ଯାଜପୁରରେ ଡାଇରିଆ ଆତଙ୍କ । ଜିଲ୍ଲାରେ ୨ ଶହରୁ ଅଧିକ ସ୍ଥାନରେ ଖାଦ୍ୟ ସୁରକ୍ଷା ଟିମ୍ ଏବଂ କେନ୍ଦ୍ରୀୟ ଟିମ୍ ର ଚଢ଼ାଉ । ବିଭିନ୍ନ ପାଣି ପ୍ୟାକେଜିଂ କାରଖାନା, ଥଣ୍ଡା ତିଆରି କାରଖାନା ଉପରେ ରେଡ୍ । ୫ଟି ପାଣି ପାଉଚ୍ ପ୍ୟାକେଜିଂ କାରଖାନା ସହ ୧୧ଟି ହୋଟେଲକୁ ସିଲ୍ କଲା ଖାଦ୍ୟ ସୁରକ୍ଷା ବିଭାଗ ।

ସେପଟେ ଢେଙ୍କାନାଳ ଜିଲ୍ଲା ଭୁବନରେ ଡାଇରିଆ ଆତଙ୍କ। ୮୨ ଜଣ ଡାଇରିଆରେ ଆକ୍ରାନ୍ତ ହୋଇଥିବା ବେଳେ ୯ ଜଣ ଭୁବନ ଗୋଷ୍ଠି ସ୍ବାସ୍ଥ୍ୟକେନ୍ଦ୍ରରେ ଚିକିତ୍ସିତ ହେଉଛନ୍ତି। ଭୁବନ ଏନଏସିର ୨,୩ ୪,୯,୧୨ ଓ ୧୪ ଓ୍ବାର୍ଡ ସମେତ ଗ୍ରାମାଞ୍ଚଳରେ ସଂକ୍ରମଣ ବ୍ୟାପିଛି। ପ୍ରଶାସନ ପକ୍ଷରୁ ସମସ୍ତ ଷ୍ଟ୍ରିଟ ଫୁଡ ବନ୍ଦ କରାଯାଇଛି। ଏଥିସହ ହୋଟେଲ ଗୁଡିକରେ ସ୍ବଚ୍ଛତା ଓ ସୁସ୍ଥ ଖାଦ୍ୟ ବ୍ୟବସ୍ଥା ପାଇଁ ତାଗିଦ କରାଯାଇଛି। ଭୁବନ ଏନଏସି ପକ୍ଷରୁ ସବୁ ସ୍ଥାନରେ ବ୍ଲିଚିଙ୍ଗ ପାଉଡର ପକାଯିବା ସହ ଜନସ୍ବାସ୍ଥ୍ୟ ବିଭାଗ ପକ୍ଷରୁ ଫଟା ପାଇପ ଗୁଡିକୁ ମରାମତି କରାଯାଇଛି।

କଟକ ଜିଲ୍ଲାରେ ବ୍ୟାପିବାରେ ଲାଗିଛି ଝାଡ଼ାବାନ୍ତି । ଜିଲ୍ଲାର ବିଭିନ୍ନ ଅଞ୍ଚଳରେ ଆକ୍ରାନ୍ତଙ୍କ ସଂଖ୍ୟା ବଢିବାରେ ଲାଗିଛି। ଝିଙ୍କିରିଆରେ ୨୬ ଜଣ, ବାଙ୍କୀ ଘୋଳପୁରରେ ୪୦ ଜଣ, ଟାଙ୍ଗୀ ବ୍ଲକର ସଫା ପଞ୍ଚାୟତରେ ୧୭ ଜଣ ଓ ମାହାଙ୍ଗାରେ ୩୦ ଜଣ ଝାଡାବାନ୍ତିରେ ଆକ୍ରାନ୍ତ ହୋଇ ବିଭିନ୍ନ ହସ୍ପିଟାଲରେ ଭର୍ତ୍ତି ହୋଇଛନ୍ତି। ବଡମ୍ବା ନରସିଂହପୁରରେ ଗୋଟିଏ ପରିବାରର ୨ ରୁ ୩ ଜଣ ଆକ୍ରାନ୍ତ ହୋଇଥିବା ବେଳେ ଜଣେ ମହିଳାଙ୍କ ମୃତ୍ୟୁ ହୋଇଛି। କଟକ ଜିଲ୍ଲା ମୁଖ୍ୟ ଚିକିତ୍ସାଳୟରେ ପହଞ୍ଚି ସ୍ଥିତି ଅନୁଧ୍ୟାନ କରିଛନ୍ତି କେନ୍ଦ୍ରୀୟ ଟିମ୍‌।

ସେପଟେ ଘୋଳପୁର ଗାଁରେ ପହଁଚିଲେ ବାଙ୍କୀ ବିଜେପି ନେତା ତୁଷାରକାନ୍ତ ଚକ୍ରବର୍ତ୍ତୀଙ୍କ ସହ ବିଜେପିର ଏକ ଟିମ୍ । ଝାଡାବାନ୍ତି ଆକ୍ରାନ୍ତଙ୍କୁ ଭେଟି ଲୋକଙ୍କ ସ୍ୱାସ୍ଥ୍ୟାବସ୍ଥା ପଚାରି ବୁଝିଥିଲେ । ଗ୍ରାମ୍ୟ ପାନୀୟ ଜଳ ଯୋଗାଣ ପକ୍ଷରୁ ଗାଁରେ ବିଛା ଯାଇଥିବା ପାଇପ ଲାଇନରୁ ଆସୁଥିବା ପାଣିରେ ଡ୍ରେନେଜ ପାଣି ମିଶ୍ରିତ ହେଉଥିବା ଅଭିଯୋଗ ହୋଇଥିଲା । ତୁରନ୍ତ ପାଇପ ଲାଇନ ଗୁଡିକୁ ସଜାଡିବାକୁ ପ୍ରଶାସନିକ ଅଧିକାରୀଙ୍କ ସହ ଆଲୋଚନା କରିଥିଲେ ବିଜେପି ନେତା । ଯୁଦ୍ଧକାଳୀନ ଭିତ୍ତିରେ ବିଶୁଦ୍ଧ ପାଣି ଲୋକଙ୍କ ପାଖରେ ପହଁଚାଇବାକୁ ଗ୍ରାମ୍ୟ ପାନୀୟ ଜଳ ଯୋଗାଣ ବିଭାଗୀୟ ଅଧିକାରୀଙ୍କୁ ନିର୍ଦ୍ଦେଶ ଦେଇଥିଲେ ।

Argus News | argus news | Odisha Latest News, Breaking News, Trending News, Live TV