Odisha Visit / ଆଜି ଓଡ଼ିଶା ଆସୁଛନ୍ତି ଉପରାଷ୍ଟ୍ରପତି ସି.ପି. ରାଧାକୃଷ୍ଣନ, ସୁରକ୍ଷା ବ୍ୟବସ୍ଥା କଡ଼ାକଡ଼ି

Key Points
ସୁରକ୍ଷାରେ ନ୍ୟସ୍ତ ୪୭ ପ୍ଲାଟୁନ ଫୋର୍ସ
ଭୁବନେଶ୍ବର ଓ କଟକ ଗସ୍ତ ପୂର୍ବରୁ ଆର୍ଓ ଗ୍ରାଉଣ୍ଡରେ ବ୍ରିଫିଂ ରିହର୍ସାଲ୍
ସୋମବାର ସକାଳ ୯ଟା ୧୫ରେ ଭୁବନେଶ୍ବରରେ ପହଞ୍ଚିବେ ସି.ପି. ରାଧାକୃଷ୍ଣନ
ଆଜି ଓଡ଼ିଶା ଗସ୍ତରେ ଆସୁଛନ୍ତି ଦେଶର ଉପରାଷ୍ଟ୍ରପତି ସି.ପି. ରାଧାକୃଷ୍ଣନ । ତାଙ୍କର ଏହି ଗସ୍ତକୁ ନେଇ ରାଜ୍ୟ ପ୍ରଶାସନ ଓ ପୋଲିସ ପକ୍ଷରୁ ବ୍ୟାପକ ପ୍ରସ୍ତୁତି କରାଯାଇଛି । ସୂଚନା ଅନୁଯାୟୀ, ଆଜି ସକାଳ ୯ଟା ୧୫ ମିନିଟ୍ରେ ଉପରାଷ୍ଟ୍ରପତି ଭୁବନେଶ୍ୱରରେ ପହଞ୍ଚିବେ । ଏହି ଗସ୍ତ ଅବସରରେ ସେ ବିଭିନ୍ନ ସରକାରୀ ଓ ଶିକ୍ଷା ସମ୍ବନ୍ଧୀୟ କାର୍ଯ୍ୟକ୍ରମରେ ଯୋଗଦେବେ ।
ଭୁବନେଶ୍ୱରରେ ଥିବା ବିଧାନସଭା ପରିସରରେ ଆୟୋଜିତ ବିଧାୟକମାନଙ୍କ ତାଲିମ କାର୍ଯ୍ୟକ୍ରମରେ ଉପରାଷ୍ଟ୍ରପତି ସାମିଲ ହେବେ । ଏହି ଅବସରରେ ସେ ବିଧାୟକମାନଙ୍କୁ ମାର୍ଗଦର୍ଶନ କରିବା ସହ ଗଣତାନ୍ତ୍ରିକ ବ୍ୟବସ୍ଥାରେ ଜନପ୍ରତିନିଧିଙ୍କ ଭୂମିକା ଓ ଦାୟିତ୍ୱ ସମ୍ପର୍କରେ ଉଦ୍ବୋଧନ ଦେବେ ବୋଲି ଆଶା କରାଯାଉଛି ।
ଏହାପରେ ଉପରାଷ୍ଟ୍ରପତି କଟକ ଗସ୍ତ କରିବେ । ସେଠାରେ ଶ୍ରୀଶ୍ରୀ ବିଶ୍ୱବିଦ୍ୟାଳୟ ପରିସରରେ ନିର୍ମିତ ଆଇକନିକ୍ ଟାୱାରର ଉଦ୍ଘାଟନ କରିବେ । ଏହି କାର୍ଯ୍ୟକ୍ରମକୁ ନେଇ ବିଶ୍ୱବିଦ୍ୟାଳୟ ପକ୍ଷରୁ ମଧ୍ୟ ସ୍ୱତନ୍ତ୍ର ପ୍ରସ୍ତୁତି କରାଯାଇଛି ।
ଅନ୍ୟପଟେ ଉପରାଷ୍ଟ୍ରପତିଙ୍କ ଗସ୍ତକୁ ଦୃଷ୍ଟିରେ ରଖି ସୁରକ୍ଷା ବ୍ୟବସ୍ଥାକୁ ସମ୍ପୂର୍ଣ୍ଣ କଡ଼ାକଡ଼ି କରାଯାଇଛି । ତାଙ୍କ ସୁରକ୍ଷା ପାଇଁ ମୋଟ ୪୭ ପ୍ଲାଟୁନ୍ ପୋଲିସ ଫୋର୍ସ ସହ ୧୪୨ ସେକ୍ସନ୍ ପୋଲିସ କର୍ମଚାରୀଙ୍କୁ ମୁତୟନ କରାଯାଇଛି। ସୁରକ୍ଷା ଓ ଟ୍ରାଫିକ୍ ପରିଚାଳନା ଦାୟିତ୍ୱ ବରିଷ୍ଠ ପୋଲିସ ଅଧିକାରୀଙ୍କୁ ଦିଆଯାଇଛି । ଉପରାଷ୍ଟ୍ରପତିଙ୍କ ଗସ୍ତ ସମୟରେ ଯେପରି କୌଣସି ଅସୁବିଧା ନହୁଏ, ସେଥିପାଇଁ ପୋଲିସ ଓ ପ୍ରଶାସନ ପକ୍ଷରୁ ସମସ୍ତ ପ୍ରକାର ପଦକ୍ଷେପ ନିଆଯାଇଛି ।
ବିଧାନସଭା ସଦସ୍ୟଙ୍କର ହେବ ସ୍ବତନ୍ତ୍ର ଓରିଏଣ୍ଟେସନ କାର୍ଯ୍ୟକ୍ରମକୁ ଉଦଘାଟନ କରିବେ ଉପରାଷ୍ଟ୍ରପତି । ଓରିଏଣ୍ଟେସନ କାର୍ଯ୍ୟକ୍ରମରେ ମୋଟ ତିନିଟି ସେସନ୍ ରହିବ । ଉଦଘାଟନି ସେସନ୍ ପରେ ସଂସଦ କମିଟି ଏବଂ ବିଧାନସଭା କମିଟି ସମ୍ପର୍କରେ ଆଲୋଚନା କରାଯିବ । ଟେକ୍ନିକାଲ ଏକ୍ସପର୍ଟ ଏହି ସେସନ୍ କୁ ସମ୍ବୋଧିତ କରିବେ । ପରବର୍ତ୍ତୀ ସେସନ୍ ରେ ବଜେଟ୍ ସଂକ୍ରାନ୍ତରେ ଆଲୋଚନା କରାଯିବ। ତେବେ ଉପରାଷ୍ଟ୍ରପତିଙ୍କ କାର୍ଯ୍ୟକ୍ରମକୁ ନେଇ ବି ଆରମ୍ଭ ହୋଇଛି ରାଜନୀତି । କଂଗ୍ରେସ ଭାଗ ନେବ ନାହିଁ ବୋଲି ଦଳର ସଭାପତି ସ୍ପଷ୍ଟ କରିଥିବା ବେଳେ ଆବଶ୍ୟକତା ଥିବା ବିଧାୟକ ଯୋଗ ଦେବେ ବୋଲି କହିଛି ବିଜେଡି ।
📱 Get Argus News App
✨Related Topics
Explore more stories