ନିର୍ବାଚନ ପାଇଁ ମଧୁ ବାବୁ ପ୍ରେମୀଙ୍କ ସହ ଛଳନା କରିଥିଲେ କି ବିଜେଡି ସରକାର ? କଟକ ଜିଲ୍ଲା ସତ୍ୟଭାମାପୁରରେ ଥିବା ଉତ୍କଳ ଗୌରବ ମଧୁସୂଦନ ଦାସଙ୍କ ଜନ୍ମପୀଠର ଉନ୍ନତିକରଣ କରିବା ସହ ବିଶ୍ଵ ପର୍ଯ୍ୟଟନ ମାନଚିତ୍ରରେ ଏହାକୁ ସ୍ବତନ୍ତ୍ର ସ୍ଥାନ ଦେବା ଲାଗି ୨୦୨୩ରେ ୨୧ କୋଟି ଟଙ୍କା ଅଟକଳ କରିଥିଲେ ପୂର୍ବ ସରକାର । ପ୍ଲାନ୍ ମଧ୍ୟ ପ୍ରସ୍ତୁତ ହୋଇଥିଲା । ସେତେବେଳର 5T ଅଧ୍ୟକ୍ଷ ଭିକେ ପାଣ୍ଡିଆନ ମଧ୍ୟ ସତ୍ୟଭାମାପୁରରେ ଥିବା ମଧୁ ବାବୁଙ୍କ ଜନ୍ମପୀଠ ପରିଦର୍ଶନ କରିଥିଲେ । ହେଲେ ପରିସ୍ଥିତି ଯଥା ପୂର୍ବଂ ତଥା ପରଂରେ ରହିଗଲା । କେବଳ ରାସ୍ତା ନିର୍ମାଣ ହୋଇଥିଲେ ହେଁ ଅଧପନ୍ତରିଆ ହୋଇ ରହିଗଲା ଉନ୍ନତିକରଣ କାର୍ଯ୍ୟ। । ଜମି ଅଧିଗ୍ରହଣ ହୋଇନଥିବାରୁ ମଧୁ ବାବୁଙ୍କ ଜନ୍ମ ପୀଠର ହୋଇପାରିଲା ନାହିଁ ଉନ୍ନତିକରଣ । ଯାହାକୁ ନେଇ ଅସନ୍ତୋଷ ପ୍ରକାଶ କରିବା ସହ ଧାରଣା ଦେଇଥିଲେ ଗ୍ରାମବାସୀ ।

ଅନ୍ୟପଟେ କଟକ ତୁଳସୀପୁର ସ୍ଥିତ ଗୋରାକବରରେ ଥିବା ମଧୁ ବାବୁଙ୍କ ସମାଧି ପୀଠର ଉନ୍ନତିକରଣ କାର୍ଯ୍ୟ ମଧ୍ୟ ଅଧାରେ ଅଟକି ରହିଛି । ମଧୁ ବାବୁଙ୍କ ସମାଧି ପୀଠର ଉନ୍ନତିକରଣ ପାଇଁ ୨୦୨୩ରେ ପୂର୍ବ ବିଜେଡି ସରକାର ଘୋଷଣା କରିଥିଲେ ୭୫ ଲକ୍ଷ ଟଙ୍କା । ଏଥିରେ କାଁ ଭାଁ କିଛି କାମ ହୋଇଥିବା ବେଳେ ଜମି ଅଧିଗ୍ରହଣ ନହେବା ଯୋଗୁଁ ଆଉ ଆଗକୁ ବଢ଼ି ପାରିଲା ନାହିଁ ଉନ୍ନତିକରଣ କାର୍ଯ୍ୟ । ଯାହାକୁ ନେଇ ଅସନ୍ତୋଷ ପ୍ରକାଶ କରିଛନ୍ତି ପଦ୍ମଶ୍ରୀ ଶ୍ୟାମାମଣୀ ଦେବୀ । ଅନ୍ୟପଟେ ଏ ସବୁ ସମସ୍ୟାକୁ ସମାଧାନ କରି ଜନ୍ମପୀଠ ଓ ସମାଧି ପୀଠର ଉନ୍ନତିକରଣ କାର୍ଯ୍ୟ କରାଯିବ ବୋଲି କହିଛନ୍ତି କଟକ ଜିଲ୍ଲାପାଳ । ବର୍ତ୍ତମାନର ସରକାର ଉତ୍କଳ ମାଟିର ସନ୍ତାନଙ୍କୁ ଉଚିତ ସମ୍ମାନ ଦେବା ଲାଗି କାମ କରିବେ ବୋଲି ଆଶା ରଖିଛନ୍ତି ମଧୁ ପ୍ରେମୀ ।