ଭୁବନେଶ୍ଵର: ପରିବହନ ଟିକସ ବକେୟା ଥିଲେ ହୋଇଯାଆନ୍ତୁ ସାବଧାନ । ନହେଲେ କଟିବ ମୋଟା ଅଙ୍କର ଚାଲାଣ। ରାଜ୍ୟରେ ୨୮ ହଜାର ଗାଡ଼ି ଉପରେ ପ୍ରାୟ ୧୦୦୦ କୋଟିର ଟିକସ ବାକି । ଟିକସ ଆଦାୟ ପାଇଁ ପରିବହନ ବିଭାଗ ଆରମ୍ଭ କଲା ଅଭିଯାନ ।

ପରିବହନ ଟିକସ ବକେୟା ଥିବା ଗାଡି ଓ ମାଲିକଙ୍କ ବିରୋଧରେ କାର୍ଯ୍ୟାନୁଷ୍ଠାନ ଆରମ୍ଭ କରିଛି ରାଜ୍ୟ ପରିବହନ ବିଭାଗ । ଶନିବାରଠାରୁ ଆରମ୍ଭ ହୋଇଛି ଏହି ଧରପଗଡ଼ । ଗାଡ଼ି ମାଲିକଙ୍କ ବିରୋଧରେ ମାମଲା ରୁଜୁ କରିବା ସହ ଟିକସ ବାକି ଥିବା ଗାଡ଼ି ଗୁଡ଼ିକୁ ଜବତ କରାଯାଉଛି ।

କଟକ ଜିଲ୍ଲାର ବିଭିନ୍ନ ସ୍ଥାନରେ ଗାଡ଼ି ମଟର ଯାଞ୍ଚ କରାଯିବା ସହ ପ୍ରଥମ ଦିନରେ ୧୫ଟି ଗାଡ଼ି ମାଲିକଙ୍କ ବିରୋଧରେ ମାମଲା ରୁଜୁ ହୋଇଛି । ଏଥି ସହ ଟିକସ ବକେୟା ଥିବା ବହୁ ଗାଡ଼ିକୁ ଜବତ କରାଯାଇଛି । ଅଧିକ ଟିକସ ବକେୟା ଥିଲେ ଗାଡ଼ି ମାଲିକଙ୍କ ସମ୍ପତ୍ତି ଜବତ କରାଯାଇ ଦେୟ ଆଦାୟ କରାଯିବ ବୋଲି ସୂଚନା ଦେଇଛନ୍ତି ପରିବହନ ଅଧିକାରୀ ।

ପୂର୍ଵରୁ ଅଫଲାଇନରେ ଗାଡ଼ି ଟିକସ ଜମା କରାଯାଉଥିବାରୁ ବକେୟା ସମ୍ପର୍କିତ ସଠିକ୍ ତଥ୍ୟ ଜଣାପଡୁ ନଥିଲା । କିନ୍ତୁ ଏବେ ଅନଲାଇନ୍ ହେବା ପରେ ସମସ୍ତ ଗାଡ଼ିର ସୂଚନା ଜଣା ପଡୁଛି । ସେହି ଆଧାରରେ ଟିକସ ଦେଇନଥିବା ଗାଡ଼ି ମାଲିକଙ୍କ ତାଲିକା ପ୍ରସ୍ତୁତ କରିଛି ପରିବହନ ବିଭାଗ ।

ରାଜ୍ୟରେ ଏବେ ପ୍ରାୟ ୨୮ ହଜାର ଗାଡ଼ି ଉପରେ ବକେୟା ରହିଛି ପ୍ରାୟ ୧ ହଜାର କୋଟିର ଟିକସ । କେବଳ କଟକ ଜିଲ୍ଲାରେ ୭୪୫୬ ଗାଡ଼ି ଟିକସ ଜମା କରି ନଥିବା ଜଣା ପଡ଼ିଛି । ସେମାନଙ୍କ ଉପରେ ପ୍ରାୟ ୨୫୫ କୋଟି ଟଙ୍କାର ଟିକସ ବକେୟା ରହିଛି ।

ସବୁ ଗାଡି ମାଲିକଙ୍କୁ ବକେୟା ଜମା ପାଇଁ OTS ବ୍ୟବସ୍ଥା ଲାଗୁ କରାଯାଇଛି । ଏଥିପାଇଁ ମାର୍ଚ୍ଚ ୩୧ ଶେଷ ତାରିଖ ଭାବେ ଘୋଷଣା କରାଯାଇଛି । ଏହା ପୂର୍ଵରୁ ଖିଲାପି ଗାଡ଼ିମାଲିକଙ୍କୁ ବକେୟା ଜମା ପାଇଁ ଶେଷ ସୁଯୋଗ ଦିଆ ଯାଇଛି ।

Argus News | argus news | -Argusnews Home: Odisha Latest News, Breaking News, Trending News, Live TV and more