ପୁରୀ: ଭିନ୍ନ ଏକ ପରମ୍ପରା । ପାଲିଙ୍କିରେ ପହଣ୍ଡି ହୋଇ ରଥାରୂଢ ହୋଇ ଘୋଷ ଯାତ୍ରାରେ ବାହାରିନ୍ତି ମହାବାହୁ । ପୁରୀ ଜିଲ୍ଲା ନିମାପଡା ବ୍ଲକ ଅନ୍ତର୍ଗତ ତୁଳସୀପୁର ଗାଁରେ ଭିନ୍ନ ଏକ ଢଙ୍ଗରେ ଅନୁଷ୍ଠିତ ହୁଏ ମହାପ୍ରଭୁଙ୍କ ଘୋଷ ଯାତ୍ରା ।

ଶହେ ବର୍ଷରୁ ଉର୍ଦ୍ଧ୍ୱ ସମୟ ଧରି ଏଭଳି ଭିନ୍ନ ଢଙ୍ଗରେ ଏଠି ରଥଯାତ୍ରା ଚାଲିଆସୁଛି । ପରମ୍ପରା ଅନୁଯାୟୀ ତୁଳସୀପୁର ବ୍ରାହ୍ମଣ ଶାସନର ଗ୍ରାମବାସୀ ମାନେ ରଥ ନିର୍ମାଣ କରନ୍ତି । ଗାଁର ବହୁ ଦୂରରେ ଥିବା ବନ୍ଦେଶ୍ୱର ଗ୍ରାମରେ ପୂଜାପାଇ ଆସୁଥିବା ପ୍ରଭୁ ଶ୍ରୀ ଗୁରୁଦେବ ଠାକୁରଙ୍କୁ ନବ ବସ୍ତ୍ର ପିନ୍ଧାଇ, ପୁଷ୍ପ, ଅଳଙ୍କାରରେ ଭୂଷିତ କରାଇଥାନ୍ତି । ତାଙ୍କ ନିକଟରେ ଅନ୍ନ ପ୍ରସାଦ ଭୋଗ ଲାଗି ହେବା ପରେ ଏକ ସୁସଜ୍ଜିତ ପାଲିଙ୍କିରେ ଶୋଭାଯାତ୍ରା କରି ନିଜ ଗାଁକୁ ଆଣି ରଥାରୁଢ଼ କରାଇବା ପରେ ଏଠାରେ ରଥଯାତ୍ରା ଅନୁଷ୍ଠିତ ହୋଇଥାଏ ।

ପରମ୍ପରା ଅନୁଯାୟୀ ବାଟରେ ସ୍ଥାନୀୟ ଲୋକେ ମାନସିକ ରଖି ପାଲିଙ୍କି ଉପରେ ମହାପ୍ରଭୁଙ୍କୁ ଭୋଗ ଲାଗି କରିଥାନ୍ତି । ଡାହୁକ ଗୀତ, ଘଣ୍ଟ ମୃଦଙ୍ଗ ,ହରିବୋଲ ହୁଳହୁଳି ଶବ୍ଦରେ ରଥ ଗଡି ଶେଷରେ ଗାଁର ଆରାଧ୍ୟା ଦେବୀ ମା' କନକ ଦୂର୍ଗାଙ୍କ ମନ୍ଦିର ନିକଟରେ ପହଂଚିବା ପରେ 9 ଦିନ ରହଣି ପରେ ଗ୍ରାମବାସୀମାନେ ପୁଣି ପାଲିଙ୍କିରେ ବସାଇ ବାହୁଡା ଯାତ୍ରା କରିଥାନ୍ତି ।

କାହିଁ କେଉଁ କାଳରୁ ବ୍ରାହ୍ମଣ ସମ୍ପ୍ରଦାୟ ଲୋକଙ୍କ ଦ୍ୱାରା ଅନୁଷ୍ଠିତ ହେଉଥିବା ରଥଯାତ୍ରା ପାଇଁ 9 ଦିନ ବ୍ୟାପୀ ସ୍ଥାନୀୟ ଅଞ୍ଚଳର ଗାଁ ଗଣ୍ଡା ଉତ୍ସବମୁଖର ହୋଇପଡେ ।

Argus News | argus news | Odisha Latest News, Breaking News, Trending News, Live TV