ବଲାଙ୍ଗିର ଜିଲ୍ଲା ତୁରେକେଲା ବ୍ଲକ କୁଇବାହାଲ ପଂଚାୟତର ଲାମୀଠୁଟା ଗାଁ । ଜଙ୍ଗଲ ରାସ୍ତାରେ ଯିବାକୁ ପଡେ ଏହି ଗାଁକୁ । ଗ୍ରୀଷ୍ମ ଋତୁରେ କିଛି ମାସ ସୁରୁଖୁରୁରେ ଚଲିଯାଏ, ବର୍ଷା ମାସର କଥା ତ ନ କହିବା ଭଲ । ରାସ୍ତା ନ ଥିବାରୁ ଗାଁକୁ ଆସି ପାରେନି ଆମ୍ବୁଲାନ୍ସ, ଫଳରେ ରୋଗୀ ବା ଗର୍ଭବତୀଙ୍କୁ ଭାରାରେ ବୋହି ନେଇଥାନ୍ତି ସମ୍ପର୍କୀୟ। କେତେବେଳେ ଗର୍ଭବତୀଙ୍କର ରାସ୍ତାରେ ପ୍ରବସ କରି ଦେଉଥିବା ବେଳେ କେବେ କେବେ ଲୋକଙ୍କ ଜୀବନ ଚାଲିଯାଉଥିବା ମଧ୍ୟ ଅଭିଯୋଗ କରିଛନ୍ତି ଗ୍ରାମବାସୀ । ଗାଁରେ ସ୍କୁଲ କି ଅଙ୍ଗନୱାଡି କେନ୍ଦ୍ର ନାହିଁ । ଫଳରେ ୪/୫ କିମି ଦୂରରେ ଥିବା ସ୍କୁଲକୁ ଯାଉଛନ୍ତି ପିଲା । କିନ୍ତୁ ପ୍ରତ୍ୟେକ ଦିନ ଜଙ୍ଗଲି ରାସ୍ତା ଦେଇ ଯାଉଥିବାରୁ ଭୟ ମଧ୍ୟ କରୁଛନ୍ତି ।

କେବଳ ସେତିକି ନୁହେଁ, ଏଠାରେ ପିଇବା ପାଣି ପାଇଁ ଲୋକେ ଡହଳ ବିକଳ । ଚୁଆ ପାଣି ହିଁ ଏମାନଙ୍କ ସାହା ଭରସା । ଗାଁରେ ବିଜୁଳି ନ ଥିବାରୁ ଅନ୍ଧାରରେ ଦିନ କାଟୁଛନ୍ତି ଓ ଡିବିର ଆଲୁଅରେ ପାଠ ପଢୁଛନ୍ତି ପିଲା । ଗାଁରେ ସ୍ୱାସ୍ଥ୍ୟ ସେବା ମଧ୍ୟ ଫେଲ ମାରିଛି । ଗାଁର ଲୋକେମାନେ ବିଭିନ୍ନ ଜଙ୍ଗଲ ଜାତ ଦ୍ରବ୍ୟ ବିକ୍ରି କରି ପରିବାର ପୋଷଣ କରନ୍ତି । ଏ ସମ୍ପର୍କରେ ଗାଁ ଲୋକ ଜନପ୍ରତିନିଧିଙ୍କଠାରୁ ଆରମ୍ଭ କରି ପ୍ରଶାସନିକ ଅଧିକାରୀଙ୍କୁ ଜଣାଇଛନ୍ତି ହେଲେ ଗାଁ ପ୍ରତି କେହି ଦୃଷ୍ଟି ଦେଉନଥିବା ଅଭିଯୋଗ କରିଛନ୍ତି । ସେପଟେ ଏ ଦିଗରେ ଆବଶ୍ୟକ ପଦକ୍ଷେପ ନିଆଯିବ ବୋଲି ପ୍ରତିଶ୍ରୁତି ଦେଇଛନ୍ତି ଟିଟିଲାଗଡ଼ ଉପଜିଲ୍ଲାପାଳ ।