ସ୍ଥିତି ପରଖିବାକୁ ଘଟଣାସ୍ଥଳକୁ ଯିବେ ଦୁଇ ମନ୍ତ୍ରୀଙ୍କ ସମେତ ବିଭାଗୀୟ ସଚିବ
ସୁନ୍ଦରଗଡ଼ରେ ଚୋରା କୋଇଲା ଖଣି ଦୁର୍ନୀତି ମାମଲା । ସ୍ଥିତି ପରଖିବାକୁ ଆଜି ଘଟଣାସ୍ଥଳକୁ ଯିବେ ବିଭାଗୀୟ ମନ୍ତ୍ରୀ ଓ ସଚିବ । ମୁଖ୍ୟମନ୍ତ୍ରୀଙ୍କ ନିର୍ଦ୍ଦେଶରେ ଖଣି ମନ୍ତ୍ରୀ ବିଭୂତି ଭୂଷଣ ଜେନା ଓ ବିଭାଗୀୟ ସଚିବ ସୁନ୍ଦରଗଡ଼ ଆସି ଚୋରା ଖଣି ଅଞ୍ଚଳ ବୁଲି ଦେଖିବେ ।
ସୁନ୍ଦରଗଡ଼ରେ କିଭଳି କୋଇଲା ଲୁଟ୍ ହୋଇଛି, ତାହାର ସତ ପରଖିବେ । ବେଆଇନ ଭାବେ କେତେ ଖଣି ଖୋଳା ଯାଇଛି, କେତେ ପରିମାଣର କୋଇଲା ଚୋରି ହୋଇଛି, ତା’ର ଅନୁଧ୍ୟାନ କରିବା ସହ ଖଣି ବିଭାଗ ଓ ଜିଲ୍ଲା ପ୍ରଶାସନର କାର୍ଯ୍ୟାନୁଷ୍ଠାନର ସମୀକ୍ଷା କରିବେ । ସୁନ୍ଦରଗଡ଼ରେ ଖଣି ଚୋରି ବଢୁଥିବାବେଳେ ଗତ କିଛି ଦିନ ହେଲା ଖଣି, ରାଜସ୍ବ ଓ ପୋଲିସ ବିଭାଗର ମାରାଥନ ରେଡ କରୁଛନ୍ତି ।
ଗତ 4 ତାରିଖରୁ ଏଯାବତ୍ ରେଡରେ ଜବତ ହେଲାଣି ୧୦ ହଜାର ଟନ୍ରୁ ଅଧିକ ପରିମାଣର କୋଇଲା । ହେମଗିରି କନିକାସ୍ଥିତ ଆରୟନ କୋଲ୍ ୱାସେରି ସମେତ ଆଇରନ ଫ୍ୟାକ୍ଟ୍ରି ବସୁନ୍ଧରା ମେଟାଲିକ୍ସ ଉପରେ ଚଢ଼ାଉ କରିଥିଲା ଜିଲ୍ଲା ପ୍ରଶାସନ ଓ ପୋଲିସର ମିଳିତ ଟିମ୍ । ହେମଗିରି କନିକାସ୍ଥିତ ଆରୟନ କୋଲ୍ ୱାସେରି ବେଆଇନ କୋଇଲା ଗଚ୍ଛିତ ଥିବାର ସୂଚନା ମିଳିଥିଲା ।
କମ୍ପାନୀ ପାଚେରୀରୁ ଦୁଇ କିମି ଦୂର ଜଙ୍ଗଲରେ ଶହ ଶହ ଟନ କୋଇଲା ପଡ଼ି ରହିଥିଲା ।. ଖଣି ବିଭାଗ ପକ୍ଷରୁ ଆର୍ଯ୍ୟନ୍ କୋଇଲା ୱାସେରିକୁ ସିଲ୍ କରାଯିବା ସହ କମ୍ପାନୀର ଲାଇସେନ୍ସ ବାତିଲ କରାଯାଇଛି । ଏହାଛଡ଼ା ୯ ହଜାର 5 ଶହ ଟନ୍ କୋଇଲା ବେଆଇନ୍ ଭାବରେ ରଖାଯାଇଥିବା ଅଭିଯୋଗରେ ଏକ ମାମଲା ରୁଜୁ କାରିଛି ଖଣି ବିଭାଗ ।
