ଓଡିଶା ଶିକ୍ଷା ବ୍ୟବସ୍ଥାର ଏକ ମାଇଲଖୁଣ୍ଟ ଉତ୍କଳ ବିଶ୍ୱବିଦ୍ୟାଳୟ । ଯେଉଁଠି ଗଢ଼ାହୁଏ ହଜାର ହଜାର ଶିକ୍ଷାର୍ଥୀଙ୍କ ଭାଗ୍ୟ ଓ ଭବିଷ୍ୟତ ଏବେ ଚିନ୍ତା ବଢ଼ାଇଛି ସେହି ଶିକ୍ଷାନୁଷ୍ଠାନର ପରିବେଶ। ଅଣଛାତ୍ରଙ୍କ ପ୍ରବେଶ, ନିଶା କାରବାର ପାଇଁ ଉତ୍କଳ ବିଶ୍ଵବିଦ୍ୟାଳୟର ଶୈକ୍ଷିକ ବାତାବରଣ ନଷ୍ଟ ହେଉଛି। ବିଶ୍ୱ ବିଦ୍ୟାଳୟ ମୁଖ୍ୟ ଫାଟକରେ କ୍ୟାମେରା ଓ ସୁରକ୍ଷା କର୍ମୀ ନିୟୋଜିତ କରାଯାଇଥିବା ବେଳେ ବିଶ୍ୱବିଦ୍ୟାଳୟ ପଛରେ କିନ୍ତୁ ସାହାଣ ମେଲା । ଫଳରେ ସାମ୍ରାଜ୍ୟ ବିସ୍ତାର କରିଚାଲିଛନ୍ତି ନିଶାଡ଼ି।

ଘଟଣାକୁ ନେଇ ବିଶ୍ୱ ବିଦ୍ୟାଳୟର କୁଳପତିଙ୍କ ଅସହାୟତା ମଧ୍ୟ ଦେଖିବାକୁ ମିଳିଛି। ବର୍ଷ ବର୍ଷ ଧରି କ୍ୟାମ୍ପସରେ ଡେରା ମେଲାଇଥିବା ଅଣଛାତ୍ର ଓ ମାଫିଆଙ୍କୁ ବିତାଡିତ କରିବା ପାଇଁ ପୋଲିସ ଡିଜିଙ୍କୁ ଚିଠି ଲେଖି ସହାୟତା ଲୋଡିଛନ୍ତି କୁଳପତି। ଏହି ପ୍ରସଙ୍ଗରେ କୁଳପତିଙ୍କର କୌଣସି ପ୍ରତିକ୍ରିୟା ମିଳିପାରିନାହିଁ ।

ଉତ୍କଳ ବିଶ୍ଵବିଦ୍ୟାଳୟ ଅବ୍ୟବସ୍ଥା ସମ୍ପର୍କରେ ବାରମ୍ବାର ଖବର ପରିବେଷଣ ସତ୍ୱେ କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରାଯାଉନାହିଁ। ଯାହା ଦ୍ୱାରା ବିଶ୍ଵବିଦ୍ୟାଳୟର ଶିକ୍ଷା ବ୍ୟବସ୍ଥା ବିପର୍ଯ୍ୟସ୍ତ ହେଉଥିବାବେଳେ ଛାତ୍ରଛାତ୍ରୀ ଅସୁବିଧାର ସମ୍ମୁଖୀନ ହେଉଛନ୍ତି।