ଶିମିଳିପାଳରେ ବଢୁଛି ମହାବଳ ବାଘ ସଂଖ୍ୟା

ଶିମିଳିପାଳରେ ବଢୁଛି ମହାବଳ ବାଘ ସଂଖ୍ୟା । ଏନେଇ ସୂଚନା ଦେଲେ ବନ୍ୟପ୍ରାଣୀ ପିସିସିଏଫ୍ ପ୍ରେମ କୁମାର ଝା। ପିସିସିଏଫ୍ ଙ୍କ ସୂଚନା ଅନୁସାରେ ଏବେ ଶିମିଳିପାଳ ଅଭୟାରଣ୍ୟରେ ୪୦ ଟି ମହାବଳ ବାଘ ରହିଥିବା ବେଳେ ୬ ଟି ବାଘ ଶାବକ ରହିଛନ୍ତି। କ୍ୟାମେରା ଟ୍ରାପ୍‌ରୁ ଏହା ଜଣା ପଡ଼ିଛି।

ସେ ଆହୁରି ମଧ୍ୟ କହିଛନ୍ତି ଜିନତ୍ ଓ ଯମୁନା ବ୍ୟତୀତ ଶିମିଳିପାଳରେ ଥିବା ଆଡଲ୍ଟ ମହାବଳ ମଧ୍ୟରୁ ୧୩ଟି ପୁରୁଷ ମହାବଳ ଓ ୧୭ଟି ବାଘୁଣୀ ଅଛନ୍ତି । ଅନ୍ୟ ଦୁଇଟି ମହାବଳ ପୁରୁଷ ନା ବାଘୁଣୀ ତାହା ସ୍ପଷ୍ଟ ହୋଇପାରିନି । ସେହିପରି ଶିମିଳିପାଳରେ ଥିବା ମହାବଳ ମଧ୍ୟରୁ ୧୮ ଟି କଳା ମହାବଳ ଅଛି । ଆଗାମୀ ୧୦ ବର୍ଷ ମଧ୍ୟରେ ଏ ସଂଖା ୧୦୦ କୁ ପହଞ୍ଚାଇବାକୁ ଲକ୍ଷ୍ୟ ରଖିଛି ବନ ବିଭାଗ।

ସୂଚନାଯୋଗ୍ୟ - ଭାରତରେ ବାଘ ମାନଙ୍କୁ ସୁରକ୍ଷା ଦେବା ଓ ସଂଖ୍ୟା ବୃଦ୍ଧି କରିବା ପାଇଁ ଭାରତ ସରକାର ୧୯୭୩ ମସିହାରେ ଆରମ୍ଭ କରିଥିଲେ ପ୍ରୋଜେକ୍ଟ ଟାଇଗର। ୨୦୨୩ ର ତଥ୍ୟ ଅନୁସାରେ ଭାରତରେ ୩ ହଜାରରୁ ଅଧିକ ବାଘ ରହିଛନ୍ତି। ସାଧାରଣତ ବାଘଙ୍କ ପାଦ ଚିହ୍ନ ଓ କ୍ୟାମେରା ଦ୍ବାରା ବାଘ ଗଣନା ହୋଇଥାଏ। ଏବେ କ୍ୟାମେରା ଟ୍ରାପ୍‌ କରି ଅତ୍ୟାଧୁନିକ ପ୍ରଣାଳିରେ ବାଘ ଗଣନା କରାଯାଉଛି।