ଜାନୁଆରୀ ୧୦ ତାରିଖରୁ ପଲ୍ୟୁସନ୍‌ ଟେଷ୍ଟିଂ ସେଣ୍ଟରରେ ମିଳିବ ଗ୍ରୀନ୍ ଷ୍ଟିକର । ଏନେଇ ଘୋଷଣା କରିଛି ଓଡ଼ିଶା ରାଜ୍ୟ ପରିବହନ ବିଭାଗ । ଗ୍ରୀନ୍‌ ଷ୍ଟିକରରେ ଗାଡ଼ି ନମ୍ବର ସହ PUC ସାର୍ଟିଫିକେଟର ଅବଧି ସମ୍ପର୍କରେ ମିଳିବ ତଥ୍ୟ ।

କିନ୍ତୁ ବର୍ତ୍ତମାନ ସମୟରେ ଗ୍ରୀନ ଷ୍ଟିକର ନେଇ ବଡ଼ ସୂଚନା ଦେଲେ ପରିବହନ ମନ୍ତ୍ରୀ ବିଭୂତି ଭୂଷଣ ଜେନା । ଗ୍ରୀନ ଷ୍ଟିକର ଗାଡ଼ିରେ ଲଗାଇବା ବାଧ୍ୟତାମୂଳକ ନୁହେଁ ବୋଲି କହିଲେ ପରିବହନ ମନ୍ତ୍ରୀ । ବିଭୂତି ଭୂଷଣ ଜେନାଙ୍କ କହିବା ଅନୁସାରେ, ଏହି ମାସରେ ସମସ୍ତ ଆରଟିଓକୁ ପର୍ଯ୍ୟାପ୍ତ ପରିମାଣର ଗ୍ରୀନ ଷ୍ଟିକର ଦିଆଯିବ । ଗ୍ରୀନ ଷ୍ଟିକର କେବଳ ଏକ ସୂଚକ, କୌଣସି ଦେୟ ଦେବାକୁ ପଡ଼ିବ ନାହିଁ । ଏଥିପାଇଁ କୌଣସି ଅତ୍ୟଧିକ ଟେନସନ୍ ନେବାର ଆବଶ୍ୟକତା ନାହିଁ ।

ତେବେ ପୂର୍ବରୁ ଏକ ଗୁଜବ ରହିଥିଲା ଯେ, ଗାଡ଼ିରେ ଗ୍ରୀନ ଷ୍ଟିକର ନଲଗାଇଲେ ତେଲ ମିଳିବ ନାହିଁ । କିନ୍ତୁ ଏହାକୁ ମନ୍ତ୍ରୀ ଖଣ୍ଡନ କରି ଗୁଜବ କହିଛନ୍ତି । ଯେଉଁମାନଙ୍କର ପଲ୍ୟୁସନ ସାର୍ଟିଫିକେଟ ରହିଛି ସେମାନେ ଏହି ଗ୍ରୀନ ଷ୍ଟିକର ଆରଟିଓରୁ ନେଇପାରିବେ ।

ତେବେ ଯେଉଁମାନେ ୧୦ ତାରିଖ ପରେ ପଲ୍ୟୁସନ ସାର୍ଟିଫିକେଟ କରିବେ ସେମାନଙ୍କୁ ପିୟୁସିସି ସେଣ୍ଟରରେ ଗ୍ରୀନ ଷ୍ଟିକର ମିଳିବ । ତେବେ ଗ୍ରୀନ ଷ୍ଟିକର ଦିଆଯିବା ପୂର୍ବରୁ ପଲ୍ୟୁସନ ସାର୍ଟିଫିକେଟ, ଆରସି ତଥା ଗାଡ଼ିର ସମସ୍ତ କାଗଜପତ୍ର ଯାଞ୍ଚ କରାଯିବ । ତେବେ ଆରଟିଓ ଅଫିସ ଯାଇ ଗ୍ରୀନ ଷ୍ଟିକର ଆଣିବା ସମୟରେ ଅରିଜିନାଲ ପିୟୁସିସି କପି, ଆରସି ଏବଂ ପରିଚୟ ପତ୍ର ଦେଖାଇବାକୁ ହେବ ।

ଚାରି ଚକିଆ ଗାଡ଼ିର ଫ୍ରଣ୍ଟ ୱିଣ୍ଟୋ ସ୍କ୍ରିନ୍‌ ବାମ କୋଣରେ ଲଗାଇବେ ଗ୍ରୀନ୍ ଷ୍ଟିକର । ସେହିପରି ଦୁଇ ଚକିଆ ଗାଡ଼ିରେ ବାହାରକୁ ଦେଖାଗଲା ଭଳି ଗ୍ରୀନ୍ ଷ୍ଟିକର ଲଗାଇବେ । ଷ୍ଟିକରରେ ଗାଡ଼ି ନମ୍ବର, PUCCର ବୈଧ ତାରିଖ, ଟେଷ୍ଟିଂ ସେଣ୍ଟର ନାଁ ରହିବ । ଗ୍ରୀନ ଷ୍ଟିକରରେ କଳା ପରମାନେଣ୍ଟ ମାର୍କର ପେନରେ ତଥ୍ୟ ଲେଖାଯିବ ।

ଗ୍ରୀନ ଷ୍ଟିକରରେ ଓଭର ରାଇଟିଂ କିମ୍ବା କୌଣସି ସଂଶୋଧନ ହେବ ନାହିଁ । PUC ସାର୍ଟିଫିକେଟ୍ ନ କରି ଗ୍ରୀନ ଷ୍ଟିକର ଲଗାଇଲେ ଫାଇନ୍ ଲାଗିବ । ଷ୍ଟିକର୍ ଜାରି କରିବା ପୂର୍ବରୁ RTO ଅଧିକାରୀମାନେ ଯାନର ପ୍ରଦୂଷଣ ପ୍ରମାଣପତ୍ର, ପଞ୍ଜୀକରଣ ବିବରଣୀ ଏବଂ VAHAN ଡାଟାବେସ୍ରେ ଥିବା ରେକର୍ଡକୁ ଯାଞ୍ଚ କରିବେ ।