ଅର୍ଗସ ବ୍ୟୁରୋ: କଟକ ଜିଲ୍ଲା ଟାଙ୍ଗୀଥାନା ୧୬ନଂ ଜାତୀୟ ରାଜପଥ କଡ଼ରେ ଥିବା ଗୋବିନ୍ଦପୂର ବଜାରରେ ଭାୟଭୟ ଅଗ୍ନିକାଣ୍ଡ ଘଟି ଦୁଇଟି ଦୋକାନ ଜଳିପୋଡ଼ି ପାଉଁଶ ହୋଇଯାଇଛି । ସୂଚନା ଅନୁଯାୟୀ ଦମକା ଗ୍ରାମର ଗୌରାଙ୍ଗ ଚନ୍ଦ୍ର ମହାନ୍ତି ଓ ତାଙ୍କ ଭାଇ ଗୋବିନ୍ଦପୁର ବଜାରରେ ଭେରାଇଟି ଷ୍ଟୋର ଓ ସଉଦା ଦୋକାନ କରିଥିଲେ । ପ୍ରତିଦିନ ଭଳି ଗତକାଲି ରାତିରେ ଦୋକାନ ବନ୍ଦ କରି ଘରକୁ ଯାଇଥିଲେ । ରାତି ପ୍ରାୟ ୩ଟା ସମୟରେ ଦୋକାନ ଜଳୁଥିବା ଖବର ପାଇ ସେମାନେ ଆସି ଦେଖିଲା ବେଳକୁ ନିଆଁ ଜଳୁଥିଲା।

ନିଆଁ ଆୟତ୍ତ କରିବା ସମ୍ଭବ ନ ହେବା ଦେଖି ଚୌଦ୍ଵାର ଦମକଳକୁ ଖବର ଦିଆଯାଇଥିଲା । ଦମକଳ ପହଞ୍ଚି ନିଆଁ ଲିଭାଇଥିଲେ ସୁଦ୍ଧା ୨ଟି ଦୋକାନର ସମସ୍ତ ସାମଗ୍ରୀ ପୋଡ଼ି ପାଉଁଶ ହୋଇଯାଇଥିଲା । ତେବେ ଅଗ୍ନିକାଣ୍ଡର କାରଣ ଅସ୍ପଷ୍ଟ ଥିବା ବେଳେ କେହି ନିଆଁ ଲଗାଇଥାଇ ପାରନ୍ତି ବୋଲି ଦୋକାନୀ ସନ୍ଦେହ କରୁଛନ୍ତି।