ଅର୍ଗସ ବ୍ୟୁରୋ : ବିଜେଡି ରାସ୍ତାରେ ଏବେ କଂଟା ସାଜିଲେଣି ପାଣ୍ଡିଆନ । ଚାକିରିରୁ ସ୍ଵେଚ୍ଛାକୃତ ଅବସର ନେବା ପରେ ରାଜନୀତିରେ ସାମିଲ ହୋଇଥିଲେ । ଆଉ ପାଣ୍ଡିଆନଙ୍କ ପଲିଟିକାଲ ଲଞ୍ଚିଂ ପାଇଁ 5T ପରି ଅଗଣତାନ୍ତ୍ରିକ ବିଭାଗ ଆରମ୍ଭ କରିଥିଲା ବିଜେଡ଼ି ସରକାର । କେବଳ 5T ପ୍ରଚାର ପାଇଁ ରାଜ୍ୟ ରାଜକୋଷରୁ ୫୦୦ କୋଟି ଟଙ୍କା ଖର୍ଚ୍ଚ କରିଛନ୍ତି ରାଜ୍ୟ ସରକାର । ହେଲେ ୫-ଟି ପ୍ରଚାର ପାଇଁ ଯେଉଁ ୫୦୦ କୋଟି ଟଙ୍କା ଖର୍ଚ୍ଚ ହୋଇଛି ତାହା ବିଜେଡିର ନିର୍ବାଚନି ଖର୍ଚ୍ଚରେ କାହିଁକି ସାମିଲ କରାଯିବନି ? ବିଜେଡ଼ିଠୁ ଏହି ୫୦୦ କୋଟି ଟଙ୍କା କାହିଁକି ଆଦାୟ ହେବନି ? କିଛି ଏମିତି ପ୍ରଶ୍ନ କରିଛି ବିଜେପି । ଖାଲି ଏତିକି ନୁହେଁ ବରଂ ଫାଇଭ-ଟି ନାଁରେ ରାଜ୍ୟରେ ୪୦ ହଜାର କୋଟିର ଦୁର୍ନୀତି ହୋଇଥିବା ନେଇ ସାଙ୍ଘାତିକ ଅଭିଯୋଗ ବି ହୋଇଛି ।

ଫାଇଭ-ଟି...ବିଭାଗ ଆରମ୍ଭ ହେବା ଦିନରୁ ହିଁ କେଁ ଦେଖାଯାଇଛି । କାରଣ ଇଏ ଏମିତି ଏକ ବିଭାଗ ଯେଉଁ ବିଭାଗରେ ମନ୍ତ୍ରୀ ବି ନଥିଲେ । ତେଣୁ ସମ୍ବିଧାନ ବିରୋଧୀ ଥିବାରୁ ଏ ପ୍ରସଙ୍ଗକୁ ବିଧାନସଭାରେ ଉଠାଇଥିଲେ ବିରୋଧୀ । ଖାଲି ଉଠାଇଥିଲେ ତାହା ନୁହେଁ ବରଂ ତୁମ୍ବିତୋଫାନ ବି କରିଥିଲେ । ହେଲେ ରାଜ୍ୟ ସରକାର ପାଣ୍ଡିଆନଙ୍କୁ ଘଣ୍ଟ ଘଉଡାଇବାକୁ ଚେଷ୍ଟା କରିଥିଲେ । ହେଲେ ଏହାରି ଭିତରେ ନିର୍ବାଚନ ଆଚରଣବିଧି ଲାଗୁ ହେଲା । ଆଉ ଏହାରି ଭିତରେ ଫାଇଭ-ଟି ଅଧ୍ୟକ୍ଷ ଥିବା ପାଣ୍ଡିଆନ ଚାକିରି ଛାଡିବା ପରେ ବି ସିଏମଓର ନଂ-୧ ତାଲିକାରେ ନିଜର ନାଁ ରଖିଥିଲେ । ତେଣୁ ଏହା କେମିତି ସମ୍ଭବ ହେବ ବୋଲି ସିଇଓଙ୍କ ପାଖରେ ଅଭିଯୋଗ କରିଥିଲା ବିଜେପି । ପରେ କମିଶନଙ୍କ ହସ୍ତକ୍ଷେପ ପରେ ପାଣ୍ଡିଆନଙ୍କ ନାଁ ଅଫିସର ଲିଷ୍ଟରୁ ହଟାଇଥିଲେ ସରକାର । ଖାଲି ହଟାଇ ଥିଲେ ତାହା ନୁହେଁ ବରଂ ଫାଇଭ-ଟିର ସବୁ ତଥ୍ୟ ୱେବସାଇଟ୍‌ରୁ ବ୍ଲାଙ୍କ ବି କରିଥିଲେ । ଯାହା ସ୍ପଷ୍ଟ କରିଥିଲା କି ଏ ବିଭାଗ ସଂପୂର୍ଣ୍ଣ ଭାବରେ ଅଗଣତାନ୍ତ୍ରିକ ।

ପ୍ରଥମେ ପାଣ୍ଡିଆନ...ପରେ ରବୀନ୍ଦ୍ର...ଏବେ ଗୋପବନ୍ଧୁ । ସିଏମଓରେ କାର୍ଯ୍ୟରତ ଥିବା ଏଇ ଅଫିସର ମାନେ ସରକାରୀ ଚାକିରି କରିବା ପରେ ବି ଦଳୀୟ ପ୍ରଚାରରେ ନିଜକୁ ବ୍ୟସ୍ତ ରଖୁଛନ୍ତି । ଗୋପବନ୍ଧୁ ଦାସ ମୁଖ୍ୟମନ୍ତ୍ରୀଙ୍କ କାର୍ଯ୍ୟାଳୟରେ ଥିବା ସତ୍ତ୍ଵେ ସେ ବିଜେଡ଼ି ପାଇଁ ଗତ ପଞ୍ଚାୟତ ନିର୍ବାଚନରେ ପ୍ରଚାର କରିଥିଲେ । ତେଣୁ ଗୋପବନ୍ଧୁ ଦାସ ମୁଖ୍ୟମନ୍ତ୍ରୀଙ୍କ କାର୍ଯ୍ୟାଳୟରେ ରହିପାରିବେ କି ? ମୁଖ୍ୟମନ୍ତ୍ରୀଙ୍କ କାର୍ଯ୍ୟାଳୟରୁ ଗୋପବନ୍ଧୁ ଦାସଙ୍କୁ ତୁରନ୍ତ ବହିଷ୍କାର କରାଯାଉ ବୋଲି ଦାବି କରିଛି ବିଜେପି । ଯଦି ତାଙ୍କୁ ହଟା ନଯାଏ ତେବେ ସିଇଓଙ୍କ ପାଖକୁ ଯିବ ଚେତାବନୀ ଦେଇଛି ବିଜେପି ।

ଗୁରୁତ୍ଵପୂର୍ଣ୍ଣ କଥା ହେଲା, 5T ପଦ ଗଲା ପରେ ବି କମିଛି କି ପାଣ୍ଡିଆନଙ୍କ ପାୱାର ? କିଛି ଦିନ ପୂର୍ବରୁ ବସ ଦୁର୍ଘଟଣା ଆହତଙ୍କୁ ଭେଟିବାକୁ ଅଫିସର ମାନଙ୍କ ସହ ଏସସିବି ମେଡିକାଲ ଯାଇଥିଲେ ପାଣ୍ଡିଆନ । ତେଣୁ ରାଜ୍ୟ ରାଜକୋଷ ଲୁଟ ଅଭିଯୋଗରେ ଲୋକ ପ୍ରତ୍ୟାଖାନ କରିବାର ଭୟ ବିଜେଡିକୁ ଘାରିନି ତ ? ଯେଉଁଥିପାଇଁ ପରଦା ପଛରୁ ସବୁ କଣ୍ଟୋଲ କରୁଛନ୍ତି କି ପାଣ୍ଡିଆନ ? କିଛି ଏମିତି ପ୍ରଶ୍ନ ଏବେ ସାଧାରଣରେ ଉଙ୍କି ମାରୁଥିବା ବେଳେ ରାଜ୍ୟ ସରକାରଙ୍କର ଗୋଟିଏ ପରେ ଗୋଟିଏ ଗୁମର ଖୋଲୁଛି ବିଜେପି । ସମୟ କହିବ ଏ ଦୁର୍ନୀତିଗ୍ରସ୍ତ ସରକାରକୁ କେମିତି ଉଚିତ୍‌ ଜବାବ ଦେଉଛନ୍ତି ଭୋଟର ।

Argus News: ଓଡ଼ିଶାର ଖବର | Breaking News, ରାଜନୀତି, କ୍ରୀଡ଼ା ଓ Live TV