ପୁରୀ: ଶ୍ରୀମନ୍ଦିର ଭିତରକୁ ମୋବାଇଲ ଫୋନ ବାରଣ ସତ୍ତ୍ୱେ ବାରମ୍ବାର ନିୟମ ଉଲ୍ଲଙ୍ଘନ ପରେ ଏବେ ଆକ୍ସନ୍ ମୋଡ୍ ରେ ପୁରୀ ପୋଲିସ । ଜନସାଧାରଣ ଓ ଭକ୍ତମାନଙ୍କୁ ସଚେତନ କରିବା ପାଇଁ ଶ୍ରୀମନ୍ଦିର ଚାରିପଟେ ପୁରୀ ପୋଲିସ ତରଫରୁ ଲଗାଗଲା ପୋଷ୍ଟର । ଶ୍ରୀମନ୍ଦିର ପରିସର ମଧ୍ୟରେ ମୋବାଇଲ ଫୋନ୍ ବ୍ୟବହାର ନିଷେଧ । ଯଦି କୌଣସି ବ୍ୟକ୍ତି ନିୟମ ଉଲଙ୍ଘନ କରନ୍ତି ତେବେ ଆଇନ୍ ଅନୁଯାୟୀ ଦଣ୍ଡିତ ହେବେ ବୋଲି ପୋଷ୍ଟରରେ ଉଲ୍ଲେଖ ହୋଇଛି ।

ଚଳିତ ଜାନୁଆରୀ ମାସ ମଧ୍ୟରେ ତିନି ତିନିଟି ଘଟଣା ଶ୍ରୀମନ୍ଦିର ସୁରକ୍ଷା ବ୍ୟବସ୍ଥା ଉପରେ ପ୍ରଶ୍ନବାଚୀ ସୃଷ୍ଟି କରିବା ସହ ସୁରକ୍ଷାକର୍ମୀଙ୍କ ଅବହେଳାକୁ ପଦାରେ ପକାଇଥିଲା । ଗତ ଦୁଇଦିନ ତଳେ ବୃନ୍ଦାବନର ଜଣେ ଭକ୍ତ ବାଙ୍କେ ବିହାରୀ ଅନନ୍ତ ବିହାରୀ ଗର୍ଭଗୃହ ସମେତ, ରତ୍ନସିଂହାସନରେ ମହାପ୍ରଭୁ ଜଗନ୍ନାଥଙ୍କ ଭିଡିଓ, ଶ୍ରୀମନ୍ଦିର ପାଟଅଗଣାର ଦୃଶ୍ୟ, କୀର୍ତ୍ତନଚକଡାର ଦୃଶ୍ୟ ଓ ଶ୍ରୀମନ୍ଦିର ଭିତରେ ନିଜ ଫଟୋକୁ ମିଶାଇ ସାମାଜିକ ଗଣମାଧ୍ୟମରେ ଭାଇରାଲ୍ କରିଥିଲେ ।

ଗତକାଲି ଜଣେ ଶ୍ରଦ୍ଧାଳୁ ଶ୍ରୀମନ୍ଦିର ଭିତରକୁ ମୋବାଇଲ ଫୋନ୍ ନେଇ ଫଟୋ ଉଠାଉଥିବାବେଳେ କର୍ତ୍ତଵ୍ୟରତ ଜେଟିପିଙ୍କ ନଜରକୁ ଆସିଥିଲା । ଭକ୍ତ ଜଣକ ବାଇଶି ପାହାଚରେ ଠିଆ ହୋଇ ଶ୍ରୀମନ୍ଦିର ଭିତର ଭ୍ୟୁ ସହ ନିଜ ଫଟୋ ଉଠାଉଥିବାବେଳେ ଜେଟିପିଙ୍କ ନଜରକୁ ଆସିବାରୁ ତୁରନ୍ତ ସମ୍ପୃକ୍ତ ଭକ୍ତଙ୍କୁ କାବୁ କରାଯାଇଥିଲା । ତାଙ୍କ ଠାରୁ ମୋବାଇଲ ନେଇ ତନଖି କରିବା ସମୟରେ ଫଟୋ ଉଠାଯାଇଥିବା ଜଣାପଡିଥିଲା । ଏହା ଜାଣିବା ପରେ ଭକ୍ତ ଜଣକ କାନ ଧରି ନିଜ ଭୂଲ୍ ସ୍ୱୀକାର କରିଥିଲେ । ପୂର୍ବରୁ ମଧ୍ୟ ଶ୍ରୀମନ୍ଦିର ଉପରେ ଅଧଘଣ୍ଟା ପର୍ଯ୍ୟନ୍ତ ଡ୍ରୋନ୍ ଉଡି ଶ୍ରୀମନ୍ଦିର ଭିତର ବେଢାର ଦୃଶ୍ୟକୁ କଏଦ୍ କରିଯାଇଥିଲା । ଏମିତି ଦୃଶ୍ୟ ବାରମ୍ବାର ସାମନାକୁ ଆସିଥିଲା । ଯାହାକୁ ନେଇ ବିଭିନ୍ନ ମହଲରୁ ଅସନ୍ତୋଷ ପ୍ରକାଶ ପାଇଥିଲା ।

ତେଣୁ ଶ୍ରୀମନ୍ଦିର ଭିତରକୁ ସେବାୟତ, ଶ୍ରୀମନ୍ଦିର ପ୍ରଶାସନ କର୍ମଚାରୀ, ଅଧିକାରୀଙ୍କ ସମେତ ଭକ୍ତ ଶ୍ରଦ୍ଧାଳୁ କିଭଳି ମୋବାଇଲ ନ ନେବେ ସେନେଇ ମୁଖ୍ୟ ପ୍ରଶାସକ ଚରମବାଣୀ ଶୁଣାଇବା ପରେ ଏବେ ପୋଷ୍ଟର ମାରି ଲୋକଙ୍କୁ ସଚେତନ କରୁଛି ପୁରୀ ପୋଲିସ ।

Argus News | argus news | Odisha Latest News, Breaking News, Trending News, Live TV