ରୂପା ଛାଉଣୀ ହେବ ଶ୍ରୀମନ୍ଦିର ରତ୍ନଭଣ୍ଡାରର ମୁଖ୍ୟ ଦ୍ଵାର ଓ ଖିଲଣ । ଟେଣ୍ଡର ଡାକିଛି ଶ୍ରୀମନ୍ଦିର ପ୍ରଶାସନ । ଦୁଇ ମାସ ମଧ୍ୟରେ ଶେଷ ହେବ କାମ । ବଦଳିବ ରତ୍ନଭଣ୍ଡାର ମୁଖ୍ୟ ପ୍ରବେଶ ପଥ ଦ୍ୱାର ଓ ଖିଲଣ । ପୂର୍ବରୁ ଥିବା କାଠ କବାଟ କୁ ବଦଳାଯାଇ ଲାଗିବ ବର୍ମା ଶାଳ କାଠରେ ନିର୍ମିତ ଦ୍ଵାର । ବଦଳିବ ପୁରୁଣା ଗ୍ରୀଲ୍। ଲାଗିବ ନୂଆ ଷ୍ଟେନ୍ ଲେସ ଷ୍ଟିଲ ଗ୍ରୀଲ । ଦୁଇ ମାସ ଭିତରେ କାମ ସାରିବାକୁ ଟେଣ୍ଡରରେ ନିର୍ଦ୍ଦେଶ ରହିଛି । କବାଟ ଓ ଗ୍ରୀଲ୍ ପାଇଁ ୯ ଲକ୍ଷ ୩୭ ହଜାର ଖର୍ଚ୍ଚ ମୂଲ୍ୟ ଧାର୍ଯ୍ୟ ହୋଇଛି । ରଥଯାତ୍ରା ମଧ୍ୟରେ ରତ୍ନ ଭଣ୍ଡାର ମରାମତି ଓ ଆନୁସଙ୍ଗିକ କାମ ଜାରି ରହିବ ।

ପରେ ପରେ ରତ୍ନଭଣ୍ଡାର ମୁଖ୍ୟ ଦ୍ଵାର ବଦଳିବା ସହ ରୂପା ଛାଉଣୀ ହେବ । ପୂର୍ବରୁ ପତିତପାବନ ମନ୍ଦିର, ବିଭିନ୍ନ ଦ୍ୱାର ରୂପା ଛାଉଣୀ ହୋଇ ସାରିଛି । ଏବେ ଟେଣ୍ଡର ହେବା ପରେ ପ୍ରଭା ଓ ଅନ୍ୟାନ୍ୟ ଅଂଶ ମଧ୍ୟ ଆଗକୁ ରୂପା ଛାଉଣୀ ହେବ । ତେବେ ରତ୍ନ ଭଣ୍ଡାର ଛାଉଣୀ ପରେ ଖୁବ୍ ଶୀଘ୍ର ଗଣତି ମଣତି କାର୍ଯ୍ୟ କରିବାକୁ ଦାବି କରିଛନ୍ତି ଶ୍ରୀମନ୍ଦିର ସେବକ ।