UPI Scam / ପୂଜା ବଜାରରେ ମାତିଛନ୍ତି UPI ସ୍କାମର ଠକୁଛନ୍ତି ଦୋକାନୀଙ୍କୁ

ପାର୍ବଣର ମାହୋଲରେ ଜମୁଛି ପୂଜା ବଜାର । ଗ୍ରାହକଙ୍କ ଭିଡ଼ ସାଙ୍ଗକୁ ଜୋରଦାର ହେଉଛି ବ୍ୟବସାୟ। ହେଲେ ଏହି ଭିଡ଼ର ସୁଯୋଗ ନେଇ ଦୋକାନୀଙ୍କୁ ଠକିବାକୁ ମାତିଛନ୍ତି କିଛି ଠକ । UPI ପେମେଣ୍ଟରେ ଠକେଇ କରିବାକୁ ନେଇ ଆସିଛି ଏକ ସଙ୍ଗୀନ ଅଭିଯୋଗ । ମୋବାଇଲରେ ପେମେଣ୍ଟ ସଫଳ ହୋଇଥିବା ସ୍କ୍ରିନ୍ ଦେଖାଉଛନ୍ତି, ହେଲେ ଦୋକାନୀଙ୍କ ଆକାଉଣ୍ଟକୁ ଯାଉନି ଟଙ୍କା । ଏଭଳି ଏକ ଘଟଣା ସୁବର୍ଣ୍ଣପୁର ବ୍ଲକ ଛକରେ ଚାଲିଥିବା ମୀନାବଜାରରୁ ସାମ୍ନାକୁ ଆସିଛି ।

ଅଭିଯୋଗ ଅନୁସାରେ, ମୀନାବଜାରକୁ ଆସି ଜଣେ ଯୁବକ କିଛି ସାମଗ୍ରୀ କିଣିଥିଲେ । ସାମଗ୍ରୀ କିଣିବା ପରେ ସେ ଫୋନ୍ ପେ' ମାଧ୍ୟମରେ ଟଙ୍କା ପେମେଣ୍ଟ କରିଥିଲେ । ନିଜ ମୋବାଇଲରେ ପେମେଣ୍ଟ ସଫଳ ହୋଇଥିବା ସ୍କ୍ରିନ୍ ମଧ୍ୟ ଦୋକାନୀଙ୍କୁ ଦେଖାଇଥିଲେ । ହେଲେ ଦୋକାନୀ ନିଜ ଆକାଉଣ୍ଟ ଯାଞ୍ଚ କରିବା ପରେ ଟଙ୍କା ଜମା ହୋଇନଥିବା ଜାଣିବାକୁ ପାଇଥିଲେ । ଏହାପରେ ଯୁବକଙ୍କ କାର୍ଯ୍ୟକଳାପକୁ ନେଇ ସନ୍ଦେହ ବଢ଼ିଥିଲା ।

ସନ୍ଦେହ ହେବାରୁ ମୀନାବଜାର ମାଲିକ ଯୁବକଙ୍କୁ ଅଟକ ରଖିବା ସହ ସୋନପୁର ପୋଲିସକୁ ଖବର ଦେଇଥିଲେ । ଖବର ପାଇ ପୋଲିସ ଘଟଣାସ୍ଥଳରେ ପହଞ୍ଚି ସମ୍ପୃକ୍ତ ଯୁବକଙ୍କୁ ପଚରାଉଚରା କରିଥିଲା । ପଚରାଉଚରା ସମୟରେ ଯୁବକ ଜଣକ ନିଜ ଦୋଷ ସ୍ୱୀକାର କରିଥିବା ଅଭିଯୋଗ ହୋଇଛି । ଏହାପରେ ପୋଲିସ ତାଙ୍କୁ ଅଟକ ରଖିଛି ।

ଏହି ଘଟଣା ପରେ ମୀନାବଜାର ମାଲିକ ଅନ୍ୟ ଦୋକାନୀମାନଙ୍କୁ ସତର୍କ ରହିବାକୁ ପରାମର୍ଶ ଦେଇଛନ୍ତି । କେବଳ ମୋବାଇଲରେ ପେମେଣ୍ଟ ସକ୍ସେସ୍ ସ୍କ୍ରିନ୍ ଦେଖି ସାମଗ୍ରୀ ହସ୍ତାନ୍ତର ନକରି, ନିଜ ବ୍ୟାଙ୍କ ଆକାଉଣ୍ଟରେ ଟଙ୍କା ଜମା ହୋଇଥିବା ନିଶ୍ଚିତ କରିବା ଜରୁରୀ । ପାର୍ବଣ ଋତୁରେ ଏଭଳି ଠକେଇରୁ ବର୍ତ୍ତିବା ପାଇଁ ଦୋକାନୀମାନେ ସଜାଗ ରହିବା ସହ ପ୍ରତ୍ୟେକ ଡିଜିଟାଲ୍ ପେମେଣ୍ଟକୁ ଯାଞ୍ଚ କରିବା ଆବଶ୍ୟକ ।