ଏଥର ଧାନ କିଣାରେ ରେକର୍ଡ କରିଛନ୍ତି ସରକାର । ପୂର୍ବରୁ ଏତେ ପରିମାଣର ଧାନ କେବେ କିଣାଯାଇନଥିଲା । ଏଥର କଟ୍‌ନୀ ଛଟ୍‌ନୀ ବି ବିଶେଷ ଦେଖିବାକୁ ମିଳିନି । କାହାର ବି ଲାପ୍ସ ହୋଇନି ଟୋକନ ।

ରାଜ୍ୟରେ ଆଜି ସରିବ ଧାନ କିଣା । ଚଳିତ ବର୍ଷ ରେକର୍ଡ ସଂଖ୍ୟକ ଧାନ କିଣା ହୋଇଛି । ୭୭ ଲକ୍ଷ ମେଟ୍ରିକ୍ ଟନ ଧାନ କିଣିବା ନେଇ ଲକ୍ଷ୍ୟ ରଖିଥିଲେ ରାଜ୍ୟ ସରକାର । ବର୍ତ୍ତମାନ ସୁଦ୍ଧା ପାଖାପାଖି ୭୪ ଲକ୍ଷ ମେଟ୍ରିକ୍ ଟନ ଧାନ କିଣା ସରିଛି । ଏନେଇ ସୂଚନା ଦେଇଛନ୍ତି ଖାଦ୍ୟ ଯୋଗାଣ ଖାଉଟି କଲ୍ୟାଣ ମନ୍ତ୍ରୀ କୃଷ୍ଣଚନ୍ଦ୍ର ପାତ୍ର ।

ଗତବର୍ଷ ସରକାର ୫୮ ଲକ୍ଷ ମେଟ୍ରିକ୍ ଟନ୍ ଧାନ କିଣିଥିଲେ । ଚଳିତ ବର୍ଷ ମୋଟ ୧୭ ଲକ୍ଷ ୫୦ ହଜାର ଚାଷୀ ପଞ୍ଜିକରଣ କରିଥିଲେ । ସେଥିମଧ୍ୟରୁ ୧୭ ଲକ୍ଷ ଚାଷୀଙ୍କ ଧାନ କିଣା ସରିଛି । କୌଣସି ଚାଷୀଙ୍କ ଟୋକନ୍ ଲାପସ୍ ହୋଇନାହିଁ । ଗତ ସରକାରରେ ୪ ଲକ୍ଷ ଚାଷୀ ଧାନ ବିକିବାରୁ ବଞ୍ଚିତ ରହିଥିଲେ । ଆସନ୍ତା ବର୍ଷ ଆହୁରି ଅଧିକ ଧାନ କିଣାଯିବ। ଯେଉଁ ପ୍ୟାକ୍ସ କିମ୍ବା ଲ୍ୟାମ୍ପସ ଦୁର୍ନୀତି କରିବ ତାକୁ ଧାନ କିଣାରୁ ବାଦ ଦିଆଯିବ ବୋଲି ମନ୍ତ୍ରୀ କହିଛନ୍ତି ।

ଗତ ବିଜେଡି ସରକାର କଟନୀ ଛଟନୀକୁ ଏକ ଆଇନ ଭାବେ କାର୍ଯ୍ୟକାରୀ କରିଥିଲେ । ମାତ୍ର ଚଳିତ ଥର ଏହା ବିଶେଷ ଭାବେ ଦେଖିବାକୁ ମିଳିନି । ଯାହା ବି ଅଭିଯୋଗ ଆସିଛି ସବୁର ତୁରନ୍ତ ସମାଧାନ ହୋଇଛି । ଆଗାମୀ ଦିନରେ ସମସ୍ତ ମଣ୍ଡିର ଭିତ୍ତିଭୂମି ସୁଦୃଢ଼ କରାଯିବ । ସବୁ ମଣ୍ଡିକୁ ମଡେଲ ମଣ୍ଡି କରାଯିବ ବୋଲି କହିଛନ୍ତି ଖାଦ୍ୟ ଯୋଗାଣ ଖାଉଟି କଲ୍ୟାଣ ମନ୍ତ୍ରୀ କୃଷ୍ଣଚନ୍ଦ୍ର ପାତ୍ର ।