଗମନ, ପର୍ଯ୍ୟଟନ ଆଦି କ୍ଷେତ୍ରରେ ବ୍ୟାପକ ବିନିଯୋଗ ସମ୍ଭାବନା । କିଛି ଦିନ ପରେ ଭୁବନେଶ୍ବରରେ ହେବ ଉତ୍କର୍ଷ ଓଡ଼ିଶା ସମ୍ମିଳନୀ ଯେଉଁଥିରେ ସାମିଲ ହେବାକୁ ପ୍ରବାସୀଙ୍କୁ ନିମନ୍ତ୍ରଣ କରିଛନ୍ତି ମୁଖ୍ୟମନ୍ତ୍ରୀ।