ସରିଲା ମହାପ୍ରଭୁ ଲିଙ୍ଗରାଜଙ୍କ ବିବାହ, ଆଜି ଶୀତଳଷଷ୍ଠୀ

ସରିଲା ମହାପ୍ରଭୁ ଲିଙ୍ଗରାଜଙ୍କ ବିବାହ। ମନ୍ଦିରରେ ପ୍ରବେଶ କରିଛନ୍ତି ଦେବ ଦମ୍ପତି। ବରଯାତ୍ରୀ ପଟୁଆର ନେଇ ମହାପ୍ରଭୁ ଶ୍ରୀଲିଙ୍ଗରାଜ ଶ୍ବଶୁର ଘର କେଦାରଗୌରୀ ମନ୍ଦିର ଅଭିମୁଖେ ବାହାରିଥିଲେ ଓ ସେଠାରେ ଯଥାରୀତି ମା’ ପ‌ାର୍ବତୀଙ୍କ ସହ ତାଙ୍କ ଶୁଭପରିଣୟ ଅନୁଷ୍ଠିତ ହୋଇଥିଲା। ମା’ଙ୍କ ପାଣିଗ୍ରହଣ ଉତ୍ସବ ପରେ ଜ୍ବାଇଁ ଓ ବରଯାତ୍ରୀଙ୍କୁ ପାରମ୍ପରିକ ରୀତିରେ ଶ୍ବଶୁର ଘର ପକ୍ଷରୁ ଅଭ୍ୟର୍ଥନା ଦିଆଯାଇଥିଲା। ବାଜା, ବାଣ, ରୋଷଣୀ ଓ ହୁଳହୁଳିରେ ପ୍ରକମ୍ପିତ ହୋଇପଡିଥିଲା ପୂରା ପରିବେଶ ।

ପ୍ରଭୁଙ୍କ ବରଯାତ୍ରା ଦୃଶ୍ୟ ଓ ପରିବେଶ ବେଶ୍ ଭକ୍ତିମୟ ଓ ଆବେଗପୂର୍ଣ୍ଣ ଥିଲା। ବଢ଼େଇବାଙ୍କ ଛକ, ତିନିମୁଣ୍ଡିଆ ଛକ ଓ ଏକାମ୍ର ବନ ଦେଇ ବରଯାତ୍ରୀ ଦଳ ଯାଉଥିବା ‌ବେଳେ ଘର ବାରଣ୍ଡାରେ ଓ ଛାତରେ ଠିଆ ହୋଇ ସ୍ଥାନୀୟ ଲୋକେ ଏହି ଦିବ୍ୟ ଦୃଶ୍ୟ ଦେଖିବା ମଉକା ଛାଡ଼ିନଥିଲେ। କେଦାରଗୌରୀ ମନ୍ଦିରଠାରେ ଉପସ୍ଥିତ ସେବାୟତମାନେ ବର ଓ ବରଯାତ୍ରୀଙ୍କୁ ଭବ୍ୟ ସ୍ବାଗତ ମନ୍ଦିର ଭିତରକୁ ପାଛୋଟି ନେଇଥିଲେ। ପରେ ବିଧି ମୁତାବକ ବେଦୀରେ ବରକନ୍ୟାଙ୍କ ହାତଗଣ୍ଠି ପଡ଼ିଥିଲା ଓ ବନ୍ଦାପନା କାର୍ଯ୍ୟ ବି ସମାହିତ ହୋଇଥିଲା। ହଜାର ହଜାର ଶ୍ରଦ୍ଧାଳୁ ଏହି ଯାତ୍ରାରେ ସାମିଲ୍ ହୋଇଥିଲେ। ଆଜି ଶୀତଳଷଷ୍ଠୀ ଅବସରରେ ଦେବଦମ୍ପତି ଶ୍ବଶୁର ଘରୁ ମେଲାଣି ନେଇ ସ୍ବଗୃହ ପ୍ରତ୍ୟାବର୍ତ୍ତନ କରିବେ।