କଟକ: ସବୁଠି ସ୍ବାସ୍ଥ୍ୟବସ୍ଥାର ନଗ୍ନ ଚିତ୍ର । ଗତ ୨୪ ବର୍ଷର ସ୍ଥିର ସରକାର ଡାକ୍ତରଖାନା ପାଇଁ କୋଠା ତ କରିଦେଲେ, ହେଲେ ଡାକ୍ତର ନିଯୁକ୍ତି କରିବାକୁ ଭୁଲିଗଲେ । କେଉଁଠି ରୋଗୀଙ୍କ ପାଇଁ ଡାକ୍ତର ନାହାନ୍ତି ତ ଆଉ କେଉଁଠି ସ୍ବାସ୍ଥ୍ୟ ଉପକରଣ ନାହିଁ । ଜିଲ୍ଲା ମୁଖ୍ୟ ଚିକିତ୍ସାଳୟ, ଉପଖଣ୍ଡ ଚିକିତ୍ସାଳୟ, ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ର ଓ ପ୍ରାଥମିକ ସ୍ବାସ୍ଥ୍ୟକେନ୍ଦ୍ର ସବୁଠି ରହିଛି ସମସ୍ୟା । ଆଠଗଡ଼ ଅଞ୍ଚଳରେ ସାମାନ୍ୟ ଝାଡ଼ାବାନ୍ତି ପାଇଁ ବି ରୋଗୀଙ୍କୁ ଏସ୍‌ସିବି ମେଡିକାଲକୁ ସ୍ଥାନାନ୍ତର କରାଯାଏ । ଆଉ ଗୁରୁତର ରୋଗ ହେଲେ ଭଗବାନ ଭରସାରେ ରୁହନ୍ତି ଲୋକେ ।

ଆଠଗଡ଼ ପରି ବାଙ୍କୀରେ ବି ସମାନ ସ୍ଥିତି । ଏଠି ବି ରୋଗୀଙ୍କ ପାଇଁ ପର୍ଯ୍ୟାପ୍ତ ଡାକ୍ତର ନାହାନ୍ତି । ରୋଗୀଙ୍କୁ ମିଳିପାରୁନି ଉଚିତ୍ ସ୍ବାସ୍ଥ୍ୟସେବା । ସାଲେପୁର, ବଡ଼ମ୍ବା ଅଞ୍ଚଳରେ ବି ସ୍ବାସ୍ଥ୍ୟସେବାର ନଗ୍ନ ଚିତ୍ର ଦେଖିବାକୁ ମିଳିଛି । କଟକ ଜିଲ୍ଲା ପ୍ରଶାସନ ତରଫରୁ ମିଳିଥିବା ତଥ୍ୟ ଅନୁସାରେ ଜିଲ୍ଲାର ଜନସଂଖ୍ୟା ୨୬ ଲକ୍ଷରୁ ଅଧିକ । ଜିଲ୍ଲାରେ ୧୪ ଟି ବ୍ଲକ ଥିବାବେଳେ ୯ଟି ବିଧାନସଭା ନିର୍ବାଚନ ମଣ୍ଡଳୀ ରହିଛି । ଯେଉଁଥିରେ ଜିଲ୍ଲା ମୁଖ୍ୟ ଚିକିତ୍ସାଳୟ, ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ର, ପ୍ରାଥମିକ ସ୍ବାସ୍ଥ୍ୟ କେନ୍ଦ୍ର ରହିଛି । ସୂଚନା ମୁତାବକ- ଜିଲ୍ଲାରେ ମୋଟ ୭୫୩ଟି ଡାକ୍ତର ପଦବୀ ଥିବାବେଳେ ଖାଲି ପଡ଼ିଛି ୪୮୮ ।

ଉଭୟ ପୁରୁଷ ଓ ମହିଳା ସ୍ବାସ୍ଥ୍ୟ କର୍ମୀଙ୍କ ପଦବୀ ସଂଖ୍ୟା ୬୭୦ ଥିବାବେଳେ, ଖାଲି ପଡ଼ିଛି ୮୨ ପଦବୀ । ନର୍ସିଂ ଅଫିସର ପଦବୀ ସଂଖ୍ୟା ୬୬୪ ଥିବା ବେଳେ ଖାଲି ପଡ଼ିଛି ୧୧୧ । ଲ୍ୟାବ ଟେକ୍ନିସିଆନ ପଦବୀ ସଂଖ୍ୟା ୪୯ ଥିବାବେଳେ ଖାଲି ପଡ଼ିଛି ୧୨ଟି । ନୂତନ ସରକାର କଟକ ଜିଲ୍ଲାର ସ୍ବାସ୍ଥ୍ୟ ବ୍ୟବସ୍ଥାରେ ସୁଧାର ଆଣିବେ ବୋଲି ଆଶା କରିଛନ୍ତି କଟକ ଜିଲ୍ଲାବାସୀ ।

ଅଧିକ ପଢ଼ନ୍ତୁ ଓଡିଶା ଖବର:

Argus News | argus news | Odisha Latest News, Breaking News, Trending News, Live TV