ଆଦିବାସୀ ବହୁଳ ଗଜପତି ଜିଲ୍ଲାର ବୃହତ୍ତମ ବ୍ଲକ ହେଉଛି ମୋହନା ବ୍ଲକ । ଏହି ବ୍ଲକରେ ତତ୍କାଳୀନ ସରକାରଙ୍କ 24 ବର୍ଷର ଶାସନ ପରେ ବି ପହଞ୍ଚି ପାରିନି ବିକାଶ । ବିକାଶ ଅପକ୍ଷାରେ ମୋହନା ବ୍ଲକର ଏହି ଚାରିଖଣ୍ଡ ଗାଁ । ବାଙ୍କିଝୁଲା ,ଚରିଆପଦା,ଜକରାପଲ୍ଲି,ପେଜପାଣି ଗାଁ । ଗାଁକୁ ଯିବାକୁ ହେଲେ ଦୀର୍ଘ ଦୁଇ କିଲୋମିଟର ମାଟି ରାସ୍ତା ରହିଛି । ଏଇ ମାଟି ରାସ୍ତାରେ ଗଲାବେଳେ ପଡେ ଏକ ଛୋଟିଆ ନଦୀ। ପୂର୍ବରୁ ନଦୀ ଉପରେ ଏକ ପୋଲ ଥିଲା। ମାତ୍ର ତିତିଲି ବାତ୍ୟାରେ ଭସିଗଲା ପୋଲ । ସେହିଦିନ ଠାରୁ ଆଜି ପର୍ଯ୍ୟନ୍ତ ଅଞ୍ଚଳବାସୀ ନାହିଁ ନଥିବାର ସମସ୍ୟାର ସମ୍ମୁଖିନ ହେଉଛନ୍ତି । ପଞ୍ଚାୟତ ଠାରୁ ଆରମ୍ଭ କରି ଦୈନନ୍ଦିନ ହାଟ ବଜାର ସବୁ କାମରେ ଯିବାକୁ ହେଲେ ଏହି ନଦୀ ଡେଇଁ ଯିବାକୁ ପଡୁଛି । ସାମାନ୍ୟ ବର୍ଷା ହେଲେ ପାହାଡି ପାଣି ଆସି ଯୋଗାଯୋଗ ବିଚ୍ଛିନ୍ନ ହୋଇଯାଉଛି ।

ପଞ୍ଚାୟତକୁ ରାସନ ପାଇଁ ଯିବାକୁ ହେଲେ ଏଇ ରାସ୍ତା ଦେଇ ଯିବାକୁ ପଡେ। ସେ ରାସନ ପାଇଁ ହେଉ ଅବା ବାର୍ଦ୍ଧକ୍ୟ ଭତ୍ତା, ଏପରିକି କୁନିକୁନି ପିଲାଙ୍କ ସ୍କୁଲ ଯିବା କଥା ସବୁବେଳେ ଏହି ରାସ୍ତା ଦେଇ ଯାତାୟାତ କରିଥାନ୍ତି । ସାମାନ୍ୟ ବର୍ଷା ଆସିଲେ ଏହି ଚାରି ଖଣ୍ଡ କାଠ ଉପରେ ଭରସା କରି ଯିବାକୁ ପଡ଼େ । ଆବାସ ଘର ଲାଗି ସିମେଣ୍ଟ ଲୁହା ଛଡ଼ ଅନ୍ୟାନ୍ୟ ସାମଗ୍ରୀ ମଧ୍ୟ ଗାଆଁ କୁ ପହଞ୍ଚିବା କଷ୍ଟକର ହୋଇପଡେ । ସ୍ଵାସ୍ଥ୍ୟ ସେବା ଲାଗି ଏହି ରାସ୍ତା ଦେଇ କିପରି ଆମ୍ବୁଲାନ୍ସ ଆସିବା ତାହା ଆପଣ ମାନେ ଭାବିପାରୁଥିବେ । ବାରମ୍ବାର ତତ୍କାଳୀନ ସରକାର ଓ ପ୍ରଶାସନ ଠାରେ ଅଭିଯୋଗ ପରେ ଅଭିଯୋଗ କରି ନିରାଶ ହୋଇଛନ୍ତି ଅଞ୍ଚଳ ବାସୀ ।

ପୋଲ ସମସ୍ୟା ଗ୍ରାମବାସୀଙ୍କ ପାଇଁ ପାଲଟିଛି ଚିନ୍ତାର କାରଣ। ବର୍ଷ ପରେ ବର୍ଷ ବିତୁଛି ମାତ୍ର ହୋଇ ପାରୁନି ପୋଲ ମରାମତି। ତେବେ ନୂଆ ସରକାର ଆସିବା ପରେ ଏହି ସମସ୍ୟା ଦୂର ହେବ ବୋଲି ଆଶା ରଖିଛନ୍ତି ଗ୍ରାମବାସୀ।