ଭଦ୍ରକର ଓମ ଶାନ୍ତି ଅଲଟ୍ରାସାଉଣ୍ଡ କେନ୍ଦ୍ରର ଭୁଲ୍ ରିପୋର୍ଟ ପାଇଁ ଜଣେ ନବଜାତ ଶିଶୁର ମୃତ୍ୟୁ ଘଟଣା ପରେ ଟାର୍ଗେଟରେ ଜିଲ୍ଲାର ସମସ୍ତ ଅଲଟ୍ରାସାଉଣ୍ଡ ସେଣ୍ଟର । ଜିଲ୍ଲାରେ ଖୋଲିଛି ମାଳ ମାଳ ଅଲଟ୍ରାସାଉଣ୍ଡ ସେଣ୍ଟର । ହେଲେ ନାହାନ୍ତି ଅଭିଜ୍ଞ ଡାକ୍ତର । ଫଳରେ ରିପୋର୍ଟରେ ତ୍ରୁଟି ରହିବା ସହ ଉଭୟ ମାଆ ଓ ଶିଶୁଙ୍କ ଜୀବନ ବିପଦରେ ରହୁଥିବା ଅଭିଯୋଗ କରିଛନ୍ତି ସ୍ଥାନୀୟବାସିନ୍ଦା । ଖାଲି ସେତିକି ନୁହେଁ, ଏହି ଅଲଟ୍ରାସାଉଣ୍ଡ ସେଣ୍ଟରରେ ଲିଙ୍ଗ ନିରୂପଣ ପରି ଆସିଛି ସଙ୍ଗୀନ ଅଭିଯୋଗ । ଜିଲ୍ଲା ପ୍ରଶାସନ ଓ ସ୍ୱାସ୍ଥ୍ୟ ବିଭାଗ ପକ୍ଷରୁ ଅଲଟ୍ରାସାଉଣ୍ଡ ସେଣ୍ଟର ଗୁଡିକରେ ଚଢାଉ କରାଗଲେ ପ୍ରକୃତ ସତ୍ୟ ସାମ୍ନାକୁ ଆସିବ ବୋଲି କହିଛନ୍ତି ସ୍ବାସ୍ଥ୍ୟ ବିଶେଷଜ୍ଞ ।

ତେବେ ଓମଶାନ୍ତି ଅଲଟ୍ରାସାଉଣ୍ଡର ତ୍ରୁଟିପୂର୍ଣ୍ଣ ରିପୋର୍ଟକୁ ନେଇ ଯେଉଁ ଘଟଣା ଘଟିଲା ତାହାକୁ ନେଇ ଜିଲ୍ଲା ପ୍ରଶାସନ ସଠିକ ଭାବେ ତଦନ୍ତ କରି ଦୋଷୀଙ୍କ ବିରୁଦ୍ଧରେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ବୃଦ୍ଧିଜୀବୀ ମାନେ ଦାବି କରିଛନ୍ତି. ।

ଅନ୍ୟପଟେ ଭଦ୍ରକ ଜିଲ୍ଲାରେ ମୋଟ ୨୨ଟି ଅଲଟ୍ରାସାଉଣ୍ଡ ସେଣ୍ଟର ରହିଛି । ଯେଉଁ ନୂତନ ଅଲଟ୍ରାସାଉଣ୍ଡ ସେଣ୍ଟର ଖୋଲୁଛି ତାଙ୍କର ସଠିକ୍ ରିପୋର୍ଟ ରଖା ଯାଉଛି । ଆମର ଏଥିପାଇଁ ଟିମ ରହିଛି ସେମାନେ ଯାଇ ଯାଂଚ୍ କରୁଛନ୍ତି ବୋଲି କହିଛନ୍ତି ଜିଲ୍ଲା ମୁଖ୍ୟ ଚିକିତ୍ସା ଅଧିକାରୀ । ତେବେ ଓମ ଶାନ୍ତି ଘଟଣାକୁ ନେଇ ଜିଲ୍ଲାପାଳଙ୍କ ନିର୍ଦ୍ଦେଶରେ ଏକ କମିଟି ଗଠନ କରାଯାଇଛି । ସେହି ଟିମରେ ଜିଲ୍ଲା ପ୍ରଶାସନ ଅଧିକାରୀ, ପୋଲିସ ପ୍ରଶାସନ ଅଧିକାରୀ ଓ ସ୍ୱାସ୍ଥ୍ୟ ବିଭାଗର ଅଧିକାରୀ ରହିଛନ୍ତି । ୩ ଦିନ ଭିତରେ ତଦନ୍ତ କରି ରିପୋର୍ଟ ଦେବା ପାଇଁ କୁହାଯାଇଥିବା କହିଛନ୍ତି ଜିଲ୍ଲା ମୁଖ୍ୟ ଚିକିତ୍ସା ଅଧିକାରୀ ।

Argus News | argus news | -Argusnews Home: Odisha Latest News, Breaking News, Trending News, Live TV and more