୩୩ କେଭି ବିଦ୍ୟୁତ୍ ତାର ଲାଗି ଜଳିଗଲେ ଜଳସମ୍ପଦ କର୍ମଚାରୀ
୩୩ କେଭି ବିଦ୍ୟୁତ୍ ତାର ଲାଗି ଜଳିଗଲେ ଜଳସମ୍ପଦ କର୍ମଚାରୀ । ବଳଙ୍ଗା ଜଳସମ୍ପଦ ଉପଖଣ୍ଡ ଅଧୀନ ଚିତଳପୁର ଠାରେ ୩୩ କେଭି ବିଦ୍ୟୁତ୍ ତାର ସଂସ୍ପର୍ଶରେ ଆସି ରବିନାରାୟଣ ନାୟକ ଗୁରୁତର ଆହତ ହୋଇଛନ୍ତି । ତାଙ୍କୁ କ୍ୟାପିଟାଲ୍ ହସ୍ପିଟାଲରେ ଭର୍ତ୍ତି କରାଯାଇଥିଲା । ପରେ କଟକ ବଡ଼ ଡାକ୍ତରଖାନାକୁ ସ୍ଥାନାନ୍ତର କରାଯାଇଛି । ବିଦ୍ୟୁତ ତାର ନଦୀ ବନ୍ଧ ତଳେ ଯାଇଥିବା ହେତୁ ଏଭଳି ପରିସ୍ଥିତି ହୋଇଛି ବୋଲି ଆଲୋଚନା ହେଉଛି ।
ସୂଚନା ମୁତାବକ, ରବିଙ୍କ ଘର ପିପିଲି ରୂପଦେଇପୁର ଗ୍ରାମରେ । ସେ ବଳଙ୍ଗା ଜଳସମ୍ପଦ ଉପଖଣ୍ଡ କାର୍ଯ୍ୟାଳୟରେ ଖଲାସୀ କାର୍ଯ୍ୟ କରୁଥିଲେ । ଗତକାଲି ଅପରାହ୍ନରେ ଚିତଳପୁର ଠାରେ ନଦୀବନ୍ଧର ଲେବୁଲ୍ ନିଆଯିବା ସମୟରେ ରବି ଧରିଥିବା ଲେବୁଲ ଷ୍ଟାଣ୍ଡ୍ ସେଠାରେ ଯାଇଥିବା ୩୩ କେଭି ବିଦ୍ୟୁତ୍ ତାର ସଂସ୍ପର୍ଶରେ ଆସି ଯାଇଥିଲା ।
📱 Get Argus News App
✨ବିଦ୍ୟୁତ୍ ସଂସ୍ପର୍ଶରେ ଆସି ରବିଙ୍କ ଗୋଡ଼ ଠାରୁ ଅଣ୍ଟା ପର୍ଯ୍ୟନ୍ତ ପୋଡ଼ି ଯାଇଥିଲା । ସେଠାରେ ଉପସ୍ଥିତ ଥିବା ବିଭାଗୀୟ ଯନ୍ତ୍ରୀ ଓ ଅନ୍ୟ କର୍ମଚାରୀମାନେ ତାଙ୍କୁ ଉଦ୍ଧାର କରି ଡାକ୍ତରଖାନା ନେଇଥିଲେ । ବର୍ତ୍ତମାନ ସେ କଟକ ମେଡିକାଲରେ ଗୁରୁତର ଅବସ୍ଥାରେ ଚିକିତ୍ସା ହେଉଥିବା ଜଣାପଡ଼ିଛି ।