ଭୁବନେଶ୍ୱର: ଆଦିବାସୀ ଗାଁ । ନୁଆଁଣିଆ ଚାଳଘର, ତା ଭିତରେ ଆଦିବାସୀଙ୍କ ଘରକରଣା ଜିନିଷ, ସେମାନଙ୍କ ବାଡ଼ି ବଗିଚା ଆଉ ଚାଷ । ତା ସହ ଆଦିବାସୀଙ୍କ ଦ୍ବାରା ସଂଗୃହୀତ ଲଘୁ ବନଜାତ ଦ୍ରବ୍ୟ, କୃଷିଜାତ ଦ୍ରବ୍ୟ, କଳା ଓ ମନୋରଞ୍ଜନ ସାମଗ୍ରୀ । ଇଏ କୌଣସି ଆଦିବାସୀ ଅଧ୍ୟୁଷିତ ଅଞ୍ଚଳ ନୁହେଁ, ଇଏ ରାଜଧାନୀ ଭିତରେ ଗଢ଼ାଯାଇଥିବା ଆଦିବାସୀ ଗାଁର ଦୃଶ୍ୟ ।

ଭୁବନେଶ୍ବର ପ୍ରଦର୍ଶନୀ ପଡ଼ିଆରେ ଆରମ୍ଭ ହୋଇଛି ଆଦିବାସୀ ମେଳା । ଯେଉଁଠି ଅଛି ଜନଜାତିଙ୍କ ୨୦ ପ୍ରକାରର ଆଦିବାସୀ କୁଡ଼ିଆ । ଆଦିବାସୀ ହାଟର ୧୨୬ଟି ଷ୍ଟଲରେ ଆଦିବାସୀଙ୍କ ଦ୍ବାରା ପ୍ରସ୍ତୁତ ବିଭିନ୍ନ ସାମଗ୍ରୀ ହେଉଛି ବିକ୍ରିବଟା । ଏ ସବୁ ମାଧ୍ୟମରେ ଜନଜାତିଙ୍କ ଜୀବନ, ଜୀବିକା, କଳା, ସଂସ୍କୃତି ଓ ପରମ୍ପରା ସହ ଓତଃପ୍ରୋତ ଭାବେ ପରିଚିତ ହେଉଛନ୍ତି ସହରୀ ଲୋକେ । ଏଥର ମୋଟ ୧୮୯ଟି ଷ୍ଟଲ କରାଯାଇଛି । ପ୍ରଥମ ଥର ଭଗବାନ ବୀର୍ସା ମୁଣ୍ଡା ପାଭିଲିଅନ୍ ନିର୍ମିତ ହୋଇଛି । ରବିବାର ମୁଖ୍ୟମନ୍ତ୍ରୀ କରିଛନ୍ତି ଆଦିବାସୀ ମେଳାର ଉଦଘାଟନ । ମୁଖ୍ୟମନ୍ତ୍ରୀଙ୍କ ସହ ରାଜ୍ୟ ଗଣଶିକ୍ଷା ମନ୍ତ୍ରୀ, ଭୁବନେଶ୍ୱର ସାଂସଦ, ଏକାମ୍ର ବିଧାୟକ ପ୍ରମୁଖ କୁଡ଼ିଆ ଗୁଡ଼ିକ ବୁଲି ଦେଖିବା ସହ ଆସିବାସୀ ମାନଙ୍କ ସହ କଥା ହୋଇଛନ୍ତି।

ଏହି ଅବସରରେ ସହିଦ ମାଧୋ ସିଂ ହାତ ଖର୍ଚ୍ଚ ଯୋଜନାର ଶୁଭାରମ୍ଭ କରିଛନ୍ତି ମୁଖ୍ୟମନ୍ତ୍ରୀ ମୋହନ ମାଝୀ । ଏହି ଯୋଜନାରେ ଜନଜାତି ଛାତ୍ରଛାତ୍ରୀଙ୍କୁ ୫ ହଜାର ଟଙ୍କା ଲେଖାଏଁ ପ୍ରଦାନ କରାଯିବ । ଅଷ୍ଟମ ଓ ଦଶମ ପାସ୍‌ କରିବା ପରେ ନବମ ଓ ଏକାଦଶ ଶ୍ରେଣୀରେ ଭର୍ତ୍ତି ହେବା ପିଲାଙ୍କୁ ମିଳିବ ଏହି ସହାୟତା । ଏହି ଯୋଜନା ପାଇଁ 156 କୋଟି ଟଙ୍କା ବ୍ୟୟବରାଦ ହୋଇଛି । ଅଧାରୁ ପାଠ ଛାଡୁଥିବା ଆଦିବାସୀ ଛାତ୍ରଛାତ୍ରୀ ପାଠ ପଢ଼ିବା ପାଇଁ ପ୍ରୋତ୍ସାହନ ଯୋଗାଇବା ଉଦ୍ଦେଶ୍ୟରେ ଆରମ୍ଭ ଏହି ଯୋଜନା ମାଧ୍ୟମରେ ୨ ଲକ୍ଷରୁ ଅଧିକ ଛାତ୍ରଛାତ୍ରୀ ଉପକୃତ ହେବେ ।

ଚଳିତ ବର୍ଷ ଜାନୁଆରୀ 5 ରୁ ୧୬ ତାରିଖ ଯାଏଁ 12 ଦିନ ଧରି ଚାଲିବ ଆଦିବାସୀ ମେଳା । ଭୁବନେଶ୍ବରରେ ଆସନ୍ତା 8 ତାରିଖରୁ ପ୍ରବାସୀ ଭାରତୀୟ ସମ୍ମିଳନୀ ହେଉଥିବାବେଳେ ସାରା ବିଶ୍ବରୁ ଆସୁଥିବା ପ୍ରବାସୀ ଓଡ଼ିଶାର ଜନଜାତିଙ୍କ କଳା, ସଂସ୍କୃତି ଓ ପରମ୍ପରା ବାବଦରେ ଜାଣିବାର ସୁଯୋଗ ପାଇବେ।

Argus News | argus news | Odisha Latest News, Breaking News, Trending News, Live TV