ଅର୍ଗସ ବ୍ୟୁରୋ : ସାବଧାନ ! ଗାଡ଼ି ଚାଳକ । ଫିଟନେସ୍‌ ନଥିଲେ କି ରେଜିଷ୍ଟ୍ରେସନ ନଥିଲେ ନିଆଯିବ କଡ଼ା ଆକ୍ସନ । ଗାଡି ସିଜ୍‌ ହେବା ସହିତ ମାଲିକଙ୍କ ବିରୋଧରେ ବି ଆକ୍ସନ ନିଆଯିବ । ରାଜ୍ୟ ପରିବହନ ବିଭାଗର ଏ କଡ଼ା ନିଷ୍ପତ୍ତି ସାଙ୍ଗକୁ ବିଭାଗୀୟ ମନ୍ତ୍ରୀ ବିଭୁତି ଜେନାଙ୍କ ଚେତାବନୀ ପରେ ଏବେ ଅମାନିଆଙ୍କ ଛାତିରେ ପଶିଲାଣି ଛନକା । କାରଣ ପୁରା ରାଜ୍ୟର ଆରଟିଓଙ୍କୁ ଆକ୍ସନ ମୋଡକୁ ଆସିବାକୁ ଦିଆଯାଇଛି ନିର୍ଦ୍ଦେଶ ।

ଏଣିକି ବିନା କାଗଜପତ୍ରରେ ଗାଡି ଚଳାଇବା ମହଙ୍ଗା ପଡ଼ିବ । ଖାଲି ମହଙ୍ଗା ପଡ଼ିବ ତାହା ନୁହେଁ ବରଂ ତଣ୍ଡ ଗଣିବାକୁ ବି ପଡ଼ିବ । କାରଣ, କେନ୍ଦ୍ରୀୟ ମୋଟର ଯାନ ଆଇନ ୧୯୮୮ ଅନୁଯାୟୀ, ବାଣିଜ୍ୟିକ ଗାଡ଼ିଗୁଡ଼ିକ ବୈଧ ପଞ୍ଜୀକରଣ ଓ ଫିଟନେସ ସାର୍ଟିଫିକେଟ ଏବଂ ଅଣବାଣିଜ୍ୟିକ ଗାଡ଼ିଗୁଡ଼ିକ ନିମନ୍ତେ ବୈଧ ରେଜିଷ୍ଟ୍ରେସନ ସାର୍ଟିଫିକେଟ ବାଧ୍ୟତାମୂଳକ ହୋଇଛି । ଯଦି ନିୟମ ଅନୁସାରେ ଗାଡ଼ିରେ କାଗଜପତ୍ର ଠିକ୍‌ ନଥିବ ତାହାଲେ ରାସ୍ତାରେ ଗାଡ଼ି ଚଲାଇବା ଧର୍ତ୍ତବ୍ୟ ଅପରାଧ ବୋଲି ବିବେଚନା କରାଯିବ । ନିୟମ ଉଲ୍ଲଂଘନକାରୀ ଏଭଳି ଗାଡ଼ି ଦୁର୍ଘଟଣାଗ୍ରସ୍ତ ହେଲେ ଇନସ୍ୟୁରାନ୍ସ କମ୍ପାନୀ ପକ୍ଷରୁ ବୀମାରାଶି ମଧ୍ୟ ପ୍ରଦାନ କରିବା ନିୟମ ନାହିଁ । ଯାହା ଫଳରେ ଦୁର୍ଘଟଣାର ଶିକାର ବ୍ୟକ୍ତି କ୍ଷତିପୂରଣ ପାଇପାରୁ ନାହାନ୍ତି । ତେଣୁ ଗାଡି ଚାଳନାରେ କେମିତି ଶୃଙ୍ଖଳା ଆସିବ ସେନେଇ ଏମିତି କଡ଼ା ନିଷ୍ପତ୍ତି ନେଇଛନ୍ତି ରାଜ୍ୟ ସରକାର । ଯାହାକୁ ନେଇ ଏବେ ପୁରା ରାଜ୍ୟରେ ଚର୍ଚ୍ଚା ଚାଲିଛି ।

ପରିବହନ ବିଭାଗ ପକ୍ଷରୁ କରାଯାଇଥିବା ନିୟମ ଅନୁସାରେ କେବଳ ବାଣିଜ୍ୟିକ କିମ୍ବା ଘରୋଇ ଗାଡ଼ି ନୁହେଁ ବରଂ ରାଜ୍ୟର ବିଭିନ୍ନ ଶିକ୍ଷାନୁଷ୍ଠାନରେ ନିୟୋଜିତ ହୋଇଥିବା ଗାଡ଼ିରେ ବି ସମାନ ଫର୍ମୁଲାରେ ଚେକିଂ କରାଯିବ । ଯେଉଁ ଶିକ୍ଷାନୁଷ୍ଠାନ ଏହି ନିୟମ ମାନୁନଥିବ ସେମାନଙ୍କ ବିରୋଧରେ ବି ଆକ୍ସନ ନିଆଯିବ ବୋଲି ସ୍ପଷ୍ଟ ଭାବରେ କୁହାଯାଇଛି ।

ଗୁରୁତ୍ଵପୂର୍ଣ୍ଣ କଥା ହେଲା, ଅନେକ ସମୟରେ ଦେଖାଯାଇଛି ଗାଡିରେ ଲାଗୁଥିବା ନମ୍ବର ପ୍ଲେଟ୍‌ରେ ଠିକ୍‌ରେ ଦିଶୁନାହିଁ । ଯେଉଁଥି ପରିବହନ ବିଭାଗର କର୍ମଚାରୀମାନେ ସଂପୃକ୍ତ ଗାଡିର ପଂଜୀକୃତ ସମ୍ପର୍କରେ ଠିକ୍‌ରେ ବିବରଣୀ ପାଉନାହାନ୍ତି । ହେଲେ ଏବେ ସେମିତି ଆଉ ଚଳିବନି । କାରଣ ଆକ୍ସନ ମୋଡରେ ଏବେ ପରିବହନ ବିଭାଗ ରହିଛି । ନିୟମ ନମାନିଲେ ସଙ୍ଗେ ସଙ୍ଗେ ଆକ୍ସନ ନିଆଯିବ ବୋଲି କୁହାଯାଇଛି ।

ସାଧାରଣତଃ ଟୋଲଗେଟ୍‌ରେ ଆମେ ଟ୍ୟାକ୍ସ ଦିଅନ୍ତି । ଟଙ୍କା ଦେବା ପରେ ଆମେ ଟୋଲଗେଟ୍‌ ପାର ହୁଅନ୍ତି । ହେଲେ ଏବେ ରାଜ୍ୟର ଆରଟିଓମାନେ ଟୋଲଗେଟ୍‌ରେ ଗାଡ଼ି ସମ୍ପର୍କରେ ସବୁ ତଥ୍ୟ ଦେବେ । ତେଣୁ ଯେଉଁ ଗାଡି ବେଆଇନ ଚାଲିଥିବ ଏଇଠାରେ ହିଁ ଧରାପଡିବ । ଏବେ ଅପେକ୍ଷା କେତେ ମାତ୍ରାରେ ବେଆଇନ ଗାଡି ଚାଲୁଛି ରାଜ୍ୟରେ ଏବଂ କେତେ ଜୋରିମାନା ଆଦାୟ ହେଉଛି ।

Argus News | argus news | Odisha Latest News, Breaking News, Trending News, Live TV