ବାଲେଶ୍ୱରର ବର୍ଷିୟାନ ଜନନେତା, ପୂର୍ବତନ ବିଧାୟକ ସ୍ୱର୍ଗତ ମଦନ ମୋହନ ଦତ୍ତ ତଥା ମଙ୍ଗୁ ଭାଇ ଭାରତୀୟ ଜନତା ପାର୍ଟି ଏବଂ ବିଚାରଧାରାର ବଡ଼ ସ୍ତମ୍ଭ ଥିଲେ । ସମାଜର ସାଧାରଣ ଓ ନିମ୍ନ ଶ୍ରେଣୀର ଲୋକମାନଙ୍କ ସେବାକୁ ସେ ଜୀବନର ବ୍ରତ କରିଥିଲେ ବୋଲି ମଙ୍ଗଳବାର ବାଲେଶ୍ୱର ଠାରେ ତାଙ୍କର ପଞ୍ଚମ ଶ୍ରାଦ୍ଧବାର୍ଷିକୀ ଅବସରରେ ଆୟୋଜିତ ସ୍ମୃତିସଭାରେ ଯୋଗଦେବା ଅବସରରେ କହିଛନ୍ତି କେନ୍ଦ୍ର ଶିକ୍ଷା ମନ୍ତ୍ରୀ ଧର୍ମେନ୍ଦ୍ର ପ୍ରଧାନ । ସେହିପରି ବାଲେଶ୍ଵର ଏକ ଉଦ୍ଦୀପନା, ଉଜ୍ଜ୍ୱଳ ଆଲୋକ, ବିକଶିତ ଓଡ଼ିଶାର ମୁଖଶାଳା ବୋଲି ଧର୍ମେନ୍ଦ୍ର ପ୍ରଧାନ ମତପ୍ରକାଶ କରିଛନ୍ତି ।

ଏହି ସ୍ମୃତିସଭାରେ ଯୋଗଦେବା ପୂର୍ବରୁ ଶ୍ରୀ ପ୍ରଧାନ ଷ୍ଟେସନ ଛକ ଠାରେ ସ୍ୱର୍ଗତ ମଦନ ମୋହନ ଦତ୍ତଙ୍କ ଏକ ପୂର୍ଣ୍ଣାବୟବ ପ୍ରତିମୂର୍ତ୍ତି ଅନାବରଣ କରିଥିଲେ । ତାଙ୍କ ସ୍ମୃତିରେ ଆୟୋଜିତ ରକ୍ତଦାନ ଶିବିର ଉଦଘାଟନ କରିବା ସହ ବୃକ୍ଷରୋପଣ କରିଥିଲେ । ସ୍ଥାନୀୟ ଅଞ୍ଚଳର ଦିବ୍ୟାଙ୍ଗମାନଙ୍କୁ ସହାୟକ ଉପକରଣ, ଗରିବ ଓ ମେଧାବୀ ଛାତ୍ରଛାତ୍ରୀଙ୍କୁ ସହାୟତା ପ୍ରଦାନ ସହ ସ୍ୱେଚ୍ଛାସେବୀଙ୍କୁ ସମ୍ବର୍ଦ୍ଧନା କରିଥିଲେ କେନ୍ଦ୍ରମନ୍ତ୍ରୀ । ‘ମଙ୍ଗୁ ଭାଇ ସ୍ମୃତି କମିଟି, ବାଲେଶ୍ୱର’ ପକ୍ଷରୁ ଆୟୋଜିତ ସ୍ମୃତିସଭାରେ ଶ୍ରୀ ପ୍ରଧାନ ଶ୍ରଦ୍ଧାଞ୍ଜଳି ଅର୍ପଣ କରିବା ସହ ତାଙ୍କ ସହ ଥିବା ସ୍ମୃତିକୁ ମନେପକାଇଥିଲେ ।

ସେ କହିଛନ୍ତି, ମଙ୍ଗୁ ଭାଇ ଥିଲେ ବାଲେଶ୍ୱର ମାଟିର ଜଣେ ପରିଚିତ ଚେହେରା । ଜଣେ ଲୋକପ୍ରିୟ ଜନନେତା । ତାଙ୍କର ସାମାଜିକ ଜୀବନ ଅନେକଙ୍କ ପାଇଁ ଉଦାହରଣ । ବାଲେଶ୍ୱରରେ ଶିକ୍ଷା, ସ୍ୱାସ୍ଥ୍ୟ, ନଗର ଉନ୍ନୟନ, ରୋଜଗାର ତଥା ସହରର ସର୍ବାଙ୍ଗୀନ ବିକାଶ ପାଇଁ ଅକ୍ଲାନ୍ତ ପରିଶ୍ରମ କରିଥିଲେ । ସେ ଥିଲେ ଜଣେ ଦରଦୀ ମଣିଷ । ସମାଜର ସାଧାରଣ ଓ ନିମ୍ନ ଶ୍ରେଣୀର ଲୋକମାନଙ୍କ ସେବାକୁ ସେ ଜୀବନର ବ୍ରତ କରିଥିଲେ । ନିଜ ପରିବାର, ସୁଖ ଓ ସ୍ୱାଚ୍ଛନ୍ଦ୍ୟକୁ ତ୍ୟାଗ କରି ଜନସେବାରେ ନିଜକୁ ସମର୍ପି ଦେଇଥିଲେ । ଓଡ଼ିଶାର ଦଳିତ, ଗରିବ ଓ ନିଷ୍ପେସିତ ଲୋକମାନଙ୍କର ସ୍ୱରକୁ ଶାଣିତ ସ୍ୱରରେ ଉତ୍ତୋଳନ କରୁଥିଲେ । ସେ କେବଳ ବିଧାୟକ ନ ଥିଲେ, ଥିଲେ ବାଲେଶ୍ଵରର ବିକାଶର ସାରଥୀ । ଅନେକ କାର୍ଯ୍ୟକର୍ତ୍ତାଙ୍କୁ ତିଆରି କରିବା ତଥା ତୃଣମୂଳ ସ୍ତରରେ ଦଳୀୟ ସଂଗଠନକୁ ସଶକ୍ତ କରିବାରେ ତାଙ୍କର ଭୂମିକା ଅତୁଳନୀୟ ଥିଲା ।

ଛାତ୍ର ଜୀବନରୁ ମଙ୍ଗୁ ଭାଇଙ୍କ ସହ ମୋର ଦୀର୍ଘ ୩୦ ବର୍ଷର ସମ୍ପର୍କ ରହିଛି । ସେ ଥିଲେ ଆମ ବିଚାରଧାରାର ବଡ଼ ସ୍ତମ୍ଭ । ଦଳ ମତ ନିର୍ବିଶେଷରେ ମଙ୍ଗୁ ଭାଇ ବାଲେଶ୍ୱରବାସୀଙ୍କ ପ୍ରିୟଭାଜନ ହୋଇପାରିଥିଲେ । ତାଙ୍କର ବିଚାରଧାରା ଆଜି ବଟ୍ଟବୃକ୍ଷର ରୂପ ନେଇଛି । ବାଲେଶ୍ୱରରେ ତାଙ୍କ ସ୍ମୃତିରେ ପ୍ରତିମୂର୍ତ୍ତି ସ୍ଥାପନ ; ଜଣେ ସଫଳ ନେତୃତ୍ୱ ପ୍ରତି ଉଚିତ୍ ଶ୍ରଦ୍ଧାଞ୍ଜଳି । ଏହି ପ୍ରତିମୂର୍ତ୍ତି ବାଲେଶ୍ୱରବାସୀଙ୍କର ତାଙ୍କ ପ୍ରତି ଥିବା ଶ୍ରଦ୍ଧା ଓ ଆବେଗର ପ୍ରତିଫଳନ । ମଙ୍ଗୁ ଭାଇ ହୁଅନ୍ତୁ କିମ୍ବା ଓଡ଼ିଶାର ପୂର୍ବତନ ବିରୋଧୀ ଦଳର ଉପନେତା ଦିବଙ୍ଗତ ବିଷ୍ଣୁ ଭାଇ, ଓଡ଼ିଶାକୁ ଉଭୟ ଜନପ୍ରତିନିଧିଙ୍କ ଅବଦାନ ଚିର ସ୍ମରଣୀୟ ହୋଇ ରହିବ । ତାଙ୍କର ସ୍ମୃତିକୁ ଅମର କରି ରଖିବା ପାଇଁ ଏହି ସାଧୁ ଉଦ୍ୟମ କରିଥିବାରୁ “ମଙ୍ଗୁ ଭାଇ ସ୍ମୃତି କମିଟି”ର ସଦସ୍ୟମାନଙ୍କୁ ଧନ୍ୟବାଦ ଜଣାଇଛନ୍ତି ଶ୍ରୀ ପ୍ରଧାନ ।

କେନ୍ଦ୍ର ଶିକ୍ଷା ମନ୍ତ୍ରୀ ବାଲେଶ୍ୱରର ଇତିହାସ ଉପରେ ଆଲୋକପାତ କରିବା ସହ କହିଛନ୍ତି, ବାଲେଶ୍ଵର ମାଟି ହେଉଛି ସାହିତ୍ୟ, ସଂସ୍କୃତି ଓ ସଂଗ୍ରାମର ମାଟି । ବାଲେଶ୍ୱରରେ ଜନ୍ମ ଗ୍ରହଣ କରିଥିବା ମହାନ କବି, ଲେଖକ ଫକୀର ମୋହନ ସେନାପତି ଓଡ଼ିଆ ଭାଷା ଓ ଅସ୍ମିତା ଲଢେଇ ପାଇଁ ସର୍ବସ୍ୱ ତ୍ୟାଗ କରିଥିଲେ । ଏଠାରେ ଜନ୍ମଗ୍ରହଣ କରିଥିବା ବିପ୍ଲବୀ, କ୍ରାନ୍ତିବୀର ବାଘାଯତୀନ ରାଷ୍ଟ୍ରପ୍ରେମର ଏକ ଅଲିଭା ଦୀପ । ସ୍ୱତନ୍ତ୍ର ଓଡ଼ିଶା ସ୍ୱାଭିମାନୀ ପ୍ରଦେଶ ତିଆରି କରିବାରେ ବାଲେଶ୍ୱର ନୀଳଗିରିର ବହୁତ ବଡ ଭୂମିକା ଅଛି । ବିକଶିତ ବାଲେଶ୍ୱରର ସ୍ୱପ୍ନକୁ ସାକାର କରି ବିକଶିତ ଓଡ଼ିଶା ଗଠନର ଅପେକ୍ଷାକୁ ପୂରା କରିବା । ଏଠାରେ ଥିବା ଏମ୍ସ ଭୁବନେଶ୍ୱର ସାଟେଲାଇଟ କେନ୍ଦ୍ରକୁ ଆଧୁନିକ କରିବା ପାଇଁ ଉଦ୍ୟମ କରାଯିବ । ଯୁବକଙ୍କ ସ୍ୱପ୍ନ ପୂରଣ କରାଯିବ ମଙ୍ଗୁ ଭାଇଙ୍କ ନୀତି ଆଦର୍ଶ ଆଧାରରେ ବାଲେଶ୍ୱର ଜିଲ୍ଲାକୁ ଆଗେଇ ନେବାରେ ସମସ୍ତେ ଉଦ୍ୟମ କରିବା । ମଙ୍ଗୁ ଭାଇଙ୍କୁ ସଠିକ୍ ଶ୍ରଦ୍ଧାଞ୍ଜଳି ତେବେ ହେବ ଯେବେ ଆମେ ବାଲେଶ୍ୱରର ବିକାଶ ପାଇଁ ପାଇଁ ସେ ଦେଖିଥିବା ସ୍ୱପ୍ନକୁ ସାକାର କରିବା ।

ଉଲ୍ଲେଖନୀୟ ଯେ, ଏହି ଗସ୍ତ କାଳରେ ଭଦ୍ରକ ଓ ବାଲେଶ୍ୱରର ବିଭିନ୍ନ ସ୍ଥାନରେ ଶ୍ରୀ ପ୍ରଧାନଙ୍କୁ କାର୍ଯ୍ୟକର୍ତ୍ତାମାନେ ସ୍ୱାଗତ ସମ୍ବର୍ଦ୍ଧନା ଜଣାଇଥିଲେ ।

Argus News | argus news | -Argusnews Home: Odisha Latest News, Breaking News, Trending News, Live TV and more