ଭୁବନେଶ୍ୱର: ଉଦଯାପିତ ହେଲା ଆଦିବାସୀ ମେଳା ୨୦୨୫। ଚଳିତ ବର୍ଷ ଆଦିବାସୀ ମେଳାରେ ୮ କୋଟି ୫୦ ଲକ୍ଷରୁ ଉର୍ଦ୍ଧ୍ୱ ଟଙ୍କାର ବେପାର ହୋଇଛି । ପ୍ରବାସୀ ଭାରତୀୟ ଦିବସକୁ ଦୃଷ୍ଟିରେ ରଖି ଆଦିବାସୀ ମେଳା ଜାନୁଆରୀ ୫ ରୁ ୧୬ ପର୍ଯ୍ୟନ୍ତ ରଖାଯାଇଥିଲା ।

ଆଦିବାସୀ ମେଳାରେ ମୋଟ ୧୮୮ ଷ୍ଟଲ୍ ଲାଗିଥିଲା । ଯେଉଁଥିରୁ କି ୧୪୦ ଷ୍ଟଲ୍ କେବଳ ଆଦିବାସୀ ମାନଙ୍କର ଚାଲିଚଳଣୀ, ଖାଦ୍ୟପେୟ, ବିକ୍ରି ସାମଗ୍ରୀ ଉପରେ ରହିଥିଲା । ଚଳିତ ବର୍ଷ ଆଦିବାସୀ ମେଳାରେ ୯ ଲକ୍ଷ ଲୋକଙ୍କ ସମାବେଶ ଏବଂ ୮ କୋଟି ୫୦ ଲକ୍ଷରୁ ଉର୍ଦ୍ଧ୍ୱ ଟଙ୍କାର ବେପାର ହୋଇଛି ବୋଲି କହିଛନ୍ତି ବିଭାଗୀୟ ମନ୍ତ୍ରୀ ନିତ୍ୟାନନ୍ଦ ଗଣ୍ଡ ।

ଭୁବନେଶ୍ୱର ସ୍ଥିତ ଗୋଠପାଟଣାରେ ନିର୍ମିତ ହେବ ଏକ ଆଦିବାସୀ ଐତିହ୍ୟ ଭବନ ଯାହା ପାଇଁ ୧୦୦ କୋଟି ଟଙ୍କା ବ୍ୟୟ ବରାଦ କରାଯାଇଛି । ଆଦିବାସୀ ଭାଷା ସଂସ୍କୃତି ଭବନ ପାଇଁ ୫୦ କୋଟି ଏବଂ ୧୫୦ କୋଟି ଟଙ୍କା ଖର୍ଚ୍ଚରେ ରାଉଳକେଲାରେ ନିର୍ମାଣ ହେବ ଭଗବାନ ବିର୍ଷା ମୁଣ୍ଡା ସ୍ମୃତି ସଦନ । ଶିକ୍ଷାର ବିକାଶ ପାଇଁ ୧୫ ଆଶ୍ରମ ବିଦ୍ୟାଳୟମାନଙ୍କରେ ଉଚ୍ଚଶିକ୍ଷା ପାଇଁ ୨୨୫ କୋଟି ଟଙ୍କା ଖର୍ଚ୍ଚ କରି ସ୍କୁଲ ଅପଗ୍ରେଡ୍ କରିଛନ୍ତି ସରକାର ବୋଲି ସୂଚନା ଦେଇଛନ୍ତି ମନ୍ତ୍ରୀ ।