ଜଗାକୁ ଦେଖିବାକୁ ସବୁଠି ଆଜି ଭକ୍ତ ବିଭୋର। ରତ୍ନବେଦୀ ଛାଡ଼ି ଜନ୍ମବେଦୀ ଅଭିମୁଖେ ଚତୁର୍ଦ୍ଧାମୂରତି । ଗହଳି ଚହଳିରେ ଏ ଭକ୍ତର ଆଖି ଖାଲି ଖୋଜୁଛି ମହାବାହୁଙ୍କୁ । ରଥରେ ମହାପ୍ରଭୁଙ୍କୁ ଦେଖି ନେତ୍ର ପବିତ୍ର କରୁଛି । ରଥରଜ୍ଜୁ ଟାଣି କୃତାର୍ଥ ଲଭିଛି ଭକ୍ତ । ରଥରେ କାଳିଆ ସାଆନ୍ତଙ୍କୁ ଦେଖିବାକୁ କାହିଁ କେଉଁଆଡୁ ଛୁଟି ଆସିଛନ୍ତି ଭକ୍ତଗଣ । କିଏ ଦର୍ଶନ ପାଇଁ ଆସିଛନ୍ତି ତ ଆଉ କିଏ ସେବାରେ ଲାଗିବାକୁ । କିଏ ଧନ୍ୟବାଦ ଜଣାଇବାକୁ ଆସିଛି ତ ଆଉ କିଏ ଗୁହାରି କରିବାକୁ । କେହି କେହି ମହାପ୍ରଭୁଙ୍କ ସମ୍ମୁଖରେ ନୃତ୍ୟ, ଗୀତ ପରିବେଷଣ କରୁଛନ୍ତି। ଶ୍ରୀକୃଷ୍ଣ ବେଶଧାରୀ କଳାକାର ରଥ ସାମ୍ନାରେ ନୃତ୍ୟ କରି ନିଜକୁ କାଳିଆ ସାଆନ୍ତଙ୍କ ନିକଟରେ ସମର୍ପି ଦେଇଛନ୍ତି । ଏ କଳାକାରଙ୍କୁ ଦେଖିଲେ ତ ଲାଗୁଛି ସତେ ଯେମିତି, ରଥରୁ ଓହ୍ଲାଇ ଆସିଛନ୍ତି କଳା ଠାକୁର । ଅବିକଳ ଜଗନ୍ନାଥଙ୍କ ବେଶ ଧରି କୁନି କଳାକାରଟି ନିଜର କଳା ପ୍ରଦର୍ଶନ କରୁଛି। ଭଦ୍ରକରୁ ଆସିଥିବା ଏ ଦମ୍ପତି ନିଜ ସନ୍ତାନକୁ ଜଗନ୍ନାଥଙ୍କ ନିକଟରେ ସମର୍ପି ଦେଇଛନ୍ତି।

କାରଣ ବଡ଼ ଠାକୁରଙ୍କ ନିକଟରେ ଗୁହାରି କରି ସେ ଏ ପିଲାକୁ ପାଇଥିବା କହିଛନ୍ତି। ସେ ଭାବର ଠାକୁର, ଭକ୍ତର ମନ କଥା ବୁଝେ । ମନସ୍କାମନା ବି ପୂରଣ କରେ ବୋଲି କହିଛନ୍ତି ଏ ଭକ୍ତ। କେବଳ ଭାରତ ନୁହଁ, ସୁଦୂର ଆମେରିକା, ଅଷ୍ଟ୍ରେଲିଆରୁ ବି ଭକ୍ତ ଛୁଟି ଆସିଛି, ରଥରେ କାଳିଆ ଠାକୁରକୁ ଦେଖିବାକୁ । ଏତେ ଦିନ ପରେ ସ୍ବପ୍ନ ସତ ହୋଇଛନ୍ତି ବୋଲି କହିଛନ୍ତି ବିଦେଶୀ ଭକ୍ତ। ବଡ଼ଦାଣ୍ଡରେ ଭକ୍ତିମୟ ପରିବେଶ । ଭାବବିନୋଦିଆ ଚକାଆଖି ସହ ଚର୍ମଚକ୍ଷୁର ମିଳନ । ରତ୍ନବେଦୀ ଛାଡ଼ି ଜନ୍ମବେଦୀରେ ଏବେ ନବଦିନାତ୍ମକ ଲୀଳାଖେଳା ଦେଖାଇବେ ବିଶ୍ବନିୟନ୍ତା।