ଉମରକୋଟ: କାଠ ଆଣିବାକୁ ଯାଇଥିଲେ, ଭାଲୁ ଆଖି ତାଡ଼ି ନେଲା । ଏଭଳି ଅଭାବନୀୟ ଘଟଣା ଘଟିଛି ନବରଙ୍ଗପୁର ଜିଲ୍ଲା ଉମରକୋଟ ଥାନା ଅଞ୍ଚଳରେ । ନାୟକଗୁଡ଼ା ଗାଁର ୨ ଜଣ ଭାଲୁ ଆକ୍ରମଣରେ ଗୁରୁତର ଆହତ ହୋଇଛନ୍ତି । ୨ ଜଣଙ୍କ ମଧ୍ୟରୁ ଜଣଙ୍କର ଦୁଇଟି ଯାକ ଆଖି ତାଡ଼ି ନେଇଛି ଭାଲୁ । 

ସୂଚନା ଅନୁସାରେ, ନାୟକଗୁଡ଼ା ଗାଁର ସଲିନ୍ଦର ଚଲାନ ଓ ଅନ୍ୟ ଜଣେ ବ୍ୟକ୍ତି କାଠ ଆଣିବା ପାଇଁ ନିକଟସ୍ଥ ଜଙ୍ଗଲକୁ ଯାଇଥିଲେ । ଜଙ୍ଗଲରେ ହଠାତ ଏକ ଭାଲୁ ସଲିନ୍ଦରକୁ ଆକ୍ରମଣ କରିଥିଲା । ଭାଲୁକୁ ଦେଖି ସାଙ୍ଗରେ ଯାଇଥିବା ବ୍ୟକ୍ତି ଜଣଙ୍କ ପ୍ରାଣ ବିକଳରେ ଦୌଡ଼ି ପଳାଇଥିଲେ ।

ସଲିନ୍ଦରଙ୍କୁ ଭାଲୁ ଆକ୍ରମଣ କରୁଥିବା ବେଳେ ଛଡ଼ାଇବାକୁ ଯାଇ ସେହି ସମୟରେ ବିଲକୁ ଯାଉଥିବା କମଳ ଚଲାନ ମଧ୍ୟ ଆକ୍ରମଣର ଶିକାର ହୋଇଥିଲେ । ସଲିନ୍ଦରଙ୍କ ଆଖି ନଷ୍ଟ ହୋଇଥିବା ବେଳେ ଗାଲକୁ ଭାଲୁ କାମୁଡ଼ି ଦେଇଛି । ଗୁରୁତର ଭାବେ ଉଭୟଙ୍କୁ ଉମରକୋଟ ପରେ ନବରଙ୍ଗପୁର ସ୍ଥାନାନ୍ତର କରାଯାଇଛି ।