କାମାକ୍ଷାନଗରରେ ମହାବଳ ଆତଙ୍କ । ଷଣ୍ଢକୁ ମାରି ଖାଇଲା ବାଘ । କାମାକ୍ଷାନଗର ପୂର୍ବାଞ୍ଚଳ ରେଞ୍ଜ କନ୍ତାରିପାଟ ଗାଁ ପାଖ ଜଙ୍ଗଲରେ ବାଘକୁ ନେଇ ଭୟଭୀତ ଅଞ୍ଚଳବାସୀ । ଗତକାଲି ରାତିରେ କାନପୁରା ଗାଁ ପାଖରେ ବାଘ ଯାତାୟାତ କରୁଥିବା ନେଇ ଲୋକଙ୍କ ମଧ୍ୟରେ କୋକୁଆ ଭୟ ଖେଳିଯାଇଛି ।

ଢେଙ୍କାନାଳ ବନଖଣ୍ଡ କାମାକ୍ଷାନଗର ପୂର୍ବାଞ୍ଚଳ ରେଞ୍ଜ ଅଞ୍ଚଳରେ ମହାବାଳ ବାଘ ଆତଙ୍କ । ୩ରୁ ୪ ଦିନ ହେଲା ବାଘ ବୁଲୁ ଥିବାବେଳେ ଆଜି ଷଣ୍ଢକୁ ମାରି ଖାଇଛି । ଫଳରେ କନ୍ତାରିପାଟ ଗାଁ ପାଖ ଜଙ୍ଗଲରେ ବାଘକୁ ନେଇ ଭୟଭୀତ ଅବସ୍ଥାରେ ଅଞ୍ଚଳବାସୀ । ବନ ବିଭାଗର ସ୍ୱତନ୍ତ୍ର ଟିମ୍ ବାଘର ଗତିବିଧି ଉପରେ ନଜର ରଖିଛି । ଏଥିସହ ଡାକବାଜି ଯନ୍ତ୍ର ଦ୍ବାରା ସ୍ଥାନୀୟ ଲୋକଙ୍କୁ ସତର୍କ କରାଇବା ସହ ଜଙ୍ଗଲ ମଧ୍ୟକୁ ନଯିବାକୁ ବାରଣ କରାଯାଇଛି । ଏଥିସହ ଗାଈ, ଗୋରୁ, ଛେଳି, ମେଣ୍ଢାକୁ ଜଙ୍ଗଲକୁ ପ୍ରବେଶ ସମ୍ପୂର୍ଣ୍ଣ ନିଷେଧ ରହିଛି । ମହାବଳକୁ କାବୁ କରିବା ପାଇଁ ବନବିଭାଗ ପକ୍ଷରୁ ଉଦ୍ୟମ ଜାରି ରହିଛି ।

ଗତକାଲି କାନପୁରା ଗାଁ ପାଖ ଓଭରବ୍ରିଜ୍ ନିକଟରେ ମହାବଳ ବାଘର ପାଦ ଚିହ୍ନ ଚିହ୍ନଟ କରାଯାଇଥିଲା। କିଛି ଲୋକ ଭୋଜି କରୁଥିବାବେଳେ ବାଘର ଚଳ ପ୍ରଚଳ ଦେଖି ବନବିଭାଗକୁ ଖବର ଦେଇଥିଲେ । ଢେଙ୍କାନାଳ ଡିଏଫଓ ସୁମିତ କରଙ୍କ ନିର୍ଦ୍ଦେଶକ୍ରମେ ବନ ବିଭାଗର ସ୍ୱତନ୍ତ୍ର ଟିମ୍ ଘଟଣାସ୍ଥଳକୁ ଯାଇ ତନାଘନା ଚଳାଇଛି ।

ମହାବଳକୁ ଧରିବା ପାଇଁ ବନବିଭାଗ ଉଦ୍ୟମ ଜାରି ରଖିଥିବାବେଳେ କେହି ବାଘକୁ ଦେଖିଲେ ଖବର ଦେବା ପାଇଁ ସ୍ଥାନୀୟ ଲୋକଙ୍କୁ ଡାକବାଜି ଯନ୍ତ୍ରଦ୍ବାରା କୁହାଯାଇଛି ।