Argus News - ପୋଲର ଶେଷ ମୁଣ୍ଡରେ ୧୦ ଫୁଟର ଗାଢ଼

ଚାନ୍ଦବାଲି ସମେତ ଭଦ୍ରକ, କେନ୍ଦ୍ରାପଡ଼ା ଏବଂ ଯାଜପୁର ଭଳି ଜିଲ୍ଲାକୁ ସଂଯୋଗ କରୁଥିବା ଏହି ସେତୁ ଏବେ ବିପଦ ସଙ୍କୁଳ ଅବସ୍ଥାରେ । ଗେମନ ସେତୁ ମଝିରେ ଓ ଦୁଇ ପଟରେ 8ରୁ 10 ଇଂଚ ଦବିଗଲାଣି । ପୋଲର ଶେଷ ମୁଣ୍ଡରେ ବି 10 ଫୁଟର ଗାଢ ହୋଇଛି । ଭାରିଯାନ ଯାତାୟତ ସମୟରେ ଦୋହଲୁଛି ପୋଲ । ଦୈନିକ ଯାତ୍ରିବାହୀ ବସ୍ ସହ ହଜାର ହଜାର ଗାଡ଼ି ଯାତାୟତ କରେ ଏହି ପୋଲ ଉପରେ । ସମସ୍ତ କଳକାରଖାନା, ବ୍ୟବସାୟ ପ୍ରତିଷ୍ଠାନ ସହିତ ସାଧାରଣ ଯାତ୍ରୀମାନେ ଏହି ସେତୁ ଉପରେ ନିର୍ଭରଶୀଳ । ଏହି ସେତୁ ଉପରେ ଯାତାୟତ କରୁଥିବା ଗାଡ଼ି ଏବଂ ଯାତ୍ରୀମାନଙ୍କ ସୁରକ୍ଷା ଦିଗରେ ପ୍ରଶାସନିକ ନିରବତାକୁ ନେଇ ଅଂଚଳବାସୀ ଅସନ୍ତୋଷ ପ୍ରକାଶ କରିଛନ୍ତି ।

ଏହି ସେତୁର ସୁରକ୍ଷା ପାଇଁ ୨୦୧୫ ମସିହାରୁ ବିଭିନ୍ନ ସଙ୍ଗଠନ ଓ ଜନ ସାଧାରଣଙ୍କ ପକ୍ଷରୁ ଦାବି ହୋଇ ଆସୁଛି । ହେଲେ ଏ ଯାଏଁ କୌଣସି ପଦକ୍ଷପ ନିଆଯାଇନାହିଁ । ମରାମତି ଅଭାବରୁ ଦିନକୁ ଦିନ ଏହାର ବେରିଙ୍ଗ ଦବିବାକୁ ଲାଗିଛି । ଏପଟେ ସମ୍ପୃକ୍ତ ଆର ଏଣ୍ଡ ବି ବିଭାଗ ପୋଲ ଦବିବା ପରେ ଏକ୍ସପର୍ଟ ଟିମକୁ ଆଣି ପୋଲର ସ୍ଥିତ ଆକଳନ କରିଥିଲା । ପୋଲ ଉପରେ ବିପଦ ଆସି ସାରିଛି ବୋଲି ରିପୋର୍ଟ ପ୍ରଦାନ ମଧ୍ୟ କରିଛି । ହେଲେ ଏ ଯାଏ ମରାମତି କାର୍ଯ୍ୟ ଆରମ୍ଭ ହୋଇନି ।

ଚାନ୍ଦବାଲି ବୈତରଣୀ ସେତୁ ୨୦୦୮ ମସିହା ମେ ୨୬ ତାରିଖ ଦିନ ତତ୍କାଳୀନ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଦ୍ଵାରା ଉଦ୍‌ଘାଟନ ହୋଇଥିଲା । ୨୫୦ ମିଟର ଲମ୍ବ ବିଶିଷ୍ଟ ଏହି ସେତୁ ୫୦ କୋଟିର ବ୍ୟୟ ଅଟକଳରେ ରାଜ୍ୟ ସରକାର ଓ ଗେମନ୍ ଇଣ୍ଡିଆ ମଧ୍ୟରେ ଚୁକ୍ତି ହୋଇ ନିର୍ମାଣ କରାଯାଇଥିଲା । ଯାହାର ଅବସ୍ଥା ଆଜି ଏମିତି ।