ହୃଦୟର ଭାଷା ପଢ଼ିଲେ, ସାତ ଜନ୍ମର ସାଥି ହେଲେ । ବିବାହ ବନ୍ଧନରେ ବାନ୍ଧି ହେଲେ ଦୁଇ ଦିବ୍ୟାଙ୍ଗ । ବରଗଡ଼ ଟାଉନ୍ ଥାନା ଶିବ ମନ୍ଦିରରେ ପାୱାର ଅଫ ଦିବ୍ୟାଙ୍ଗଶ୍ ପକ୍ଷରୁ ଦୁଇ ଦିବ୍ୟାଙ୍ଗ ଦମ୍ପତ୍ତିଙ୍କୁ ବିବାହ କରାଯାଇଛି । ବହୁ ଆଡ଼ମ୍ବରରେ ନହେଲେ ମଧ୍ୟ ବାଜା ବଜାଇ, ବେକରେ ଫୁଲମାଳ ଦେଇ ଦମ୍ପତି ଏକ ନୂଆ ଜୀବନ ଆରମ୍ଭ କରିଛନ୍ତି। ଆଉ ଏବିବାହ ବରଗଡ଼ ଜିଲ୍ଲାରେ ଚର୍ଚ୍ଚାରେ ବିଷୟ ପାଲଟିଛି।

ଭଲରେ କହିବା ଓ ଭଲରେ ଚାଲିବା ପାଇଁ ସେମାନେ ଅକ୍ଷମ, ହେଲେ ଦୁହେଁ ଦୁହିଁଙ୍କୁ ବୁଝିଛନ୍ତି । ହୃଦୟ ବୁଝିଛି ହୃଦୟର ପରିଭାଷା। ଆଉ ସାତ ଜନ୍ମର ସାଥି ହୋଇ ଏବେ ଚର୍ଚ୍ଚାକୁ ଆସିଛନ୍ତି ଏହି ଦିବ୍ୟାଙ୍ଗ ଦମ୍ପତି । ଜନ୍ମରୁ ଦି ଜଣ ଭଲ ଭାବରେ କହି ପାରନ୍ତି ନାହିଁ କି ଭଲରେ ଚାଲି ପାରନ୍ତି ନାହିଁ ।

ହେଲେ କଣ ହେଲା ଏମାନଙ୍କୁ ମଧ୍ୟ ସ୍ୱପ୍ନ ଦେଖିବାର ସବୁ ଅଧିକାର ରହିଛି । ଏପରିକି ତାଙ୍କର ଶାରୀରିକ ଅକ୍ଷମତା ବିବାହରେ କୌଣସି ବାଧା ସୃଷ୍ଟି କରିପାରିନାହିଁ । ଆଉ ଏ ଦିବ୍ୟାଂଙ୍ଗ ଦମ୍ପତିଙ୍କ ବିବାହ, ଅଞ୍ଚଳରେ ଚର୍ଚ୍ଚାର ବିଷୟ ପାଲଟିଛି। ପରସ୍ପର ମନର ଭାଷାକୁ ବୁଝି ସାତ ଜନ୍ମର ସାଥି ହୋଇଛନ୍ତି ଶାନ୍ତନୁ ଓ ଚଞ୍ଚଳା । ଆଉ ଏହି ଦୁଇ ଦିବ୍ୟଙ୍ଗ ବରକନ୍ୟାକୁ ଏକ କରିଛନ୍ତି ଆଉଜଣେ ଦିବ୍ୟାଙ୍ଗ ଜଗନ୍ନାଥ । ବରଗଡ଼ ପାୱାର ଅଫ ଦିବ୍ୟାଙ୍ଗସ୍ ପକ୍ଷରୁ ଏମାନଙ୍କ ବିବାହ ଆୟୋଜନ କରାଯାଇଥିଲା । ହିନ୍ଦୁ ରୀତିନୀତି ଅନୁଯାୟୀ ବରଗଡ଼ ଟାଉନ୍ ଥାନା ଶିବ ମନ୍ଦିରରେ ଏମାନଙ୍କ ବିବାହ ସମ୍ପନ୍ନ ହୋଇଛି ।

ବିବାହ ଉତ୍ସବରେ ବରଗଡ଼ ଜିଲ୍ଲାର ବହୁ ଦିବ୍ୟାଙ୍ଗ ଯୁବକ ଯୁବତୀ ସାମିଲ୍ ହୋଇ ଦମ୍ପତିଙ୍କୁ ଶୁଭେଚ୍ଛା ଜଣାଇବା ସହ ଆଶୀର୍ବାଦ ପ୍ରଦାନ କରିଛନ୍ତି । ଏଭଳି ଆଦର୍ଶ ବିବାହ ସମାଜ ପାଇଁ ଉଦାହରଣ ସୃଷ୍ଟି କରିଥିବା ବେଳେ ପାୱାର ଅଫ୍ ଦିବ୍ୟାଙ୍ଗସ୍ ନିଜର ସମର୍ଥ ଅନୁଯାୟୀ ଏହି ବିବାହକୁ କରାଇଛି ।