ଗୋଟିଏ ଦିନରେ ଦୁଇ କନେଷ୍ଟବଳଙ୍କ ମୃତ୍ୟୁ । ରାୟଗଡ଼ା ଶ୍ରଦ୍ଧା ଶ୍ରୀକ୍ଷେତ୍ର ବାହୁଡା଼ ଯାତ୍ରାରେ ଡ୍ୟୁଟି କରୁଥିବା ବେଳେ ଜୀବନ ହାରିଲେ ତାରିଣୀ ଗମାଙ୍ଗ ନାମକ କନେଷ୍ଟବଳ । ସେ କାଶୀପୁର ବ୍ଲକର ଦୋରାଗୁଡ଼ା ଥାନାରେ କାର୍ଯ୍ୟରତ ଥିଲେ । ଶନିବାର ସକାଳୁ ତହସିଲ ଛକ ଠାରେ ଜାତୀୟ ରାଜପଥ କଡ଼ରେ ଡ୍ୟୁଟି କରୁଥିବା ବେଳେ ଅସୁସ୍ଥତା ଅନୁଭବ କରି ତଳେ ଅଚେତ ଅବସ୍ଥାରେ ପଡ଼ିଯାଇଥିଲେ । ସେଠାରେ ଉପସ୍ଥିତ ପୋଲିସ କର୍ମୀ ତାଙ୍କୁ ସଙ୍ଗେ ସଙ୍ଗେ ଜିଲା ମୁଖ୍ୟ ଚିକିତ୍ସାଳୟକୁ ନେଇଥିଲେ ହେଁ ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ । ତାରିଣୀଙ୍କ ନିଜ ଘର ପଦ୍ମପୁର ଥାନା ଅର୍ନ୍ତଗତ ଲକ୍ଷ୍ମଣଗୁଡ଼ା ଗ୍ରାମ ।

ସେପଟେ ବାହୁଡା଼ ଯାତ୍ରାକୁ ଡ୍ୟୁଟି କରିବାକୁ ଯିବାବେଳେ ଟ୍ରଲର ଧକ୍କାରେ ମହିଳା କନେଷ୍ଟବଳଙ୍କ ମୃତ୍ୟୁ । ଚାନ୍ଦିଲି ଥାନା ଗୁନାଖାଲ ଛକଠାରେ ମହିଳା କନେଷ୍ଟବଳଙ୍କ ସ୍କୁଟିକୁ ଏକ ଟ୍ରଲର ପଛ ପଟୁ ଧକ୍କା ଦେଇଥିଲା । ମହିଳା କନେଷ୍ଟବଳଙ୍କ ଉପରେ ଟ୍ରଲର ଚଢିଯାଇଥିଲା । ମୃତକ ହେଲେ କାର୍ଯ୍ୟରତ ପୋଲିସ କନେଷ୍ଟବଳ ଲାବଣ୍ୟା ଗାଣ୍ଟା । ତାଙ୍କ ଘର କଲନରା ବ୍ଲକ୍ ଖେଦାପଡ଼ାରେ ।