ହନୁମାନ ଜୟନ୍ତୀ, ସାରା ରାଜ୍ୟରେ ସୁରକ୍ଷା ବ୍ୟବସ୍ଥା କଡାକଡି
ରାତି ପାହିଲେ ହନୁମାନ ଜୟନ୍ତୀ ପାଇଁ ସାରା ରାଜ୍ୟରେ ସୁରକ୍ଷା ବ୍ୟବସ୍ଥା କଡ଼ାକଡ଼ି । ଆଇନଶୃଙ୍ଖଳା ଦାୟିତ୍ବରେ ୨୦୦ ପ୍ଲାଟୁନ୍ ଫୋର୍ସ ରହିବେ। ମୁଖ୍ୟ ଶାସନ ସଚିବ, ଡିଜି, ଜିଲ୍ଲା ଏସପି, ଜିଲ୍ଲାପାଳ, ବରିଷ୍ଠ ପୋଲିସ ଅଧିକାରୀଙ୍କ ସହ ବୈଠକ ପରେ ସୂଚନା ଦେଇଛନ୍ତି ଆଇନଶୃଙ୍ଖଳା ଏଡିଜି ସଞ୍ଜୟ କୁମାର । ପଶ୍ଚିମ, ପୂର୍ବ ଓ ଉତ୍ତର ଓଡ଼ିଶାରେ ଏହି ପର୍ବ ପାଳନ କରାଯାଉଥିବାବେଳେ ୯ଟି ଜିଲ୍ଲା ପାଇଁ ସମସ୍ତ ବ୍ୟବସ୍ଥା କରାଯାଇଛି । ନଜର ରଖିବ ୪୦ ଡ୍ରୋନ୍ ଓ ୬୦୦ ସିସିଟିଭି କ୍ୟାମେରା । ଅସାମାଜିକଙ୍କ ବିରୋଧରେ କଡ଼ା କାର୍ଯ୍ୟାନୁଷ୍ଠାନ ନିର୍ଦ୍ଦେଶ ରହିଛି ।
ସମ୍ବଲପୁର, ଝାରସୁଗୁଡା, ଭଦ୍ରକ, ବାଲେଶ୍ୱର, ଭୁବନେଶ୍ୱର କଟକ ସୁନ୍ଦରଗଡ଼ରେ ନଜର ରଖିଛି ପୋଲିସ । ସମ୍ବଲପୁରରେ ସ୍ଥିତି ସମୀକ୍ଷା କରିଛନ୍ତି ଓଡ଼ିଶା ପୋଲିସ ଗୁଇନ୍ଦା ନିର୍ଦ୍ଦେଶକ ଆରପି କୋଚେ ଓ ଉତ୍ତରାଞ୍ଚଳ ଆଇଜି ହିମାଂଶୁ ଲାଲ୍ ।.. ସହରର ୧୦ଟି ସ୍ଥାନରେ ବଡ LED ସ୍କ୍ରିନ୍ ସହ CCTV ଲାଇଭ୍ ଫୁଟେଜ୍ ଚାଲିବ । ୫୩ ପ୍ଲାଟୁନ ଓଡିଶା ପୋଲିସ ଫୋର୍ସ ଓ ୧୦ କମ୍ପାନୀ କେନ୍ଦ୍ରୀୟ ଅର୍ଦ୍ଧସାମରିକ ବଳ ନିୟୋଜିତ ରହିବେ । ସୋସିଆଲ ମିଡିଆ ଉପରେ ପୋଲିସ ନଜର ରଖିଛି । ଯେଉଁମାନେ ଗୁଜବ ସୃଷ୍ଟି କରିବେ ସେମାନଙ୍କ ଉପରେ କାର୍ଯ୍ୟାନୁଷ୍ଠାନ ଗ୍ରହଣ କରିବ ପୋଲିସ ।
