ଚୁଆ ମେଣ୍ଟାଉଛି ଶୋଷ

ଆଦିବାସୀ ଅଧ୍ୟୁଷିତ ମୟୂରଭଞ୍ଜ ଜିଲ୍ଲାର ଯଶିପୁର ବ୍ଳକର ଉପାନ୍ତ ଅଞ୍ଚଳ କାଳିଆଣି । ଏଠାରେ ପ୍ରାୟ ୭୦ରୁ ଉର୍ଦ୍ଧ ଆଦିବାସୀ ପରିବାର ବସବାସ କରନ୍ତି । କିନ୍ତୁ ବିଭିନ୍ନ ସମସ୍ୟା ଭିତରେ ଯୁଝି ହେଉଛନ୍ତି ଗ୍ରାମବାସୀ । ଘରକୁ ଘର ଷ୍ଟାଣ୍ଡ ପୋଷ୍ଟ ଲାଗିଛି, ପାଇପ ଲାଇନ୍ ବିଛା ସରିଛି, ହେଲେ ଶୁଦ୍ଧ ପାନୀୟ ଜଳ ଗ୍ରାମବାସୀଙ୍କ ପାଇଁ ପାଲଟିଛି ସାତ ସାପନ । ଯଦିଓ ଗାଁରେ ସୋଲାର ପାଣି ଟାଙ୍କି ବସିଛି, ତାହା ମଧ୍ୟ କିଛି ଦିନ ଚାଲିବା ପରେ ଅଚଳ ହୋଇ ପଡିଛି । ସେଥିରୁ ମଧ୍ୟ ପାଣି ବାହାରୁ ନାହିଁ । ଗାଁରେ ଦୁଇ ଦୁଇଟି ନଳକୂଅ ରହିଛି, ତାହା ବି ଅଚଳ । ତେଣୁ ନଦୀ ଓ ନାଳ କୂଳର ଚୁଆ ପାଣି ମେଣ୍ଟାଉଛି ଶୋଷ । ଏଠି ପାନୀୟ ଯୋଗାଣ ମିଶନ ଫେଲ୍ ମାରିଛି । ଆଗକୁ ପୁଣି ଖରା ଦିନ ଆସୁଛି,ଏହା ପୂର୍ବରୁ ପାନୀୟ ଜଳ ସମସ୍ୟାକୁ ଦୂର ନ କରାଗଲେ ସ୍ଥିତି ଜଟିଳ ହେବ ବୋଲି ପ୍ରକାଶ କରିଛନ୍ତି ଗ୍ରାମବାସୀ ।

ଏ ତ ଥିଲା ପାନୀୟ ଜଳର ସମସ୍ୟା । ହେଲେ ଗାଁରେ ଅନେକ ସମସ୍ୟା ରହିଛି । ଏକାଧିକ ପରିବାର ଆଜି ବି ଆବାସ ଯୋଜନାରୁ ବଞ୍ଚିତ । କାହା ଘର ଉପରେ ପଲିଥିନ ଟଣା ହୋଇଛି ତ ପୁଣି କାହା ଘରର କାନ୍ଥରେ କାଠର ବାଡ ଦିଆଯାଇଛି । ଖାଲି ଏତିକି ନୁହେଁ, ଗାଁରେ ଅନେକ ବୟସ୍କ ଭତ୍ତା ପାଇବାରୁ ବଞ୍ଚିତ ଅଛନ୍ତି । ବହୁବାର ଅଭିଯୋଗ ପରେ ବି ସମସ୍ୟାର ସମାଧାନ ପରିବର୍ତ୍ତେ କେବଳ ମିଳିଛି ପ୍ରତିଶ୍ରୁତି ।

୨୪ ବର୍ଷର ସ୍ଥିର ବିଜେଡି ସରକାରର ଶାସନ କାଳରେ ଗାଁକୁ ପହଞ୍ଚି ପାରିଲା ନାହିଁ ମୌଳିକ ସୁବିଧା । ଲୋକେ ନାହିଁ ନଥିବା ଅସୁବିଧାର ସମ୍ମୁଖୀନ ହେଉଛନ୍ତି । ଏ ସମସ୍ୟା ବିଷୟରେ ଆମେ ଯଶିପୁର ଗୋଷ୍ଠୀ ଉନ୍ନୟନ ଅଧିକାରୀଙ୍କ ସହ ଆଲୋଚନା କରିଥିଲୁ, ସେ କହିଛନ୍ତି ଯଥାଶୀଘ୍ର ଏ ସବୁ ସମସ୍ୟା ଉପରେ ଧ୍ୟାନ ଦେଇ ସମାଧାନ କରିବୁ । ତେବେ ଯଶିପୁରର ଉପାନ୍ତ କାଳିଆଣି ଗାଁର ସମସ୍ୟା କେବେ ଦୂର ହେଉଛି ଓ ପ୍ରଶାସନର ଶୁଭ ଦୃଷ୍ଟି କେବେ ପଡୁଛି ତାହା ଦେଖିବାକୁ ବାକି ରହିଲା ।