ଦୀର୍ଘ ପ୍ରତିକ୍ଷାର ହେବ ଅନ୍ତ । ଖୁବଶୀଘ୍ର ଚିଲିକା ଉପରେ ନିର୍ମାଣ ହେବ ସେତୁ । ସେତୁ ନିର୍ମାଣ ପାଇଁ ମିଳିଲା ପରିବେଶ ମଞ୍ଜୁରୀ । ଚିଲିକା କୃଷ୍ଣପ୍ରସାଦ ବ୍ଲକର ୧୪ଟି ପଞ୍ଚାୟତର ଲୋକଙ୍କୁ ମିଳିବ ଯନ୍ତ୍ରଣାରୁ ମୁକ୍ତି ।

ଚିଲିକା ଉପରେ ନିର୍ମାଣ ହେବ ଅତ୍ୟାଧୁନିକ ସେତୁ। ସେତୁ ନିର୍ମାଣ ଲାଗି ମିଳିଲା ଗ୍ରିନ୍ ସିଗନାଲ୍। ପରିବେଶ ଜଙ୍ଗଲ ଏବଂ ଜଳବାୟୁ ପରିବର୍ତନ ମନ୍ତ୍ରଣାଳୟ ବିଭାଗ ପକ୍ଷରୁ ମିଳିଲା ମଞ୍ଜୁରୀ । ଭାରତୀୟ ଜାତୀୟ ରାଜପଥ ପ୍ରାଧିକାରଣ ଦ୍ବାରା ସାତପଡ଼ା-କୃଷ୍ଣପ୍ରସାଦ ବ୍ଲକ ମଧ୍ୟରେ ଚିଲିକା ଉପରେ ୭.୭୪୦ କିଲୋମିଟର ଲମ୍ବରେ ମିସିଂ ଲିଙ୍କ ନିର୍ମାଣ ହେବ ।

ହ୍ରଦ ଉପରେ ଦୁଇ ଲେନ୍ ବିଶିଷ୍ଟ ବୃହତ ସେତୁ ନିର୍ମାଣ ପାଇଁ ମଞ୍ଜୁର କରିଛନ୍ତି କେନ୍ଦ୍ର ପରିବେଶ ମନ୍ତ୍ରଣାଳୟର ବିଶେଷଜ୍ଞ ମୂଲ୍ୟାଙ୍କନ କମିଟି । ଚିଲିକା ମଝିରେ ଥିବା କୃଷ୍ଣପ୍ରସାର ବ୍ଲକର ୧୪ଗୋଟି ପଞ୍ଚାୟତ ବାସୀଙ୍କୁ ଯନ୍ତ୍ରଣାରୁ ମିଳିବ ମୁକ୍ତି। ପରିବେଶ ମଞ୍ଜୁରୀକୁ କୃଷ୍ଣପ୍ରସାଦବାସୀ ସ୍ବାଗତ କରିଛନ୍ତି ।

ଚିଲିକା ଉପରେ ହେବାକୁ ଥିବା ସେତୁ ଦେଇ ଭାରି ଯାନ ଚଳାଚଳ ଉପରେ କଟକଣା ରହିବ । ଏନଏଚଏଆଇ ପରିବେଶ ମନ୍ତ୍ରାଳୟକୁ ଅବଗତ କରାଇଛି ଯେ ଚିଲିକା ଉପରେ ବ୍ରିଜକୁ ୨ ଲେନରୁ ଅଧିକ କରାଯିବ ନାହିଁ। ଦିନକୁ ଅଳ୍ପ ଗାଡି ଛଡା ଯିବ। ସନ୍ଧ୍ୟା ୭ ରୁ ସକାଳ ୬ ଯାଏଁ ସେତୁ ଉପରେ ଗାଡି ଚଳାଚଳ ସମ୍ପୂର୍ଣ ବନ୍ଦ ରହିବ।

ସେତୁ ନିର୍ମାଣ ହେଲେ ସାତପଡା- କୃଷ୍ଣପ୍ରସାଦ ବ୍ଲକକୁ ସଂଯୋଗ ହେବ । କେନ୍ଦ୍ର ସଡକ ପରିବହନ ମନ୍ତ୍ରୀ ନିତିନ ଗଡକରୀଙ୍କ ପ୍ରସ୍ତାବିତ ସେତୁ ନିର୍ମାଣ ଲାଗି ୫୦୦ କୋଟି ଟଙ୍କା ମୂଲ୍ୟରେ ୮ କିମି ଦୈର୍ଘ୍ୟର ୨ଟି ପ୍ରମୁଖ ସେତୁ ନିର୍ମାଣ ନିମନ୍ତେ ଡିପିଆର ସମ୍ପୁର୍ଣ୍ଣ ହେବ । ମୁଖ୍ୟମନ୍ତ୍ରୀ ମୋହନ ଚରଣ ମାଝି କହିଛନ୍ତି, ଖୁବ୍‌ଶୀଘ୍ର ଏହି କାର୍ଯ୍ୟ ଆଗକୁ ବଢ଼ିବ । କେନ୍ଦ୍ର ସରକାର ଏବଂ ରାଜ୍ୟ ସରକାରଙ୍କ ମଧ୍ୟରେ ଏନେଇ ଆଲୋଚନ ହୋଇଛି । ଆଗାମୀ ଦିନର ଏହି କାର୍ଯ୍ୟକୁ ତ୍ବରାନିତ କରାଯିବ।

Argus News | argus news | -Argusnews Home: Odisha Latest News, Breaking News, Trending News, Live TV and more