ବଢୁଛି ଜନସଂଖ୍ୟା, ବଢୁଛି ଯାନବାହାନ ଆଉ ତାକୁ ତାଳ ଦେଇ ବଢୁଛି ସଡ଼କ ଦୁର୍ଘଟଣା । ଦୁର୍ଘଟଣାରେ ଚାଲିଯାଉଛି ଦୁର୍ଲଭ ଜୀବନ। ବାଇକ୍ ଦୁର୍ଘଟଣାରେ ହେଉଥିବା ମୃତ୍ୟୁକୁ ରୋକିବା ପାଇଁ କେନ୍ଦ୍ର ସରକାର ନେଇଛନ୍ତି ବଡ଼ ପଦକ୍ଷେପ । କେନ୍ଦ୍ର ସରକାରଙ୍କ ପକ୍ଷରୁ ସମସ୍ତ ରାଜ୍ୟକୁ ଲେଖାଯାଇଛି ଚିଠି । କୁହାଯାଇଛି ଦୁଇ ଚକିଆ ଚଳାଇବା ବେଳେ ସୁରକ୍ଷା ପାଇଁ କେବଳ BIS ସାର୍ଟିଫାଏଡ୍ ହେଲମେଟ୍ ବ୍ୟବହାର କରିବାକୁ ହେବ । BIS ପ୍ରମାଣପତ୍ର ବିନା ହେଲମେଟ୍ ନିର୍ମାଣ କିମ୍ବା ବିକ୍ରୟ ବିରୋଧରେ କଠୋର କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ମଧ୍ୟ କୁହାଯାଇଛି । ଆହୁରି କୁହାଯାଇଛି ରାସ୍ତା ପାର୍ଶ୍ୱରେ ବିକ୍ରି ହେଉଥିବା ଅନେକ ହେଲମେଟରେ ବାଧ୍ୟତାମୂଳକ BIS ପ୍ରମାଣପତ୍ର ନ ଥାଏ। ଯାହା ଗ୍ରାହକଙ୍କ ପାଇଁ ସାଂଘାତିକ ବିପଦ ସୃଷ୍ଟି କରୁଛି ଏବଂ ସଡ଼କ ଦୁର୍ଘଟଣାରେ ଅନେକ ଲୋକଙ୍କ ପ୍ରାଣହାନି ହେଉଛି। ତେଣୁ ଏହି ସମସ୍ୟାର ମୁକାବିଲା ପାଇଁ ଚଢ଼ାଉ ଜୋରଦାର କରିବାକୁ ନିର୍ଦ୍ଦେଶ ଦିଆଯାଇଛି । ଏ ସମ୍ପର୍କରେ ରାଜ୍ୟ ପରିବହନ ମନ୍ତ୍ରୀ କହିଛନ୍ତି ଆଗକୁ ଚଢ଼ାଉ ଜୋର ଦାର ହେବ ।

ଏପଟେ ଖୋଦ୍ ରାଜ୍ୟ ରାଜଧାନୀରେ ଖୁଲମଖୁଲା ବିକ୍ରି ଚାଲିଛି ବିନା ସାର୍ଟିଫାଏଡ୍ ହେଲମେଟ୍ । କାହିଁକି ଏହି ହେଲମେଟ୍ ବିକ୍ରି ହେଉଛି ପଚାରିବାରୁ ବ୍ୟବସାୟୀ କହୁଛନ୍ତି କମ୍ପାନୀ ତିଆରି କରୁଛନ୍ତି, ଲୋକେ କିଣୁଛନ୍ତି ଆମେ ବିକିବୁ । କେହି ଆମର କିଛି କରି ପାରିବେ ନାହିଁ । ଏପରିକି ସରକାରଙ୍କ ନିଷ୍ପତିକୁ ବି ମାନିବା ପାଇଁ ପ୍ରସ୍ତୁତ ନୁହନ୍ତି ବ୍ୟବସାୟୀ ।

ଦେଶରେ ଏବେ ୨୧ କୋଟି ରୁ ଅଧିକ ଦୁଇ ଚକିଆ ଯାନ ଗଡୁଛି । ତେବେ ଅନେକ ଯାତ୍ରୀ BIS ସାର୍ଟିଫାଏଡ୍ ହେଲମେଟ୍ ବ୍ୟବହାର ନ କରି ରାସ୍ତା କଡରେ ମିଳୁଥିବା ଚାଲୁ ହେଲମେଟ୍ ବ୍ୟବହାର କରିବା ଦ୍ୱାରା ଦୁର୍ଘଟଣା ସମୟରେ ମୂଲ୍ୟବାନ ଜୀବନ ହରାଉଥିବା ଦେଖା ଦେଉଛି । ତେଣୁ ଲୋକଙ୍କ ସୁବିଧା ପାଇଁ BIS, BIS କେୟାର ଆପ୍ ଏବଂ BIS ପୋର୍ଟାଲରେ ଏକ ବ୍ୟବସ୍ଥା କରାଯାଇଛି । ଯାହା ଦ୍ୱାରା ହେଲମେଟ ନିର୍ମାତା ଲାଇସେନ୍ସପ୍ରାପ୍ତ କି ନାହିଁ ତାହା ଯାଞ୍ଚ କରାଯାଇପାରିବ ଏବଂ ବ୍ୟବହାରକାରୀମାନଙ୍କୁ BIS କେୟାର ଆପ୍ ରେ ଅଭିଯୋଗ ଦାଖଲ କରିବାକୁ ମଧ୍ୟ ଅନୁମତି ଦିଆଯିବ।