ଭୁବନେଶ୍ଵର: ଲାଞ୍ଚ ନେଉଥିଲେ OAS ଟପ୍ପର, ଧରିଲା ଭିଜିଲାନ୍ସ । ୧୫ ହଜାର ଲାଞ୍ଚ ନେବା ବେଳେ ଭିଜିଲାନ୍ସ ହାତରେ ଧରାପଡ଼ିଛନ୍ତି ବାମରା ତହସିଲଦାର ଅଶ୍ଵିନୀ କୁମାର ପଣ୍ଡା । ଜମିବାଡ଼ି ପଟ୍ଟାକୁ ଘରବାଡ଼ି କିସମରେ ପରିବର୍ତ୍ତନ ପାଇଁ ସେ ଲାଞ୍ଚ ନେଇ ଧରା ପଡ଼ିଛନ୍ତି ।

ସୂଚନା ଅନୁସାରେ, ଜଣେ ବ୍ୟକ୍ତ ଜମି ପଟ୍ଟାର କିସମ ପରିବର୍ତ୍ତନ ପାଇଁ ମାସକ ତଳେ ସମ୍ବଲପୁର ଜିଲ୍ଲା ବାମରା ତହସିଲ୍ କାର୍ଯ୍ୟାଳୟରେ ଆବେଦନ କରିଥିଲେ । ଆଉ ଜମି କିସମ ପରିବର୍ତ୍ତନ ପାଇଁ ୨୦ ହଜାର ଟଙ୍କା ଲାଞ୍ଚ ମାଗିଥିଲେ ଟପ୍ପର ତହସିଲଦାର । ଆଉ ଶେଷରେ ୧୫ ହଜାର ଟଙ୍କା ଦେବାକୁ କହିଥିଲେ, ନ ଦେଲେ କିସମ ପରିବର୍ତ୍ତନ ହୋଇ ପାରିବ ନାହିଁ ବୋଲି କହିଥିବା ଭିଜିଲାନ୍ସ ସୂଚନା ଦେଇଛି ।

ଏହାକୁ ନେଇ ଅଭିଯୋଗକାରୀ ଜଣଙ୍କ ଭିଜିଲାନ୍ସର ଦ୍ଵାରସ୍ଥ ହୋଇଥିଲେ । ଆଉ ପୂର୍ବ ଯୋଜନା ଅନୁସାରେ, ଶୁକ୍ରବାର ତହସିଲଦାର ଅଶ୍ଵିନୀ ପଣ୍ଡା ଜମି କିସମ ପରିବର୍ତ୍ତନ ପାଇଁ ତାଙ୍କ ଡ୍ରାଇଭରଙ୍କ ଜରିଆରେ ଲାଞ୍ଚ ନେବା ବେଳେ ଭିଜିଲାନ୍ସ ଧରିଥିଲା । ଏହାପରେ ଭିଜିଲାନ୍ସ ତହସିଲଦାରଙ୍କ ଘର ସହ ବିଭିନ୍ନ ସ୍ଥାନରେ ରେଡ୍ କରିଥିଲା ।
ଚଢ଼ାଉ ବେଳେ ବାବୁଙ୍କ ଭୁବନେଶ୍ଵର ଘରୁ ଭିଜିଲାନ୍ସ ପାଇଥିଲା ନଗଦ ୪ ଲକ୍ଷ ୭୩ ହଜାର ଟଙ୍କା । ମାମଲାରେ ଭିଜିଲାନ୍ସ OAS ଅଶ୍ଵିନୀ ପଣ୍ଡାଙ୍କ ସହ ତାଙ୍କ ଡ୍ରାଇଭରକୁ ଗିରଫ କରିଛି । ଅଶ୍ଵିନୀ ଆୟ ବହିର୍ଭୂତ ସମ୍ପତ୍ତିର ଖୋଳତାଡ଼ ଜାରି ରଖିଛି ଭିଜିଲାନ୍ସ ।

ଲୋକଙ୍କ ସେବାରେ ନିୟୋଜିତ OAS ଟପ୍ପର ତହସିଲଦାର ଲାଞ୍ଚ ନେଇ ଧରାପଡ଼ିବା ପରେ ପ୍ରତିକ୍ରିୟା ରଖିଛନ୍ତି ରାଜସ୍ଵ ମନ୍ତ୍ରୀ । ସେ କହିଛନ୍ତି, 'ଦୁର୍ନୀତିଗ୍ରସ୍ତ ଅଫିସରଙ୍କ ଉପରେ ବିଜେପି ସରକାର କଡ଼ା ଆଭିମୁଖ୍ୟ ଗ୍ରହଣ କରିଛନ୍ତି । ଦୁର୍ନୀତି କରି ଅନେକ ଅଫିସର ଜେଲ ଗଲେଣି । ଦୁଇ ଦିନ ତଳେ କୁଚିଣ୍ଡା ତହସିଲଦାରଙ୍କୁ ସରକାର ନିଲମ୍ବନ କରିଛନ୍ତି । ଏବେ ୨୦୧୯ ବ୍ୟାଚର ଟପ୍ପର ଲାଞ୍ଚ ନେଇ ଧରା ପଡ଼ିଛନ୍ତି ।'

ଖୁବଶୀଘ୍ର ତାଙ୍କୁ ନିଲମ୍ବିତ କରାଯିବ ବୋଲି କହିଛନ୍ତି ରାଜସ୍ଵ ମନ୍ତ୍ରୀ ସୁରେଶ ପୂଜାରୀ । ଏଥିସହ ମନ୍ତ୍ରୀ ଲୋକଙ୍କୁ ଅପିଲ୍ କରି କହିଛନ୍ତି, 'ସରକାରୀ ସ୍ତରରେ, ରାଜସ୍ବ ବିଭାଗରେ ଅନ୍ୟାୟ, ଲାଞ୍ଚ, ଆଇନ ବିରୋଧୀ କାର୍ଯ୍ୟ ଦେଖିଲେ ନଜରକୁ ଆଣନ୍ତୁ, କେହି ବର୍ତ୍ତିବେନି । ବିଭାଗ ପ୍ରତି ମାସ ଆସେସମେଣ୍ଟ କରୁଛି । ଯିଏ ଦୁର୍ନୀତି କରିବ ଦୃଷ୍ଟାନ୍ତମୂଳକ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ । ଜୀବନ ସାରା ପଶ୍ଚାତାପ କରିବେ ଦୁର୍ନୀତିଗ୍ରସ୍ତ ଅଧିକାରୀ । ଭିଜିଲାନ୍ସ ଓ ପୋଲିସ ଆକ୍ସନ ନେବା ପୂର୍ବରୁ ବିଭାଗ ପହଞ୍ଚିବ ।'

Argus News | argus news | Odisha Latest News, Breaking News, Trending News, Live TV