ଆଜି ସମ୍ବଲପୁରୀ ଦିନ୍ । କେନ୍ଦ୍ର ଶିକ୍ଷା ମନ୍ତ୍ରୀ ତଥା ସମ୍ବଲପୁର ସାଂସଦ ଧର୍ମେନ୍ଦ୍ର ପ୍ରଧାନ ଆଜି ସମ୍ବଲପୁରୀ ସାହିତ୍ୟ ସାଧକ ଗୁରୁ ଶ୍ରୀ ସତ୍ୟନାରାୟଣ ବହିଦାରଙ୍କ ପବିତ୍ର ଜନ୍ମଦିନ ଅବସରରେ ପାଳିତ ହେଉଥିବା “ସମ୍ବଲପୁରୀ ଦିନ୍”ର ଶୁଭେଚ୍ଛା ଜଣାଇଛନ୍ତି ।

ଜୁହାର୍ 🙏

“ସମ୍ବଲପୁରୀ ଦିନ୍” ଲାଗି ମୁଇଁ ସବୁ ମାଁ-ଭଏନ୍‌, ଦାଦା-ଭାଏ ମାନକୁଁ ଶୁଭେଚ୍ଛା ଜନଉଛେଁ ।

ଆସୁନ୍‌, ମା’ ସମଲେଇକଁର୍ ଆଶୀର୍ବାଦ୍ ନେଇ କରି ହାତ୍‌କେ ହାତ୍ ମିଶାମା ଆଉ ସମ୍ବଲପୁରୀ ଅସ୍ମିତାର୍ ପରବ୍ “ସମ୍ବଲପୁରୀ-ଦିନ୍‌” ମନାମା ।

ସମ୍ବଲପୁରୀ ଭାଷା, ସାହିତ୍ୟ, ସଂସ୍କୃତିର୍ ମହକ୍ ଥି ପୁରା ଦୁନିଆ କେ ମହକେଇ ଦେମା ।… pic.twitter.com/qn6opohMWf
— Dharmendra Pradhan (@dpradhanbjp) August 1, 2025

ଏକ ଭିଡ଼ିଓ ବାର୍ତ୍ତା ଯୋଗେ ଗୁରୁ ଶ୍ରୀ ସତ୍ୟନାରାୟଣ ବହିଦାରଙ୍କୁ ଶ୍ରଦ୍ଧାଞ୍ଜଳି ଦେବା ସହ କେନ୍ଦ୍ର ଶିକ୍ଷା ମନ୍ତ୍ରୀ କହିଛନ୍ତି ସମ୍ବଲପୁରୀ ଦିନ ପାଳନ କରିବା ଉପରେ ସମଗ୍ର ବିଶ୍ୱର ଆଜି ନଜର ପଡିଛି । “ସମ୍ବଲପୁରୀ ଦିନ୍‌”ର ମୂଳ ଉଦ୍ଦେଶ୍ୟ ହେଉଛି ନିଜର ଭାଷା, ନିଜର ସାହିତ୍ୟ ଓ ନିଜର ସଂସ୍କୃତି ପ୍ରତି ଗୌରବମୟ ପରିଚୟ ତିଆରି କରିବାର ପ୍ରଚେଷ୍ଟା । ଗୁରୁ ଶ୍ରୀ ସତ୍ୟନାରାୟଣ ବହିଦାର ସମ୍ବଲପୁରୀ ଭାଷା, ସାହିତ୍ୟ ଏବଂ ସଂସ୍କୃତିକୁ ଗୋଟିଏ ଗରିମାମୟ ପରିଚୟ ଦେବା ପାଇଁ ନିଜର ଜୀବନକୁ ସମର୍ପିତ କରିଥିଲେ । ସମ୍ବଲପୁରୀ ଭାଷା ହେଉଛେ ମଧୁର ଭାଷା, ସମ୍ବଲପୁରୀ ସାହିତ୍ୟ ହେଉଛେ ଉଚ୍ଚକୋଟୀର ଜୀବନ-ଦର୍ଶନର ସାହିତ୍ୟ, ସମ୍ବଲପୁରୀ ସଂସ୍କୃତି ହେଉଛି ଅନ୍ୟର ଉପକାର ଏବଂ ଅନ୍ୟର ଜୀବନରେ ଖୁସି ଆଣିଦେବାର ମହାନ ସଂସ୍କୃତି । ସମ୍ବଲପୁର ଅଞ୍ଚଳର ଭାଷା, ସାହିତ୍ୟ, ସଂସ୍କୃତି ସାଧାରଣ ମନୁଷ୍ୟର ଜୀବନର କଥା କୁହେ । ଏହାସହ ସମ୍ବଲପୁର ଅଞ୍ଚଳର ବାନ୍ଧକଳାର ରଙ୍ଗୀନ ହାତବୁଣା କପଡ଼ା, ମନମୋହକ ନାଚ-ଗୀତ, ଖାଦ୍ୟପେୟର ସମ୍ଭାର ଜିଲ୍ଲାକୁ ଅନନ୍ୟ ପରିଚୟ ଦେଇଛି । ଏହି କଥାକୁ ନେଇ ଗୁରୁ ଶ୍ରୀ ସତ୍ୟନାରାୟଣ ବହିଦାର ଲେଖିଥିଲେ “ସମ୍ବଲପୁର ର୍ ମାଟି ପାନି, ଝର୍‌ସି ହୀରା ନୀଲା, ଜେ -ଜେ -ମାଁ ସମ୍‌ଲେଇ ଗୋ, ଧଏନ୍ ଧଏନ୍ ତୋର୍ ଲୀଲା ।”

କେନ୍ଦ୍ରମନ୍ତ୍ରୀ ଆହୁରି କହିଛନ୍ତି ଯେ ଆଜିର ସମୟ ହେଉଛି ଆମର ଭାଷା, ସାହିତ୍ୟ, ସଂସ୍କୃତିକୁ ବିଶ୍ୱ ଦରବାରରେ ଉଜାଗର କରିବା । ସମ୍ବଲପୁର ଅଞ୍ଚଳର ବିଚାର ଓ ସଂସ୍କୃତିକୁ ଆଧାର କରି ଭାଇଚାରା ବଢାଇବା । ଆଜିର ସମୟ ହେଉଛି, ଟେକ୍ନୋଲୋଜିର ସମୟ । ଆମର ଉନ୍ନତ ଭାଷା, ସାହିତ୍ୟ, ସଂସ୍କୃତି, ନାଚ-ଗୀତ, ଖାଦ୍ୟପେୟ, ସାଂସ୍କୃତିକ ଉତ୍ସବ ଏବଂ ବାନ୍ଧକଲାର କପଡ଼ା ସହ ଟେକ୍ନୋଲୋଜିକୁ ଯୋଡିବା । ଏହି କାମର ଦାୟିତ୍ୱ ଯୁବପିଢିମାନଙ୍କୁ କରିବା ପାଇଁ ସେ ପରାମର୍ଶ ଦେଇଛନ୍ତି । ସେ କହିଛନ୍ତି ଗୁରୁ ଶ୍ରୀ ସତ୍ୟନାରାୟଣ ବହିଦାରଙ୍କର ଜନ୍ମଦିନରେ “ସମ୍ବଲପୁରୀ ଦିନ୍” ଭାବରେ ପାଳନ କରିବା ଦିଗରେ ‘ପଶ୍ଚିମାଞ୍ଚଳ ଏକତା ମଞ୍ଚ’ର ସମର୍ପିତ ଉଦ୍ୟମ ଆଉ ଲୋକମାନଙ୍କର ସହଯୋଗ ବହୁତ ପ୍ରଶଂସନୀୟ । ମା’ ସମଲେଇଙ୍କର ଆଶୀର୍ବାଦ ନେଇ ହାତରେ ହାତ ମିଶାଇ ସମ୍ବଲପୁରୀ ଅସ୍ମିତାର ପରବ “ସମ୍ବଲପୁରୀ-ଦିନ୍‌” ପାଳନ କରିବା । ସମ୍ବଲପୁରୀ ଭାଷା, ସାହିତ୍ୟ, ସଂସ୍କୃତିର ମହକକୁ ସାରା ଦୁନିଆରେ ପ୍ରଚାର କରିବାକୁ ଶ୍ରୀ ପ୍ରଧାନ ଆହ୍ୱାନ କରିଛନ୍ତି ।

Argus News | argus news | Odisha Latest News, Breaking News, Trending News, Live TV