ନଦୀରେ ପାଣି କମୁଛି ସତ, ହେଲେ ଏବେ ବି ଗାଁ ଦାଣ୍ଡରେ ଚାଲୁଛି ଡଙ୍ଗା । ବୈତରଣୀ ନଦୀରେ ଆସିଥିବା ବନ୍ୟାରେ ଅଧିକ ପ୍ରଭାବିତ ହୋଇଛି ଭଦ୍ରକ ଜିଲ୍ଲା ଧାମନଗର ବ୍ଲକର ହସନାବାଦ ଓ ଅର୍ଜୁନପୁର ପଞ୍ଚାୟତ । ଆଜି ସକାଳୁ ବନ୍ୟାଜଳ କମି ଯାଇଥିବାରୁ ଲୋକେ ଘରୁ ବାହାରିଛନ୍ତି । ଏବେ ବି ଧୂଷୁରୀ- ହସନାବାଦ ମୁଖ୍ୟ ରାସ୍ତାର ପଞ୍ଚାୟତ ଅଫିସ ନିକଟରେ ୩ ଫୁଟ ଉଚ୍ଚରେ ବନ୍ୟା ପାଣି ପ୍ରବାହିତ ହେଉଛି । ଶହ ଶହ ହେକ୍ଟର ଚାଷ ଜମିରେ ବନ୍ୟାଜଳ ମାଡିଯାଇ ଧାନ ତଳି ଓ ରୁଆ ନଷ୍ଟ କରିଦେଇଛି । ପରିବା ଚାଷ ବି ନଷ୍ଟ ହୋଇଛି । ଗୋରୁ, ଗାଈ ମାନେ ନଦୀ ବନ୍ଧ ଉପରେ ଆଶ୍ରୟ ନେଇଛନ୍ତି । ଭଦ୍ରକ ଜିଲ୍ଲାପାଳ ବନ୍ୟା ସ୍ଥିତି ଦେଖି ଆଜି ଓ ଆସନ୍ତାକାଲି ଧାମନଗର ବ୍ଲକର ହସନାବାଦ, ଅର୍ଜୁନପୁର, ସୋହଡା ଏବଂ ପ୍ରଧାନୀ ପଞ୍ଚାୟତରେ ଥିବା ସ୍କୁଲ ଗୁଡିକୁ ଛୁଟି ଘୋଷଣା କରିଛନ୍ତି। ଭଦ୍ରକ ଭଳି ବାଲେଶ୍ବରରେ ବି ସମାନ ସ୍ଥିତି।

ବିପଦ ସଙ୍କେତ ତଳକୁ ଖସିଛି ସୁବର୍ଣ୍ଣରେଖାର ଜଳସ୍ତର । ହେଲେ ବନ୍ୟାପାଣିରେ ଉବୁଟୁବୁ ହେଉଛି ଉତ୍ତର ବାଲେଶ୍ବର । ସୁବର୍ଣ୍ଣରେଖା ଓ ଜଳକା ନଦୀର ବନ୍ୟାଜଳ ଦ୍ବାରା ବସ୍ତା ବ୍ଲକର ୮ଟି ପଞ୍ଚାୟତ ଏବଂ ସଦର ବ୍ଲକର ୪୦ରୁ ଅଧିକ ଗାଁ ପ୍ରଭାବିତ ହୋଇଛି । ବାଲିଆପାଳର ୮ଟି, ଭୋଗରାଇ ବ୍ଲକର ୧୩ ପଞ୍ଚାୟତ ଏବେ ବି ଜଳବନ୍ଦୀ। ବିଭିନ୍ନ ସ୍ଥାନରେ ରାସ୍ତା ଉପରେ ୪ଫୁଟ୍ ଉଚ୍ଚର ବନ୍ୟା ପାଣି ପ୍ରବାହିତ ହେଉଛି । ପ୍ରଶାସନିକ ଅଧିକାରୀ ଘଟଣା ସ୍ଥଳରେ ପହଞ୍ଚି ସ୍ଥିତି ସମୀକ୍ଷା କରିଛନ୍ତି। ଯାଜପୁର ଜିଲ୍ଲା ଦଶରଥପୁର ଅଂଚଳରେ ବନ୍ୟା ସ୍ଥିତିରେ ସୁଧାର ଆସିଥିଲେ ସୁଦ୍ଧା ଲୋକଙ୍କ ପାଖରେ ପହଞ୍ଚି ପାରିନି ଅତ୍ୟାବଶ୍ୟକୀୟ ସାମଗ୍ରୀ । ବିଶେଷକରି ଗୃହପାଳିତ ପଶୁମାନେ ଏବେ ପର୍ଯ୍ୟନ୍ତ ଭୋକ ଉପାସରେ ରହିଛନ୍ତି । କିଛି ଅଞ୍ଚଳରେ ଚାଷଜମିରେ ପାଣି ମାଡିଯାଇଥିବାରୁ ଧାନଚାଷ ସମ୍ପୂର୍ଣ୍ଣ କ୍ଷତିଗ୍ରସ୍ତ ହୋଇଛି। ବନ୍ୟା ସ୍ଥିତି ନେଇ ରାଜସ୍ବ ଓ ବିପର୍ଯ୍ୟୟ ପରିଚାଳନା ମନ୍ତ୍ରୀ କହିଛନ୍ତି, ବନ୍ୟା କ୍ଷୟକ୍ଷତି ରିପୋର୍ଟ ଆସିବାର ୨୪ ଘଣ୍ଟା ଭିତରେ ମିଳିବ ସହାୟତା । ପାଗ ଅନୁକୂଳ ହେଲେ ଆକାଶ ମାର୍ଗରୁ ବନ୍ୟାଞ୍ଚଳ ପରିଦର୍ଶନ କରିବେ ମୁଖ୍ୟମନ୍ତ୍ରୀ। ଜଳ ସମ୍ପଦ ବିଭାଗ ସର୍ବୋଚ୍ଚ ଯନ୍ତ୍ରୀ କହିଛନ୍ତି, ଭଦ୍ରକ ଓ ଯାଜପୁରରେ ଆଉ ବନ୍ୟା ସ୍ଥିତି ନାହିଁ । ବୁଢ଼ାବଳଙ୍ଗକୁ ବି ବିପଦ ନାହିଁ । ସୁବର୍ଣ୍ଣରେଖା ବନ୍ୟା ଯୋଗୁଁ ବାଲେଶ୍ବରର ୪ଟି ବ୍ଲକ ଜଳେଶ୍ବର, ଭୋଗରାଇ, ବସ୍ତା, ବାଲିଆପାଳ ପ୍ରଭାବିତ ହୋଇଛି । ଧୀରେ ଧୀରେ ସ୍ଥିତିରେ ସୁଧାର ଆସୁଛି।