ପାଠ ପଢି ସରକାରୀ ଚାକିରି କରିଥିଲେ । ତାହା ବି ଅଫିସର ଚାକିରି । ହେଲେ ଚାକିରି କାଳରେ ଏତେ ଖାଇଲେ ଯେ ଏବେ ତାଙ୍କ ସମ୍ପତ୍ତିକୁ ନେଇ ଚାରିଆଡେ ଚର୍ଚ୍ଚା । ଯେତେ ଖୋଳିଲେ ସେତେ ମିଳୁଛି । ସାଧାରଣ ଲୋକଟିଏ ଖଣ୍ଡେ ଜାଗା କିଣିବାକୁ ହେଲେ ନିଜ ଜୀବନ ଯାକର ସବୁ ଯାକ ଜମା ପୁଞ୍ଚି ସାରିଦିଏ । ହେଲେ ଡିଏଫଓ ନିତ୍ୟାନନ୍ଦ ବାବୁଙ୍କର 115 ଟି ପ୍ଲଟ୍ ଠାବ କରିଛି ଭିଜିଲାନ୍ସ । ଘରର ସମସ୍ତଙ୍କ ନାଁରେ ସେ ଜାଗା କିଣିଦେଇଛନ୍ତି । ନିଜ ନାଁରେ ୫୩ଟି ପ୍ଲଟ୍ , ପତ୍ନୀଙ୍କ ନାଁରେ ୪୨ଟି ପ୍ଲଟ୍, ୨ ପୁଅଙ୍କ ନାଁରେ ୧୬ ପ୍ଲଟ୍‌, ଆଉ ଝିଅ ନାଁରେ ୪ ପ୍ଲଟ୍‌ । ଗାଡି, ସୁନା କେଉଁଥିରେ ଅଭାବ ନାହିଁ ।

ଏ ତ ଗଲା ପ୍ଲଟ୍ କଥା । ଅନୁଗୁଳ ଛେଣ୍ଡିପଦାରେ ଥିବା ବାବୁଙ୍କର ଫାର୍ମ ହାଉସ୍ ଦେଖିଲେ ଆଖି ତଟକା ହୋଇଯିବ । ଆପଣଙ୍କ ଆଖି ଯେ ପର୍ଯ୍ୟନ୍ତ ପାଉଛି ସେ ଯାଏଁ ସବୁ ଡିଏଫଓଙ୍କ ଜାଗା । ଯେଉଁଠି ରହିଛି ଆମ୍ବ ବାଗେନା, କଦଳୀ ଗଛ , ନଡିଆ ଗଛ..ପୋଖରୀ...314 ସ୍କୋୟାର ଫୁଟର ଏ ଘର,1432 ସ୍କୋୟାର ଫୁଟର ଆଉଟ ହାଉସ ।

ଏବେ ପର୍ଯ୍ୟନ୍ତ ଘରୁ କେବଳ କ୍ୟାସ୍ ଜବତ ହେଲାଣି ୧୦ ଲକ୍ଷରୁ ଊର୍ଦ୍ଧ୍ୱ । ଗତ ତିନି ଦିନ ଧରି ରେଡ୍ ଚାଲିଥିବାବେଳେ ଯେତେ ଖୋଜିଲେ ବାହାରୁଛି ପୋତା ଧନ । ଖାଲି କ୍ୟାସ୍ କାହିଁକି ଆଲିସାନ ବଙ୍ଗଳା ଭିତରେ ବ୍ୟବହାର ସାମଗ୍ରୀ ଦେଖିଲେ ଆପଣ ବି ତାଜୁବ ହୋଇଯିବେ । ଦାମି କାଠରେ ତିଆରି ଘରର ଇଣ୍ଟେରିୟର । ଆଖି ଖୋସି ହେଇଯିବ । ଆକାଉଣ୍ଟରେ ୩୭ ରୁ ୩୮ ଲକ୍ଷ ଟଙ୍କା ଜମା । ଏକାଧିକ ପାସବୁକ କାଗଜପତ୍ର । ବହୁତଳ ଅଟ୍ଟାଳିକା । ପୁଣି ପିସ୍ତଲ, ଧାରୁଆ ଅସ୍ତ୍ର ଜବତ କରିଛି ଭିଜିଲାନ୍ସ ।

ଆୟ ବହିର୍ଭୁତ ସଂପର୍ତ୍ତି ଠୁଳ ନେଇ କେନ୍ଦୁଝର କେନ୍ଦୁପତ୍ର ଡିଭିଜନର ଡିଏଫଓଙ୍କ ବିରୋଧରେ ଅଭିଯୋଗ ଥିଲା । କେନ୍ଦୁଝର ଭିଜିଲାନ୍ସ ସ୍ୱତନ୍ତ୍ର ବିଚାରପତିଙ୍କଠାରୁ ସର୍ଚ୍ଚ ୱାରେଣ୍ଟ ପାଇବା ପରେ ରେଡ୍ କରିଥିଲା । ଦୀର୍ଘ ତିନି ଦିନ ଧରି ଚାଲିଲା ରେଡ୍ । ଭିଜିଲାନ୍ସର ଏକାଧିକ ଟିମ୍ କେନ୍ଦୁଝରସ୍ଥିତ କାର୍ଯ୍ୟାଳୟ, ବାସଭବନ, ନୟାଗଡ, ଓ ଅନୁଗୁଳ ଜିଲ୍ଲାର 7ଟି ସ୍ଥାନରେ ଚଢାଉ କଲେ । ପୈତୃକ ଘର, ଶ୍ୱଶୁର ଘର ସବୁଠି ରେଡ୍ ହେବା ପରେ ଶେଷରେ ଡିଏଫଓ ନିତ୍ୟାନନ୍ଦ ନାୟକଙ୍କୁ ବାନ୍ଧିଛି ଭିଜିଲାନ୍ସ ।

ଡିଏଫ ନିତ୍ୟାନନ୍ଦ ନାୟକ ୧୯୯୨ ମସିହାରେ ବନ ସଂରକ୍ଷକ ଭାବରେ ସରକାରୀ ଚାକିରିରେ ଯୋଗ ଦେଇଥିଲେ । ଏସିଏଫ୍, ଡେପୁଟି ଫରେଷ୍ଟ କନଜରଭେଟର (ଡିସିଏଫ୍) ଏବଂ ଡିଏଫଓ ସମେତ ବିଭିନ୍ନ ପଦବୀରେ ସେ କାର୍ଯ୍ୟ କରିଛନ୍ତି । ତାଙ୍କର ପୂର୍ବ ପୋଷ୍ଟିଂ ଭୁବନେଶ୍ୱରର ପିସିସିଏଫ୍ (ବନ୍ୟପ୍ରାଣୀ) ମୁଖ୍ୟାଳୟରେ ଥିଲା । ଯେଉଁଠାରେ ସେ ସେପ୍ଟେମ୍ବର ୨୦୨୨ ରୁ ଡିସିଏଫ୍ ଭାବରେ କାର୍ଯ୍ୟ କରିଥିଲେ ଏବଂ ୨୦୨୪ ମସିହାରେ ପଦୋନ୍ନତି ପରେ କେଉଁଝର କେଏଲ ଡିଭିଜନରେ ଡିଏଫଓ ଭାବରେ ଯୋଗ ଦେଇଥିଲେ। କୁହାଯାଉଛି ୧୯୯୨ ରୁ ୨୦୨୪ ମଧ୍ୟରେ ସେ ସମସ୍ତ ପ୍ଲଟ୍ କିଣିଛନ୍ତି । ଏହି ପ୍ଲଟ୍‌ଗୁଡ଼ିକର ପଞ୍ଜିକୃତ ବିକ୍ରୟ ଡିଡ୍ ମୂଲ୍ୟ ପ୍ରାୟ ୨.୫ କୋଟି ଟଙ୍କା । ତଥାପି, ଏହି ଜମିର ପ୍ରକୃତ ମୂଲ୍ୟ ୧୦ କୋଟିରୁ ଉର୍ଦ୍ଧ୍ୱ ହେବା ଆକଳନ କରାଯାଉଛି ।

ତେବେ ସରକାରୀ ଚାକିରି ତାହା ବି ଅଫିସର ଚାକିରିଟିଏ କରିବା ଅଧିକାଂଶ ଲୋକଙ୍କ ସ୍ୱପ୍ନ । ସମାଜରେ ସେମାନଙ୍କର ସମ୍ମାନ ମଧ୍ୟ ବହୁତ । ତାଙ୍କ ଆଗରେ କଥା ପଦେ କହିବାକୁ ଦୁଇ ଥର ଚିନ୍ତା କରନ୍ତି ଲୋକେ । ଚାକିରି କରିବା ପୂର୍ବରୁ ଲୋକଙ୍କ ପାଇଁ ଅନେକ କାମ କରିବା କଥା କହିଥାନ୍ତି ଏହି ବାବୁମାନେ । ହେଲେ ଚାକିରି ପାଇବା ପରେ ବୋଧେ ସେ ସବୁ ଭୁଲି ଯାଆନ୍ତି । ସମାଜ କଥା ଛାଡି କେବଳ ନିଜ କଥା ଚିନ୍ତା କରନ୍ତି । ନହେଲେ ବାରମ୍ବାର ଏମିତି ଦୃଶ୍ୟ ଦେଖିବାକୁ ମିଳନ୍ତାନି । ତେବେ ଏଠି ପ୍ରଶ୍ନ ସରକାରୀ ବାବୁମାନଙ୍କର ଏ ଲାଞ୍ଚଖିଆ ପ୍ରକୃତି କେବେ କମିବ ? ଏ ଲାଞ୍ଚ ଖିଆ ବାବୁମାନେ ସୁସମାଜ ଗଢିବେ କ'ଣ ? ନିଜେ ହିଁ ସମାଜ ନଷ୍ଟ କରିବାର ଗୋଟିଏ ଗୋଟିଏ ପୁରୋଧା ସାଜିଛନ୍ତି କହିଲେ ଭୂଲ୍ ହେବନି ।