ଗଂଜାମ ଜିଲ୍ଲା ପାତ୍ରପୁର ବ୍ଲକ ବାଦପୁର ଗ୍ରାମ ପଞ୍ଚାୟତରେ ଅବସ୍ଥିତ ଏହି ଅଭିଶପ୍ତ ଆମ୍ବୁଆଘାଇ ଗାଁ । ଗ୍ରାମରେ ବସବାସ କରନ୍ତି ୧୨ ରୁ ୧୪ ଆଦିବାସୀ ପରିବାର । ଏମାନଙ୍କ ଲାଗି ନା ଅଛି ଚାଲିବାକୁ ପକ୍କା ରାସ୍ତା ନା ଅଛି ମୁଣ୍ଡ ଗୁଞ୍ଜିବାକୁ ପକ୍କା ଘର । ଏପରିକି ଦୁନିଆ ଦେଖିବାକୁ ବି ନାହିଁ ବିଦ୍ୟୁତ ସେବା । ରାତି ହେଲେ ସତେ ଯେମିତି ଅନ୍ଧାର ଘୋଟିଯାଏ । ଡିବିର ଆଲୁଅ ଏମାନଙ୍କ ପାଇଁ ସାହା ଭରାସ । ଗାଁକୁ ପହଞ୍ଚିବାକୁ ହେଲେ ଚାଲିବାକୁ ପଡେ ଦୀର୍ଘ ଦୁଇ କିଲୋମିଟର ଏହି ଘାଟି ଓ ସଂକୀର୍ଣ୍ଣ ଅଣ ଓସାରିଆ ରାସ୍ତା । ଘଞ୍ଚ ଲଟା ବୁଦାରେ ପରିପୂର୍ଣ ଥିବା ଏହି ରାସ୍ତାରେ ଦୈନିକ ଯାତାୟାତ କରନ୍ତି ଗ୍ରାମବାସୀ । ରାସ୍ତା ନଥିବାରୁ ବୋଧହୁଏ ପହଁଚି ପାରିନି ସରକାରୀ ଯୋଜନା ।

ବର୍ଷ ବର୍ଷ ଧରି ଆଦିମ ଜୀବନ ଯାପନ କରି ଆସୁଥିବା ଏହିମାନଙ୍କ ପାଇଁ ନାହିଁ ଶିକ୍ଷାର ମୂଳଦୁଆ କହୁଥିବା ଅଙ୍ଗନବାଡ଼ି କେନ୍ଦ୍ର । ସ୍ବାସ୍ଥ୍ୟସେବା କହିଲେ ଯାହା ଭଗବାନଙ୍କ ଆଶୀର୍ବାଦ ଭରସା । ସାମାନ୍ୟ ଜ୍ଵର କଥା କୁହନ୍ତୁ ଅବା ଜନନୀ ଯନ୍ତ୍ରଣା କଥା ଦୀର୍ଘ ୨ କିଲୋମିଟର ଭାରରେ ବୁହା ହୋଇ ଘାଟି ପାହାଡ ଚଢି ଆସିବାକୁ ପଡେ । ସେଥିରେ ଜୀବନ ବଞ୍ଚିଲେ ହେଲା । ବର୍ଷା ତମାମ ଝରଣା ପାଣିକୁ ସୋଲାର ପାଇପ ଯୋଗେ ଆଣି ବ୍ୟବହାର କରନ୍ତି । ତତ୍କାଳୀନ ବିଜେଡି ସରକାରର ୨୪ ବର୍ଷର ଶାସନ ପରେ ମଧ୍ୟ ଏହି ଅଭିଶପ୍ତ ଜୀବନ କାଟୁଛନ୍ତି ଏହି ନିରୀହ ଆଦିବାସୀ ପରିବାର । ସମୟ ବଦଳିଛି ସରକାର ବଦଳିଛି ବଦଳିବାକୁ ବାକି ରହିଛି ଆମ୍ବୁଆଘାଇ ଗାଁର ଚିତ୍ର ।