ବୌଦ୍ଧ ଜିଲ୍ଲା କଣ୍ଟାମାଳ ବ୍ଲକ ହେଡ୍‌କ୍ବାଟର । ଏହା କୌଣସି ଉପାନ୍ତ ଅଂଚଳ ନୁହେଁ l ଏଠି ୧୦ ହଜାରରୁ ଉର୍ଦ୍ଧ ପରିବାର ବସବାସ କରୁଥିବାବେଳେ ସେମାନଙ୍କ ପାଇଁ ପିଇବା ପାଣି ପାଇଁ ବସୁଧା ଯୋଜନାରେ କୋଟି କୋଟି ଟଙ୍କା ଖର୍ଚ୍ଚ କରି ତେଲନଦୀ କୂଳରେ ପ୍ରକଳ୍ପ ତିଆରି ହୋଇଥିଲା । ହେଲେ ପାଣି ସବୁ ପଡ଼ାକୁ ପହଂଚି ପାରୁନାହିଁ l ସବୁଦିନ ଘଣ୍ଟେ ଦି ଘଣ୍ଟା ପାଣି ଆସୁଛି । ଫଳରେ ପାଣି ପାଇଁ ଅପେକ୍ଷା କରିଥିଲେ ସୁଦ୍ଧା କିଏ ପାଣି ପାଉଛି ତ, ଆଉ କେହି ପାଣି ନ ପାଇ ନିରାଶ ହେବାକୁ ପଡୁଛି l ପାଣି ମୁନ୍ଦିଏ ପାଇଁ ସକାଳୁ ସଞ୍ଜ ଯାଏଁ ଲମ୍ବା ଲାଇନ ଲାଗୁଛି । ଏ ସମସ୍ୟା ଆଜି କି କାଲିର ନୁହେଁ, ଦୀର୍ଘ ବର୍ଷର । ଅନେକ ସମୟରେ ଦେଢ଼ କିଲୋମିଟର ଦୂରରେ ଥିବା ତେଲନଦୀକୁ ଯାଇ ଚୁଆ ଖୋଲି ପାଣି ଆଣୁଛନ୍ତି ମହିଳାମାନେ l ପାଣି ପାଇଁ ଗାଁ ଲୋକେ ରାସ୍ତାରୋକ ସହ ଆନ୍ଦୋଳନ କରୁଛନ୍ତି, ହେଲେ ଫଳ ଶୂନ ।

ସୀମାନ୍ତ ମୟୂରଭଞ୍ଜ ଜିଲ୍ଲାରେ ବି ପାଣି ସସମ୍ୟା କଥା ନ କହିଲେ ଭଲ । କୁଳିଅଣା ବ୍ଲକ ବାଲେଡିହି ଗାଁରେ ପିଇବା ପାଣି ପାଇଁ ଦୁର୍ଦ୍ଦିନରେ ଅଦିବାସୀ । ୭୦ ପରିବାର ପାଇଁ ଗାଁରେ ଗୋଟିଏ ନଳକୂପ ଓ ଗୋଟିଏ କୂଅ ରହିଛି l ନଳକୂପରେ ଖରାଦିନ ଆସିଲେ ପିଇବା ଉପଯୋଗୀ ପାଣି ବାହାରେ ନାହିଁ । କୂଅରେ ଅଳ୍ପ କିଛି ପାଣି ମିଳେ l ଗରେ ପାଣି ପାଇଁ ଘଣ୍ଟା ଘଣ୍ଟା ଛିଡା ହେବାକୁ ପଡ଼ୁଛି । ରାଜ୍ୟ ସରକାରଙ୍କ ବସୁଧା ଯୋଜନା ଏମାନଙ୍କ ପାଇଁ ସାତ ସପନ ପାଲଟିଛି ।

ପୂର୍ବ ୨୪ ବର୍ଷର ସ୍ଥିର ବିଜେଡି ସରକାର ପାଇଁ ଉପହାସ ପାଲଟିଥିଲା ପାନୀୟ ଜଳ ସମସ୍ୟା । ଜଳ ଯନ୍ତ୍ରଣା ପ୍ରତି ନିଘା ବି ନଥିଲା । ଏବେର ସରକାର ପାନୀୟ ଜଳର ସମସ୍ୟାର ତୁରନ୍ତ ସମାଧାନ ପାଇଁ ଆଶା ରଖିଛନ୍ତି ସ୍ଥାନୀୟ ବାସିନ୍ଦା ।